រាជធានីភ្នំពេញ ៖ ក្មេងប្រុសចំនួន៥នាក់ បាននាំគ្នាទៅឡើងលើដើមឈើ រួចលោតលេងទឹកស្រះ ជម្រៅ១៥ម៉ែត្រ ហើយក៏ស្រាប់តែលង់លិចបាត់ទៅក្នុងទឹកម្នាក់ ខណៈនោះ អ្នកភូមិបាននាំគ្នាចុះរាវរកដែរ ប៉ុន្តែរកមិនឃើញសោះ។…
រាជធានីភ្នំពេញ ៖ ក្មេងប្រុសចំនួន៥នាក់ បាននាំគ្នាទៅឡើងលើដើមឈើ រួចលោតលេងទឹកស្រះ ជម្រៅ១៥ម៉ែត្រ ហើយក៏ស្រាប់តែលង់លិចបាត់ទៅក្នុងទឹកម្នាក់ ខណៈនោះ អ្នកភូមិបាននាំគ្នាចុះរាវរកដែរ ប៉ុន្តែរកមិនឃើញសោះ។ បន្ទាប់មក ក៏បានទាក់ទងទៅកាន់ក្រុមរុករក និងសង្គ្រោះរបស់កងពលតូចទ័ពពិសេសឆ័ត្រយោងលេខ៩១១ ឲ្យជួយរាវរក ក៏នៅតែរកមិនឃើញទៀត លុះរយៈពេល២យប់២ថ្ងៃ ទើបឃើញសពអណ្ដែតទឹក ។
ហេតុការណ៍នោះបានកើតឡើង បង្កឲ្យមានការភ្ញាក់ផ្អើល កាលពីវេលាម៉ោងជាង៥ល្ងាច ថ្ងៃទី១៤ ខែសីហា ឆ្នាំ២០២៥ ហើយស្រះទឹកនោះមានជម្រៅ១៥ម៉ែត្រ មានរបងកម្ពស់ជិត២ម៉ែត្រព័ទ្ធជុំវិញ មានទីតាំងស្ថិតនៅក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ក្មេងប្រុសរងគ្រោះខាងលើឈ្មោះ ព្រាប សុខគីរៈ ហៅវិទូ អាយុ១៦ឆ្នាំ ជាសិស្សថ្នាក់ទី៧ នៅសាលាអន្តរជាតិចោមចៅ ស្នាក់នៅបន្ទប់ផ្ទះជួល ស្ថិតនៅក្នុងភូមិកើតហេតុខាងលើនោះដែរ ។
បើតាមក្មេងប្រុសម្នាក់ឈ្មោះ ព្រាប សុខគារ៉ា ដែលត្រូវជាប្អូនប្រុសបង្កើតរបស់សព បាននិយាយថា កន្លងមកខ្លួន និងបងប្រុសព្រមទាំងមិត្តភក្ដិ ធ្លាប់បានទៅឡើងលើដើមឈើ រួចលោតទឹកស្រះនោះលេងជាបន្តបន្ទាប់មកហើយ មិនដែលមានបញ្ហាអ្វីនោះទេ ។ ដោយឡែកនៅវេលាល្ងាចថ្ងៃកើតហេតុ ខ្លួន និងបងប្រុសរួមទាំងមិត្តភក្ដិ សរុបមានគ្នា៥នាក់ បាននាំគ្នាទៅលេងទឹកស្រះខាងលើនោះទៀត ដោយឡើងដើមឈើលោតទឹកលេង ដូចរាល់ដងដែរ ។
ក្មេងប្រុសរូបនោះ បាននិយាយបន្តទៀតថា ខណៈពេលកំពុងតែលោតទឹកលេង ក៏ស្រាប់តែឃើញបងប្រុសរបស់ខ្លូនឈ្លក់ទឹក ហើយខ្លួនក៏បានចុះទៅជួយ ពេលនោះបងប្រុសបានស្រវាឱបខ្លួន ដែលជាប្អូនដែរ ប៉ុន្តែក្រោយមក ក៏បានលែងទៅវិញ រួចក៏បានលង់លិចបាត់ទៅក្នុងទឹកតែម្ដង។ បន្ទាប់មក ខ្លួនព្រមទាំងមិត្តភក្ដិបាននាំគ្នាឡើងគោក រួចរត់ទៅស្រែកប្រាប់អ្នកភូមិ ឲ្យជួយបង្កឲ្យមានការភ្ញាក់ផ្អើល ហើយអ្នកភូមិបាននាំគ្នាទៅជួយរារកបងប្រុសខ្លួនដែរ ប៉ុន្តែរាវរកមិនឃើញនោះឡើយ ហើយខ្លួនក៏បានរត់ទៅប្រាប់ឪពុកម្ដាយឲ្យពួកគាត់បានដឹងភ្លាមៗផងដែរ ។
សមត្ថកិច្ចបានប្រាប់ឲ្យដឹងថា ក្រោយពីរាវរកអត់ឃើញ នគរបាលប៉ុស្តិ៍ចោមចៅទី២ បានទាក់ទងទៅកាន់ក្រុមរុករក និងសង្គ្រោះរបស់កងពលតូចទ័ពពិសេសឆ័ត្រយោងលេខ៩១១ ឲ្យជួយរាវរកតាំងពីក្រោយពេលកើតហេតុ រហូតដល់ពេញថ្ងៃទី១៥ ខែសីហា ក៏នៅតែរកមិនឃើញទៀត លុះដល់វេលាម៉ោង០៤និង១០នាទីជិតភ្លឺ ថ្ងៃទី១៦ ខែសីហា ឆ្នាំ២០២៥ ទើបស.ពក្មេងប្រុសរូបនោះអណ្ដែតទឹក។
បន្ទាប់មក នគរបាលការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ចុះទៅពិនិត្យកោសល្យវិច័យ ហើយរកឃើញថា ក្មេងប្រុសនោះពិតជាស្លាប់ដោយលង់ទឹកប្រាកដមែន រួចប្រគល់សពជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ