សហរដ្ឋអាមេរិក ៖ រដ្ឋមន្ត្រីក្រសួងរតនាគារអាមេរិក លោក Scott Bessent បានបង្ហាញទំនុកចិត្តថា សហរដ្ឋអាមេរិកជិតឈានទៅរកការសម្រេចបានកិច្ចព្រមព្រៀងពាណិជ្ជកម្មជាមួយនឹងប្រទេសចិន។នៅក្នុងបទសម្ភាសន៍មួយនៅស្ថានីយទូរទស្សន៍ CNBC លោក…
សហរដ្ឋអាមេរិក ៖ រដ្ឋមន្ត្រីក្រសួងរតនាគារអាមេរិក លោក Scott Bessent បានបង្ហាញទំនុកចិត្តថា សហរដ្ឋអាមេរិកជិតឈានទៅរកការសម្រេចបានកិច្ចព្រមព្រៀងពាណិជ្ជកម្មជាមួយនឹងប្រទេសចិន។
នៅក្នុងបទសម្ភាសន៍មួយនៅស្ថានីយទូរទស្សន៍ CNBC លោក Bessent បានរំពឹងថា អាមេរិក និងចិន នឹងមានការចរចាបន្ថែមទៀត មុនពេលពន្ធទៅវិញទៅមករវាងប្រទេសទាំងពីរ ដែលគ្រោងនឹងចូលជាធរមាននៅក្នុងខែវិច្ឆិកាខាងមុខចូលមកដល់។ លោកបានថ្លែងថា «យើងនឹងជួបគ្នាម្តងទៀត។ ការចរចារជុំនីមួយៗកាន់តែមានផលិតភាព ហើយប្រទេសចិនបានយល់ឃើញថា កិច្ចព្រមព្រៀងពាណិជ្ជកម្មអាចធ្វើទៅបាន»។
សេចក្តីថ្លែងការណ៍នេះកើតឡើង ចំពេលមានការវិវត្តន៍ដែលមិនអាចទាយទុកជាមុនបាន ក្នុងការចរចាពន្ធ ចាប់តាំងពីប្រធានាធិបតីអាមេរិក លោក ដូណាល់ ត្រាំ បានប្រកាសពន្ធបដិការជាបន្តបន្ទាប់ នៅថ្ងៃទី២ ខែមេសា ឆ្នាំ២០២៥ ជាផ្នែកមួយនៃផែនការរបស់លោកផ្តោតលើដៃគូពាណិជ្ជកម្មពិភពលោករបស់អាមេរិក។
នៅក្រោមសេចក្តីប្រកាសដំបូងពីអាមេរិក ប្រទេសចិនអាចប្រឈមមុខនឹងពន្ធរហូតដល់ ១៤៥%។ ប៉ុន្តែទោះជាយ៉ាងណាក៏ដោយ ការដាក់ពន្ធត្រូវបានពន្យារពេល អំឡុងពេលការចរចា ហើយការផ្អាកការអនុវត្តពន្ធនេះ ដែលដើមឡើយកំណត់ត្រឹមថ្ងៃទី១២ សីហា ក៏ត្រូវបានពន្យារពេលបន្តទៀតដោយលោក ត្រាំ រហូតដល់ថ្ងៃទី១០ ខែវិច្ឆិកា ទើបចូលជាធរមាន។
សូមជម្រាបថា សហរដ្ឋអាមេរិកមានឱនភាពពាណិជ្ជកម្មជិត ៣០០ពាន់លានដុល្លារជាមួយប្រទេសចិន កាលពីឆ្នាំមុន ដែលនោះកំពុងស្ថិតក្នុងការធ្លាក់ចុះយ៉ាងខ្លាំងនៅឆ្នាំនេះ ដោយគិតត្រឹមខែកក្កដា ឱនភាពពាណិជ្ជកម្មរវាងប្រទេសទាំងពីរមានចំនួន ១២៨ ពាន់លានដុល្លារ។
លោក Bessent បានកត់សម្គាល់ថា អ្នកតំណាងពាណិជ្ជកម្មអាមេរិក លោក Jamieson Greer បានរំពឹងថា ឱនភាពពាណិជ្ជកម្មរវាងប្រទេសទាំងពីរ នឹងបង្រួមតូចយ៉ាងហោចណាស់ ៣០% នៅឆ្នាំនេះ ហើយប្រហែលជាច្រើនជាងនេះ នៅឆ្នាំក្រោយ។ លោកបានបន្តទៀតថា ដូច្នេះគំនិតនៅទីនេះ គឺត្រូវចូលទៅក្នុងតុល្យភាពដើម្បីមានពាណិជ្ជកម្មរវាងគ្នាដោយយុត្តិធម៌៕ ប្រភព ៖ CNBC
ចែករំលែកព័តមាននេះ