រាជធានីភ្នំពេញ ៖ សម្ភារៈចាស់ៗ និងទុយោម៉ាស៊ីនត្រជាក់គរទុកចោលនៅលើដំបូលផ្ទះ ត្រូវបានអគ្គិភ័យឆាបឆេះយ៉ាងសន្ធោសន្ធៅ និងមានផ្សែងហុយខ្មួលខ្មាញ់ បង្កឲ្យមានការភ្ញាក់ផ្អើលយ៉ាងខ្លាំង ដល់ប្រជាពលរដ្ឋនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យមកអន្តរាគមន៍ ។…
រាជធានីភ្នំពេញ ៖ សម្ភារៈចាស់ៗ និងទុយោម៉ាស៊ីនត្រជាក់គរទុកចោលនៅលើដំបូលផ្ទះ ត្រូវបានអគ្គិភ័យឆាបឆេះយ៉ាងសន្ធោសន្ធៅ និងមានផ្សែងហុយខ្មួលខ្មាញ់ បង្កឲ្យមានការភ្ញាក់ផ្អើលយ៉ាងខ្លាំង ដល់ប្រជាពលរដ្ឋនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យមកអន្តរាគមន៍ ។
ហេតុការណ៍នេះបានកើតឡើងកាលពីវេលាម៉ោង១:១០នាទីរសៀល ថ្ងៃទី១៦ ខែសីហា ឆ្នាំ២០២៥ នៅចំណុចផ្ទះលេខ២៥M ផ្លូវលំ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
តាមសាក្សីបានឲ្យដឹងថា នៅមុនពេលកើតហេតុ គេឃើញភ្លើងបានឆាបឆេះចេញពីលើដំបូលជាន់ទី១ នៃផ្ទះល្វែងយ៉ាងសន្ធោសន្ធៅ និងផ្សែងខ្មួលខ្មាញ់ បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាងនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យមកអន្តរាគមន៍ ។
តាមនគរបាលការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងហេតុការណ៍អគ្គិភ័យនេះ រថយន្តពន្លត់អគ្គិភ័យចំនួន ៣គ្រឿង បានទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញ នៅវេលាម៉ោង១:៣០នាទីរសៀល នាថ្ងៃខែឆ្នាំដដែល ពុំបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ ។
នគរបាលបានឲ្យដឹងទៀតថា អគ្គិភ័យនេះបណ្តាលឲ្យទុយោម៉ាស៊ីនត្រជាក់ រួមជាមួយសម្ភារៈមួយចំនួន ដែលស្តុកទុកនៅលើដំបូលបានរងការខូចខាត។
ទាក់ទងនឹងការកើតមានអគ្គិភ័យនេះ នគរបាលបានឲ្យដឹងថា បណ្តាលមកពីបោះកន្ទុយបារីចោល បង្កឲ្យឆេះទុយោជ័រម៉ាស៊ីនត្រជាក់ ក្លាយជាអគ្គិភ័យតែម្តង ៕
ចែករំលែកព័តមាននេះ