ខេត្តកំពង់ស្ពឺ ៖ រថយន្តដឹកឈើមួយគ្រឿង ដែលគេស្គាល់ច្បាស់ថា ជារបស់ថៅម្នាក់ចាស់វស្សា
(រកស៊ីយូរហើយ) ត្រូវបានជំនាញផ្នែករដ្ឋបាលព្រៃឈើស្រុកឱរ៉ាល់បង្ក្រាបបាន ខណៈដែលថៅកែឈើរូបនោះដឹកជញ្ជូនបទល្មើសព្រៃឈើចេញពីតំបន់ជាំ ក្នុងដែនជម្រកសត្វព្រៃភ្នំឱរ៉ាល់ ដែលគ្រប់គ្រងដោយមន្ទីរបរិស្ថានខេត្តកំពង់ស្ពឺ ក្រោមការអភិរក្សរបស់ក្រសួងបរិស្ថានផងដែរ។
ការបង្ក្រាបរថយន្តដឹកឈើរបស់ថៅកែចាស់វស្សាពីសំណាក់មេព្រៃស្រុកឱរ៉ាល់ធ្វើឡើង កាលពីយប់ថ្ងៃទី១៣ ខែសីហា ឆ្នាំ២០២៥ នៅតាមបណ្តោយផ្លូវជាតិលេខ៤៤ ក្នុងឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
លោក យឹម ណន ប្រធានមន្ទីរកសិកម្មរុក្ខាប្រម៉ាញ់និងនេសាទ ខេត្តកំពង់ស្ពឺបានប្រាប់ឱ្យដឹងថា មន្ត្រីរបស់លោកពិតជាបានធ្វើការបង្ក្រាបរថយន្តដឹកឈើមែន។ នៅមុនពេលបង្ក្រាបរថយន្តដឹកឈើខាងលើនេះបាន គឺផ្នែករដ្ឋបាលព្រៃឈើឱរ៉ាល់ និងសង្កាត់រដ្ឋបាលព្រៃឈើសង្កែសាទប ចុះល្បាតតាមបណ្តោយផ្លូវជាតិលេខ៤៤ ក៏បានប្រទះឃើញរថយន្តដឹកឈើមួយគ្រឿងម៉ាក ត្រូពិច ពណ៌ទឹកប្រាក់ ពាក់ស្លាកលេខ ភ្នំពេញ 2K-5161 ពេលឃើញដូចនោះ មន្ត្រីរដ្ឋបាលព្រៃឈើបានធ្វើការឃាត់ ឆែកឆេរមើល ក៏ឃើញមានផ្ទុកឈើជ្រុងចំនួន០៤កំណាត់ ស្មើនឹង០៣ម៉ែត្រត្រីគុណ៤១០ ដោយគ្មានលិខិតអនុញ្ញាតដឹកជញ្ជូនពីរដ្ឋបាលព្រៃឈើ នោះឡើយ។
លោក យឹម ណន ប្រធានមន្ទីរកសិកម្មខេត្តកំពង់ស្ពឺបានបន្តថា ក្រោយធ្វើការវាស់វែង រថយន្តដឹកឈើខាងលើ រួមជាមួយវត្ថុតាង(ឈើឃ្លុំ) មន្ត្រីជំនាញបានអូសយកទៅរក្សាទុកនៅស្នាក់ការសង្កាត់រដ្ឋបាលព្រៃឈើសង្កែសាទប រង់ចាំកសាងសំណុំរឿងចាត់ការបន្តតាមផ្លូវច្បាប់ស្តីពីរដ្ឋបាលព្រៃឈើ។
ប្រភពព័ត៌មានបានបង្ហើបឱ្យដឹងថា រថយន្តដឹកឈើម៉ាកត្រូពិចដែលមេព្រៃបង្ក្រាបបាននេះ ជារបស់ថៅកែចាស់វស្សា ឈ្មោះ ថៅកែ ទូច អាយុជាង៥០ឆ្នាំ រស់នៅម្តុំប្រឡាយច្បារមន ក្នុងសង្កាត់ច្បារមន ក្រុងច្បារមន ខេត្តកំពង់ស្ពឺ។ ថៅកែ ទូច នេះល្បីឈ្មោះបោះសម្លេងរាប់ឆ្នាំមកហើយ រឿងដឹកជញ្ជូនបទល្មើសព្រៃឈើនេះ។
ប្រភពព័ត៌មានដដែលបានបង្ហើបទៀតថា ថៅកែចាស់វស្សា ឈ្មោះ ទូច នេះបានទៅលើកឈើពីឈ្មោះ សេង អាយុជាង៣០ឆ្នាំ មុខរបរជាងជួសជុលម៉ូតូ និង ដើរប្រមូលទិញឈើពីអ្នកដែលកាប់ឈើដឹកចេញពីព្រៃស្តុក នៅម្តុំខាងលិចផ្សារជាំ ក្នុងឃុំតាសាល ស្រុកឱរ៉ាល់ ហើយលក់ឱ្យថៅកែ ទូច នេះរហូត ឆ្លងកាត់ស្នាក់ការរងបរិស្ថានជាំ ឆ្លងកាត់ស្នាក់ការបរិស្ថានខាងត្បូងបឹងទន្លេសាប និងស្នាក់ការធំរបស់ដែនជម្រកសត្វព្រៃភ្នំឱរ៉ាល់ ដែលមានលោក ស៊ុន សុខលាង ជាប្រធានការិយាល័យដែនជម្រកសត្វព្រៃភ្នំឱរ៉ាល់ផងដែរ ទើបមន្ត្រីរដ្ឋបាលព្រៃឈើស្រុកឱរ៉ាល់បង្ក្រាបបានតែម្តង៕
ចែករំលែកព័តមាននេះ