ខេត្តត្បូងឃ្មុំ ៖ កោះ២ គឺជាកោះមួយដែលដុះដោយធម្មជាតិនៅកណ្ដាលទន្លេមេគង្គមានទឹកព័ទ្ធជុំវិញទាំងរដូវប្រាំង និងវស្សា ។ ជាមួយនោះ មានប្រជាពលរដ្ឋរស់នៅចំនួន៦១៥គ្រួសារ ស្មើនឹងជាង២៤០០នាក់ មិនដែលជួបនិងបញ្ហាគ្រោះធម្មជាតិនោះទេ…
ខេត្តត្បូងឃ្មុំ ៖ កោះ២ គឺជាកោះមួយដែលដុះដោយធម្មជាតិនៅកណ្ដាលទន្លេមេគង្គមានទឹកព័ទ្ធជុំវិញទាំងរដូវប្រាំង និងវស្សា ។ ជាមួយនោះ មានប្រជាពលរដ្ឋរស់នៅចំនួន៦១៥គ្រួសារ ស្មើនឹងជាង២៤០០នាក់ មិនដែលជួបនិងបញ្ហាគ្រោះធម្មជាតិនោះទេ ។ ទើបតែមកដល់រដូវវស្សានេះដោយសារតែចរន្តទឹកហូបខ្លាំង ជាហេតុបណ្ដាលឱ្យបាក់ច្រាំងប្រវែងជាង១០០០ម៉ែត្រ និងបានចូលជម្រៅ៥ម៉ែត្រ ទៅដល់៤០ម៉ែត្រ ធ្វើឱ្យមានការព្រួយបារម្ភ ជាមួយនោះគេឃើញវត្តមានលោកសយ ទូច អភិបាលស្រុកក្រូចឆ្មារបានចុះពិនិត្យដោយផ្ទាល់តែម្ដង ។
លោកខូវ អ៊ មេឃុំកោះ២ មានប្រសាសន៍ឲ្យដឹង កាលពីល្ងាចថ្ងៃទី១៥ សីហា ឆ្នាំ២០២៥ថា គ្រោះធម្មជាតិបាក់ច្រាំងទន្លេបានចាប់ផ្ដើមកើតឡើង នៅថ្ងៃទី១៤ សីហា ដោយបានបាក់តិចៗ ហើយមកដល់ព្រឹកថ្ងៃទី១៥ សីហា ឆ្នាំ២០២៥ គឺទឹកបានហូរច្រោះបាក់ផ្លូវបេតុងប្រវែង២០ម៉ែត្រ ដែលព្រះសង្ឃជាអ្នកសាងសង់ សម្រាប់ពុទ្ធបរិស័ទ និងប្រជាពលរដ្ឋងាយស្រួលធ្វើដំណើរពីចំណុចកំពុងដរកោះត្រែង ឆ្លងទៅក្រូចសើច ត្រើយម្ខាងទៀតក្នុងស្រុកកំពង់សៀម ខេត្តកំពង់ចាម។
មេឃុំកោះ២មានប្រសាសន៍បន្តថា ចាប់តាំងពីក្រោយឆ្នាំ១៩៧៩ មកដល់ឆ្នាំ២០២៣ ឃុំកោះ២ ទាំងមូល មានបណ្ដោយប្រវែងជាង១០០០ម៉ែត្រ មិនដែលជួបនិងគ្រោះធម្មជាតិបាក់ច្រាំងទន្លេម្ដងណាឡើយ ទើបតែមកដល់ឆ្នាំ២០២៤ និង២០២៥ នេះ កោះត្រែងបាក់ច្រាំងជាង១០០០ម៉ែត្រកន្លែងខ្លះជម្រៅដល់៤០ម៉ែត្រ កំពុងយារយីលំនៅឋានពលរដ្ឋច្រាំងទន្លេ បានបាក់ស្រុតកត្តានេះត្រូវបានរូបលោកសន្និដ្ឋានថា មកពីដុះខ្សាច់នៅក្បាលជ្រោយ ជាហេតុធ្វើឲ្យចរន្តទឹកហូរមកបុកចំច្រាំងទន្លេជាហេតុបណ្ដាលឲ្យបាក់បន្តបន្ទាប់មានចំនួន៤ កន្លែងស្មើនឹងជាង១០០០ម៉ែត្រគឺច្រាំងចាប់ផ្ដើមបាក់នៅវេលាម៉ោង៨ និង២០នាទីព្រឹកបន្តរហូតដល់ល្ងាចបានបាក់ជម្រៅចូលប្រហែល៤០ម៉ែត្រ នៅសល់ប្រវែង១០ម៉ែត្រទៀតនឹងដល់បង្គោលភ្លើងអគ្គិសនី។
ជាមួយគ្នានោះ កម្លាំងអគ្គិសនីក៏បានត្រៀមលក្ខណៈសម្បត្តិរួចរាល់ ដើម្បីនិងអន្តរាគមន៍ធ្វើយ៉ាងណា ដោយនាំគ្នារូបខ្សែភ្លើងចេញដើម្បីបង្ការកុំឲ្យបាក់ដោយទាំងខ្សែភ្លើងហើយបង្កគ្រោះថ្នាក់ជាយថៈហេតុណាមួយ។ លោកមេឃុំបានច្រើនរំលឹកថា ចាប់តាំងពីក្រោយថ្ងៃរំដោះ១៩៧៩ មកដល់បច្ចុប្បន្នប្រជាពលរដ្ឋប្រុសស្រីរស់នៅលើកោះនេះអាស្រ័យផលធ្វើស្រែចំការពិសេសគឺក្រូចថ្លុងកោះ២ ដែលមានរសជាតិឆ្ងាញ់ដែលមានកើនដល់ជាង ៦០០គ្រួសារ។
ក្រោយពីរូបលោកបានរាយការណ៍ជូនទៅថ្នាក់លើ ត្រូវបានលោកអភិបាលស្រុកក្រូចឆ្មារចុះមកពិនិត្យដោយផ្ទាល់នៅថ្ងៃទី១៥ សីហា រហូតដល់ពេលល្ងាចមិនទាន់ត្រឡប់ទៅវិញនោះទេ កំពុងតែតាមដានមើលពីស្ថានភាពគ្រោះធម្មជាតិបាក់ច្រើនទន្លេនេះ។
សូមបញ្ជាក់ថា លំនៅឋានរបស់ប្រជាពលរដ្ឋមួយខ្នងសង់អំពីឈើដែលមានទំហំ៥គុណ៨ ម៉ែត្ររបស់ឈ្មោះប៊ុន ឡេង ភេទប្រុស អាយុ៦០ឆ្នាំ ត្រូវបានរុះទាន់ពេលលុះពេលស្អែកឡើង ក៏ស្រាប់តែបាក់ច្រាំងមុខដល់ផ្ទះតែម្ដង ។
ដោយឡែក លំនៅឋានប្រជាពលរដ្ឋផ្សេងទៀត មិនទាន់រងផលប៉ះពាល់នោះទេ ដោយសារច្រាំងទន្លេនៅរៀងឆ្ងាយ តែអាជ្ញាធរបានត្រៀមលក្ខណៈសម្បត្តិគ្រប់យ៉ាងដើម្បីជួយអន្តរាគមន៍ដល់ប្រជាពលរដ្ឋ ។
ចែករំលែកព័តមាននេះ