ទីក្រុងវ៉ាស៊ីនតោន៖ ការជួបគ្នាកម្រិតកំពូលរវាងលោកត្រាំ និងលោកពូទីនបានបិទបញ្ចប់ហើយកាលពីយប់មិញបន្ទាប់ពីអស់លោកទាំង២ជួបគ្នាជិតបីម៉ោង ប៉ុន្តែមិនអាចសម្រេចបានសាច់ការគួរឱ្យកត់សម្គាល់នោះទេ។ មានន័យថាកិច្ចជំនួបនេះគ្មានលទ្ធផលអ្វីទាំងអស់។ លោកត្រាំនិយាយបែបភាសាការទូតថាភាគីទាំង២បានឯកភាពគ្នាទៅលើចំណុចជាច្រើន និងនៅសល់តែចំណុចបន្តិចបន្តួចតែប៉ុណ្ណោះដែលមិនទាន់ឯកភាព។ លោកថាចំណុចដែលមិនទាន់ឯកភាពនោះចំណុចខ្លះមានសារៈសំខាន់ជាទីបំផុត និងចំណុចខ្លះមិនសូវសំខាន់ពេកទេ។ សម្រេចសម្រួចនៅទីបញ្ចប់ កិច្ចជំនួបនេះគឺគ្មានលទ្ធផល។
លោកត្រាំថាកិច្ចជំនួបជាមួយលោកពូទីនមិនអាចសម្រេចបានកិច្ចព្រមព្រៀងអ្វីទេ។ ប៉ុន្តែលោកអះអាងថាកិច្ចជំនួបនេះនិយាយរឿងសាច់ការបានច្រើន។ លោកទាំង២គ្រាន់តែជម្រាបជូនដោយសង្ខេបថាការចរចារីកចម្រើនទៅមុខ។ ប៉ុន្តែគ្មានការធ្វើអត្ថាធិប្បាយ ឬការទទួលសំណួរពីអ្នកសារព័ត៌មានឡើយ។ គេមិនទាន់ដឹងច្បាស់ថាតើក្រោយកិច្ចជំនួបនេះរុស្ស៊ី និងអ៊ុយក្រែនអាចនឹងឈានដល់បទឈប់បាញ់ដែរឬទេ។ ជាការផ្ដាំផ្ញើដោយសង្ខេប លោកពូទីនរំពឹងថាអ៊ុយក្រែន និងអឺរ៉ុបនឹងទទួលយកលទ្ធផលជួបគ្នាលើកនេះដោយស្ថាបនា ហើយនឹងមិនរំខានការចរចាដែលកំពុងមានដំណើរការទៅមុខនោះទេ។
សម្រាប់លោកពូទីន ជំនួបកំពូលលើកនេះជួយគាត់បានច្រើនណាស់។ ទោះបីចេញលទ្ធផលបែបណាក្ដី ប៉ុន្តែជំនួបនេះជាសញ្ញាបង្ហាញថាគាត់កំពុងមានជ័យជម្នះ។ លោកពូទីនអាចឆ្លៀតឱកាសពីជំនួបលើកនេះដើម្បីជាសារនយោបាយប្រាប់ពិភពលោក ជាពិសេស ក្រុមបស្ចិមប្រទេសថាពួកគេខិតខំប្រើ «យុទ្ធសាស្ត្រដាក់ឱ្យនៅឯកោ» ទៅលើរូបលោក និងប្រទេសរបស់លោកមិនបានជោគជ័យទេ។
លោកត្រាំសង្ឃឹមថាការរំលត់ភ្លើងសង្គ្រាមអ៊ុយក្រែននឹងនាំយកសន្តិភាពសម្រាប់តំបន់នោះ និងក៏ជួយលើកមុខមាត់របស់គាត់ដែលចង់បានឈ្មោះជាអ្នកស្វែងរកសន្តិភាព។ លោកប្រកាសជាចំហថាគោលបំណងនៃការជួបគ្នានេះដើម្បីបញ្ឈប់ការប្រយុទ្ធគ្នា និងជំរុញឱ្យលោកពូទីនត្រៀមជួបគ្នាជាមួយលោកហ្សេឡិនស្គីដើម្បីបញ្ចប់សង្គ្រាម។ កាលពីមុននេះ លោកហ្សេឡិនស្គី និងអឺរ៉ុបបារម្ភថាលោកត្រាំអាចនឹងនិយាយអន្តនោម័តតែ២នាក់លោកពូទីន ហើយកាត់ដីអ៊ុយក្រែនទាំងដុំៗទៅឱ្យរុស្ស៊ី។
ដើម្បីឱ្យអស់សង្ស័យ លោកត្រាំមុននឹងឡើងជិះយន្តហោះអ៊ែហ្វោះវាន់ (Air Force One) លោកថាការសម្រេចចិត្តនៅក្នុងបញ្ហាបូរណភាពទឹកដីរបស់អ៊ុយក្រែនជាសិទ្ធិសម្រេចរបស់អ៊ុយក្រែន។ លោកបញ្ជាក់ថាលោកមកទីនេះមិនមែនចរចាគ្នាជំនួសមុខឱ្យអ៊ុយក្រែននោះទេ។ លោកគ្រាន់តែជាអ្នកសម្របសម្រួលគ្នាដើម្បីនាំយកលោកពូទីន និងលោកហ្សេឡិនស្គីអង្គុយនៅតុចរចា។ ខាងលើនេះជាការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ