ស្ថានភាពទឹកជំនន់ស្ទឹងភ្នំគូលែនបានស្រកបណ្តើរៗអស់វិញហើយ
- សៀមរាប
ខេត្តសៀមរាប ៖ លោក អៀង ពិសិដ្ឋ អភិបាលស្រុកស្វាយលើ បានប្រាប់ភ្នាក់ងារកោះសន្តិភាពតាមតេឡេក្រាម កាលពីវេលាម៉ោង៨និង៣០នាទីយប់ថ្ងៃទី១៦ ខែកញ្ញា ឆ្នាំ២០២៥…
ខេត្តសៀមរាប ៖ លោក អៀង ពិសិដ្ឋ អភិបាលស្រុកស្វាយលើ បានប្រាប់ភ្នាក់ងារកោះសន្តិភាពតាមតេឡេក្រាម កាលពីវេលាម៉ោង៨និង៣០នាទីយប់ថ្ងៃទី១៦ ខែកញ្ញា ឆ្នាំ២០២៥ ថា ស្ថានភាពទឹកនៅស្ទឹងភ្នំគូលែន បានស្រកបណ្តើរៗហើយ ដែលនៅវេលាម៉ោង៩ព្រឹកថ្ងៃទី១៦ ខែកញ្ញា ឆ្នាំ២០២៥ នៅសល់ទឹកតែកន្លែងលិង្គ ១ ០០០ ដែលមិនទាន់ស្រកអស់នៅឡើយ ។
ការជន់លិចនេះ ដោយសារមានភ្លៀងធ្លាក់ខ្លាំងជាប់ៗគ្នារយៈពេល២ថ្ងៃ គឺថ្ងៃទី១៤ និងទី១៥ ខែកញ្ញា ឆ្នាំ២០២៥ ទើបបណ្តាលឱ្យលិចផ្លូវបេតុង និងដល់តូបលក់ដូររបស់បងប្អូនអាជីវករលើខ្នងភ្នំគូលែន និងធ្វើឱ្យប៉ះពាល់ដល់ផលដំណាំ ព្រមទាំងផ្ទះសម្បែងរបស់បងប្អូនប្រជាពលរដ្ឋផងដែរ ។
លោកអភិបាលស្រុកបញ្ជាក់ថា ពាក់ព័ន្ធនឹងស្ថានភាពទឹកនៅទីនេះ គឺបានស្រកពិតមែន តែទឹកនៅផ្នែកអូរខាងលើនៅមិនទាន់ស្រកនៅឡើយទេ ព្រោះវានៅហូរធ្លាក់មកពីតំបន់ទឹកធ្លាក់ និងតំបន់លិង្គ ១ ០០០ នេះ ។ ដើម្បីបង្ការគ្រោះថ្នាក់ជាយថាហេតុណាមួយ គឺការចុះលេងទឹក មិនទាន់អនុញ្ញាតឱ្យបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ ចុះលេងទឹកបាននៅឡើយទេ ។
លោកអភិបាលស្រុកបន្ថែមទៀតថា ចំពោះកន្លែងលក់ដូរ ខ្យូសអង្គុយទទួលទានអាហារនោះ លោកបានអនុញ្ញាតឱ្យបើកដំណើរការលក់ដូរធម្មតាវិញហើយ ។ ក្រោយពេលទឹកជំនន់ជន់ចូលកាលពីថ្ងៃទី១៥ ខែកញ្ញា ឆ្នាំ២០២៥ រហូតមកដល់ព្រឹកថ្ងៃទី១៦ ខែកញ្ញា ឆ្នាំ២០២៥ ទឹកបានស្រកមកកម្រិតធម្មតាវិញហើយ ដោយសារពុំមានភ្លៀងនៅផ្នែកខាងលើ ហើយមានផលប៉ះពាល់មួយចំនួននៅតំបន់បេតិកភណ្ឌ បណ្តាលឱ្យច្រោះដីតាមមាត់ស្ទឹង ដែលជាកន្លែងភ្ញៀវទស្សនា ធ្វើឱ្យដួលបាក់បង្គោលដាច់ខ្សែ ទើបលោកចាត់ក្រុមការងារភ្នាក់ងារអភិរក្សតាមប្រាសាទ ឱ្យរៀបចំឡើងឱ្យមានសោភ័ណភាពល្អប្រសើរឡើងវិញ នេះត្រង់ចំណុចសិវលិង្គធំមួយ ។
សូមបញ្ជាក់ថា ករណីទឹកលិចលង់នៅលើខ្នងភ្នំគូលែន ដែលមានភ្លៀងធ្លាក់ខ្លាំងជាប់ៗគ្នា គឺស្ថានភាពបែបនេះរយៈពេល៣ទៅ៥ឆ្នាំ ទើបមានលិចលង់ម្តង តែក៏មិនមានលិចខ្លាំងដូចឆ្នាំនេះដែរ ដែលធ្វើឱ្យមានការភ្ញាក់ផ្អើលរឿងទឹកជន់លិចលើភ្នំគូលែន ៕
ចែករំលែកព័តមាននេះ