គ្រឿងចក្រកាយស្តារស្ទឹងស្លា.ប់ ស្រាប់តែប្រទះឃើញពុទ្ធបដិមា
- កំពង់ធំ
ខេត្តកំពង់ធំ ៖ កាលពីព្រឹកថ្ងៃទី១៥ ខែសីហា ឆ្នាំ២០២៥ លោក ហ៊ិន សោភ័ណ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ធំ…
ខេត្តកំពង់ធំ ៖ កាលពីព្រឹកថ្ងៃទី១៥ ខែសីហា ឆ្នាំ២០២៥ លោក ហ៊ិន សោភ័ណ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ធំ និងក្រុមការងារការិយាល័យបេតិកភណ្ឌ សហការជាមួយការិយាល័យនគរបាលការពារបេតិកភណ្ឌ រដ្ឋបាលស្រុកសន្ទុក និងអធិការដ្ឋាននគរបាលស្រុកបានចុះពិនិត្យ និងវាយតម្លៃវត្ថុសិល្បៈរកឃើញថ្មីចំនួន១អង្គ នៅអធិការដ្ឋាននគរបាលស្រុកសន្ទុក។
លោកប្រធានមន្ទីរបានឱ្យដឹងថា រូបបដិមានេះ ត្រូវបានអ្នកបើកបរគ្រឿងចក្រម្នាក់ឈ្មោះ កាក់ ប៊ុនថន ប្រទះឃើញនៅត្រង់ចំណុចខាងលិចវត្តពង្រចម្ងាយប្រមាណជា២០០ម៉ែត្រ ក្នុងពេលប្រតិបត្តិការនៃការជីកកកាយស្តារស្ទឹងស្លាប់ កាលពីរសៀលថ្ងៃទី១៤ ខែសីហា ឆ្នាំ២០២៥ ស្ថិតនៅក្នុងភូមិជីមាឃ ឃុំកកោះ ស្រុកសន្ទុក ខេត្តកំពង់ធំ។
ក្រោយពីការត្រួតពិនិត្យចប់សព្វគ្រប់មក ជាលទ្ធផលបានបង្ហាញថា បដិមានេះធ្វើអំពីស្ពាន់ ដែលទំនងជារូបតំណាងនៃទេពក្នុងព្រះពុទ្ធសាសនានិកាយមហាយាន ដែលគេស្គាល់ព្រះនាមថា ព្រះពោធិសត្វ អវលោតិកេស្វរ (លោកេសូរ) ឬអាចជាព្រះពោធិសត្វមៃត្រេយ (សិអារ្យមេត្រិយ) ការសន្និដ្ឋាននេះ មិនប្រាកដទាំងស្រុងនោះទេ ដោយសារនៅលើរូបបដិមាអង្គមានការបាក់បែកនៅត្រង់ចំណុចថ្ងាស និងផ្នួងសក់ ដែលជាលក្ខណៈសម្គាល់អំពីទេពទាំងពីរនេះ តាមទម្រង់ព្រះភក្ត្រ និងសំពត់របស់ទេព បដិមានេះទំនងស្ថិតនៅក្នុងរចនាបថបាខែងក្នុង(គ.ស.៨៩៣ – ៩២៥) ក្នុងរជ្ជកាលព្រះបាទស្រីយសោវរ្ម័នទី១ ឬព្រះបាទស្រីហស៌វរ្ម័នទី១បន្ទាប់ពីបានទទួលរូបបដិមានេះ បានយកមករក្សាទុកនៅសារមន្ទីរខេត្តកំពង់ធំនៅព្រឹកថ្ងៃខែឆ្នាំដដែល។
ចែករំលែកព័តមាននេះ