ខេត្តស្ទឹងត្រែង ៖ ច្រកអន្តរជាតិត្រពាំងគ្រៀលកម្ពុជា-ណងណុកខៀនឡាវ ចាប់តាំងពីខែកក្តដា
រហូតមកនេះ គេសង្កេតឃើញមានការកើនឡើងនូវរថយន្តខ្នាតធំឆ្លងកាត់ពីប្រទេសឡាវមកកាន់កម្ពុជា ក្រោយច្រកទ្វារអន្តរជាតិមួយនេះស្ងប់ស្ងាត់ប្រមាណជាជិត៧ឆ្នាំដោយសារវិបត្តិនៃជំងឺកូវីដ១៩រីករាលដាលជាសកល ។
ច្រកទ្វារអន្តរជាតិត្រពាំងគ្រៀលក្នុងខេត្តស្ទឹងត្រែង មានសក្តានុពលអំណោយផលចំពោះប្រទេសឡាវ និងប្រទេសចិន គឺតែងមានការទំនាក់ទំនងល្អ រួមគ្នាចំបងលើវិស័យសេដ្ឋកិច្ច និងទេសចរណ៍។បន្ទាប់វិបត្តិនៃជំងឺកូវីដ១៩រីករាលដាលជាសកលរដ្ឋាភិបាលរវាងប្រទេសនិងប្រទេសបានបង្ខំអោយមានការបិតខ្ទប់ច្រកទ្វាររាងខ្លួនក្នុងគោលបំណងបង្ការទប់ស្កាត់ជំងឺឆ្លងដ៏កាចសាហាវ ។
ច្រកទ្វារអន្តរជាតិនេះ ក៏បន្តស្ងាត់ជ្រងំចាប់ពីឆ្នាំ២០១៩ រហូតដល់ឆ្នាំ២០២៥ បើទោះបីជំងឺកូវីដ១៩ បានធូរស្រាលក្តី ។ ភាពតានតឹងរវាងកម្ពុជា-ថៃបានកើតឡើងច្រកព្រំដែនកម្ពុជា-ថៃទាំងអស់ត្រូវបានបិទដោយឯកតោភាគីថៃ ទើបកំឡុងខែកក្តដា២០២៥មានការដោះដូរទំនិញចម្រុះរួមទាំងការនាំសត្វឆ្លងកាត់ច្រកទ្ចារអន្តរជាតិណងណុកខៀនប្រទេសឡាវចូលមកកម្ពុជាតាមច្រកទ្វារអន្តរជាតិត្រពាំងគ្រៀល។
ប្រធានគយ និងរដ្ឋាករប្រចាំច្រកទ្វារអន្តរជាតិត្រពាំងគ្រៀលកម្ពុជាលោក នៅ គង់ បានបញ្ជាក់ថា រាល់ដោះដូរទំនិញឆ្លងកាត់ច្រក គឺមានការត្រួតពិនិត្យច្បាស់លាស់លើឯកសារច្បាប់ និងបង់ពន្ធគយត្រឹមត្រូវលើកលែងតែមុខទំនិញដែលរាជរដ្ឋាភិបាលហាមឃាត់ដូចជាបន្លែនិងផ្លែឈើ ប្រេងឥន្ធនៈនិងឧស្ម័ន ។
លោកបន្តថា យើងបានអនុវត្តទៅតាមគោលការណ៍ណែនាំរាជរដ្ឋាភិបាលនិងអគ្គនាយកដ្ឋានគយនិងរដ្ឋាករ ហើយរាល់ទំនិញដែលឆ្លងកាត់នេះគឺបានបង់ពន្ធសួយសារជូនគាត់ត្រឹមត្រូវ និងមិនអាចគេចវេសពីការបង់ពន្ធអ្វីនោះដែរ ។
ពាក់ព័ន្ធទៅនឹងការនាំចូលសត្វមានដូចជាគោ ក្របី តំណាងក្រុមហ៊ុនរតនៈសិន បានបញ្ជាក់ថា៖ ការនាំចូលនេះ ក្រុមហ៊ុនបានអនុវត្តតាមគោលការណ៍ច្បាប់ច្បាស់លាស់ ដោយបានឆ្លងកាត់គយ និងរដ្ឋាករអង្គភាពពាក់ព័ន្ធប្រចាំច្រកទ្ចារ និងការត្រួតពិនិត្យផ្ទាល់ពីបសុព្យាបាលសត្វនៃមន្ទីរកសិកម្មរុក្ខាប្រមាញ់ និងនេសាទផងដែរ។
ពាក់ព័ន្ធទៅនឹងតំបន់ច្រកទ្វារអន្តរជាតិត្រពាំងគ្រៀលយើងសង្កេតឃើញថា ប្រជាពលរដ្ឋរស់នៅក្នុងតំបន់នោះ ហាក់មានការសប្បាយចិត្តយ៉ាងខ្លាំង ខណៈសេដ្ឋកិច្ចច្រកទ្វារបានដំណើរការឡើងវិញ មានការអ៊ូអរលក់ដូរប្រកបអាជីវកម្មប្រសើរឡើងផងដែរ ៕
ចែករំលែកព័តមាននេះ