ទីក្រុងវ៉ាស៊ីនតោន៖ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថាលោកនឹងធ្វើដំណើរទៅទីក្រុងវ៉ាស៊ីននៅថ្ងៃចន្ទសប្ដាហ៍ក្រោយដើម្បីពិភាក្សាជាមួយលោកត្រាំ។ គម្រោងជួបគ្នាលើកនេះធ្វើឡើងក្រោយជំនួបកំពូលត្រាំ-ពូទីននៅអាឡាស់ស្កា។ បន្ទាប់ពីជួបគ្នាជិតបីម៉ោង លោកទាំងពីរមិនទាន់ឯកភាពគ្នាទាំងស្រុងនៅឡើយទេ។ ជាពិសេសចំណុចសំខាន់ៗ។
លោកហ្សេឡិនស្គីបានបង្ហោះសារនៅលើបណ្ដាញអ៊ិចថានៅថ្ងៃចន្ទ លោកនឹងជួបលោកត្រាំនៅវ៉ាស៊ីនតោនដើម្បីពិភាក្សាគ្នាលម្អិតថាតើត្រូវរកច្រកតាមផ្លូវណាដើម្បីបញ្ចប់សង្គ្រាម និងការកាប់សម្លាប់គ្នា។ លោកសូមអរគុណលោកត្រាំដែលផ្ដល់ឱកាសឱ្យលោកចូលរួមពិភាក្សា។ លោកហ្សេឡិនស្គីបានហៅទូរស័ព្ទទៅលោកត្រាំនៅថ្ងៃសៅរ៍នេះរយៈពេលជាង១ម៉ោងកន្លះ។ បន្ទាប់ពីលោកទាំង២សន្ទនាគ្នាបាន១ម៉ោង ពួកអឺរ៉ុប និងណាតូក៏ចូលរួមនៅក្នុងការសន្ទនាគ្នាពីចម្ងាយនោះផងដែរ។
លោកយល់ថាវាជារឿងសំខាន់ណាស់ដែលត្រូវមានជំនួបកំពូលត្រីភាគីរវាងរូបលោកជាមួយលោកត្រាំ និងលោកពូទីនដើម្បីរកវិធីបញ្ចប់សង្គ្រាម។ តាមមើលទៅ លោកត្រាំក៏ប្រាថ្នាចង់បានការជួបគ្នាត្រីភាគីផងដែរ។ តាមចិត្តរបស់លោក លោកចង់ឱ្យមានកិច្ចជំនួបតតួគ្នា២នាក់រវាងលោកពូទីន និងលោកហ្សេឡិនស្គីផង។ នៅដំណាក់កាលចុងក្រោយនេះ លោកត្រាំទទួលស្គាល់ថាបញ្ហាបូរណភាពទឹកដីមិនគួរលោកហ៊ានអារកាត់ជំនួសអ៊ុយក្រែនដែលជាម្ចាស់ទឹកម្ចាស់ដីនោះទេ
ថ្មីៗនេះ លោកថ្លែងថាលោកនឹងទុកលទ្ធភាពជូនអ៊ុយក្រែនជាអ្នកសម្រេចដោយខ្លួនឯងចុះ។ លោកគ្រាន់តែជាអ្នកសម្របសម្រួលបញ្ហាតែប៉ុណ្ណោះ។ លោកត្រាំនៅតែគិតថាការជួបគ្នានៅអាឡាស់ស្កាកាលពីយប់មិញទទួលបានជោគជ័យ។ ការជួបគ្នានោះត្រូវលោកឱ្យពិន្ទុដប់លើដប់។ នៅលើបណ្ដាញអ៊ិច លោកហ្សេឡិនស្គីសរសេររៀបរាប់ថាបញ្ហាធំទាល់តែថ្នាក់ដឹកនាំកំពូលទើបហ៊ានអារកាត់បាន។
ហេតុដូច្នេះ លោកយល់ថាគួរណាស់រៀបចំគម្រោងជួបគ្នាត្រីភាគីដែលលោកចាត់ទុកជាការស័ក្ដិសមបំផុត។ មេដឹកនាំអ៊ុយក្រែនរូបនេះយល់ថាគេត្រូវតែចារិកទុកនៅក្នុងកិច្ចព្រមព្រៀងសន្តិភាពនូវការធានាសន្តិសុខជាតិសម្រាប់អ៊ុយក្រែន។ លោកអះអាងថាទាល់តែធ្វើដូច្នេះទើបអាចទប់ស្កាត់ការវាយប្រហាររបស់រុស្ស៊ីនាពេលអនាគត៕
ចែករំលែកព័តមាននេះ