ទីក្រុងឥស្លាមម៉ាបាត៖ ជារឿងដ៏គួរឱ្យសោកស្ដាយ ត្រឹមតែមួយប៉ប្រិចភ្នែកប៉ុណ្ណោះមនុស្សជាងបីរយនាក់ត្រូវបង់សង្ខារដោយសារគ្រោះទឹកជំនន់ និងការបាក់ដីនៅប្រទេសប៉ាគីស្ថានភាគពាយព្យ។ ហេតុការណ៍នេះកើតឡើងបន្ទាប់ពីមានភ្លៀងធ្លាក់ខ្លាំងរយៈពេល២ថ្ងៃជាប់គ្នាបង្កជាគ្រោះទឹកជំនន់ដែលហក់ឡើងយ៉ាងឆាប់រហ័ស និងហូរចាក់ទៅតំបន់ទំនាប។
ក្រុមអ្នកជួយសង្គ្រោះបន្តស្វែងរកមនុស្សរាប់សិបនាក់ទៀតដែលនៅបាត់ខ្លួននៅឡើយ។ ពួកគេត្រូវរើកកាយកម្ទេចកម្ទីដែលនៅរាយប៉ាយតាមផ្លូវធ្វើឱ្យរាំងស្ទះដល់ដំណើរការស្វែងរក។ ផ្នែកឧតុនិយមព្យាករថាភ្លៀងនឹងបន្តធ្លាក់ឥតដាច់គ្រាប់ទេរហូតដល់ថ្ងៃទី២១ ខែសីហា។ នៅតំបន់កើតហេតុនោះគេស្ដាប់ឮតែសំឡេងផ្គរ រន្ទះបាញ់ផូងផាំង ជំនន់ទឹកភ្លៀង បាក់ដី និងបាក់អគារទាំងផ្ទាំងៗ។
គិតត្រឹមព្រឹកថ្ងៃសៅរ៍ អាជ្ញាធរបូកសរុបតួលេខឃើញសាកសពដែលរកឃើញមានចំនួន៣០៧នាក់។ ក្រៅពីនេះមនុស្សបាត់ខ្លួនជាច្រើននាក់ទៀតនៅតំបន់ភ្នំ។ មិនមែនតែប៉ាគីស្ថានទេ ឥណ្ឌា និងណេប៉ាល់ក៏កំពុងតែមានបញ្ហាដូចគ្នា។ ស្រុកប៊ូណឺ (Buner) បើគិតពីការធ្វើដំណើររយៈពេលបីម៉ោងកន្លះពីរដ្ឋធានីឥស្លាមម៉ាបាត។ ទីនេះរងគ្រោះខ្លាំងជាងគេ និងមានអ្នកស្លាប់១៨៤នាក់។ ក្រៅពីនេះ ហេដ្ឋារចនាសម្ព័ន្ធជាច្រើនរងការខូចខាត, ដំណាំ និងចម្ការផ្លែឈើធំៗក៏រងការខូចខាតដូចគ្នា។
នៅតំបន់សាងខ្លា (Shangla) មានហេតុការណ៍បាក់ដំបូលអគារដោយសារភ្លៀងធ្លាក់ខ្លាំងពេកបណ្ដាលឱ្យស្លាប់មនុស្ស៣៤នាក់។ អាជ្ញាធរចាប់ផ្ដើមសាងសង់ជំរំជាច្រើនកន្លែងសម្រាប់ទទួលអ្នកភៀសខ្លួនពីគ្រោះទឹកជំនន់។ ឧបនាយករដ្ឋមន្ត្រីប៉ាគីស្ថានថ្លែងថាក្រុមអ្នកជួយសង្គ្រោះមកពីផ្នែកយោធា និងស៊ីវិលបន្តការងាររបស់ខ្លួនយ៉ាងញាប់ដៃញាប់ជើង។ ប៉ុន្តែគួរឱ្យស្ដាយឧត្ថម្ភាគចក្រជួយសង្គ្រោះមួយគ្រឿងបានធ្លាក់ដោយសារអាកាសធាតុអាក្រក់បណ្ដាលឱ្យស្លាប់មនុស្សប្រាំនាក់ដែលជិះនៅលើនោះ៕
ចែករំលែកព័តមាននេះ