រាជធានីភ្នំពេញ ៖ ក្រុមក្មេងទំនើងរហស្សនាម «ក្រោយវត្តហៅកាត់KV» ២នាក់ក្នុងចំណោមគ្នា៣៥នាក់ ត្រូវបានកម្លាំងនគរបាលខណ្ឌដង្កោ សហការជាមួយនគរបាលខេត្តកណ្ដាល ធ្វើការស្រាវជ្រោវឃាត់ខ្លួនបាន ក្រោយពីក្រុមនេះ ធ្វើសកម្មភាពព្រួតវាយទៅលើយុវជន២នាក់…
រាជធានីភ្នំពេញ ៖ ក្រុមក្មេងទំនើងរហស្សនាម «ក្រោយវត្តហៅកាត់KV» ២នាក់ក្នុងចំណោមគ្នា៣៥នាក់ ត្រូវបានកម្លាំងនគរបាលខណ្ឌដង្កោ សហការជាមួយនគរបាលខេត្តកណ្ដាល ធ្វើការស្រាវជ្រោវឃាត់ខ្លួនបាន ក្រោយពីក្រុមនេះ ធ្វើសកម្មភាពព្រួតវាយទៅលើយុវជន២នាក់ ។ ក្រោយពេលចាប់ខ្លួនយកទៅសួរនាំទើបដឹងថា ក្រុមក្មេងទំនើងខាងលើនេះមិនធម្មតាឡើយ ដោយកន្លងមកពួកនេះ តែងដើរបង្ករឿងប្រើហិង្សាវាយបង្ករបួសស្នាមទៅលើអ្នដទៃ វាយបំផ្លាញទ្រពសម្បត្តិអ្នកដទៃ ជាពិសេស ធ្លាប់ធាក់ប្លន់ម៉ូតូបានសម្រេចច្រើនលើកមកហើយ ។
ហេតុការណ៍នោះ បានកើតឡើងកាលពីវេលាម៉ោង០២ និង៤១នាទីរសៀលថ្ងៃទី១០ សីហា ឆ្នាំ២០២៥ នៅត្រង់ចំណុចខាងត្បួងមណ្ឌលប្រល័យពូជសាសន៍ជើងឯក តាមផ្លូវបេតុង ស្ថិតនៅក្នុងភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ។
ជនសង្ស័យដែលត្រូវចាប់ខ្លួននោះម្នាក់ ឈ្មោះ ទ្រី ពន្លឺ អាយុ២១ឆ្នាំ ជនជាតិខ្មែរ មុខរបរកម្មផ្សារដែក មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្ដាល និងម្នាក់ទៀតឈ្មោះ អ៊ូ សុផល ហៅស អាយុ១៨ឆ្នាំ ជនជាតិខ្មែរ មានទីលំនៅភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្ដាល ។
នគរបាលដកហូតបានម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២៤ ពាក់ស្លាកលេខ1AT-7090, ទូរស័ព្ទដៃម៉ាកIPHONE X ០១គ្រឿង ។ ដោយឡែក បក្សពួកត្រូវបានស្គាល់ឈ្មោះមួយចំនួនក្នុងនោះឈ្មោះ ហេង សុំបញ្ញា ភេទប្រុស អាយុ១៨ឆ្នាំ ។ ឈ្មោះ ឃន សុខខៀវ ភេទប្រុស អាយុ១៨ឆ្នាំ ។ ឈ្មោះ សាក់ ភេទប្រុស អាយុ១៨ឆ្នាំ ។ ឈ្មោះ អ៊ូនូ ភេទប្រុស អាយុ១៨ឆ្នាំ ។ ឈ្មោះ ខេម ភេទប្រុស អាយុ១៨ឆ្នាំ និងមួយចំនួនទៀតមិនស្គាល់ឈ្មោះ កំពុងរត់គេចខ្លួន។
នគរបាលបានប្រាប់ឲ្យដឹងថា កាលពីថ្ងៃកើតហេតុខាងលើ មានយុវជន០២នាក់ ជិះម៉ូតូ០១គ្រឿងម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២០ មិនចាំស្លាកលេខតាមផ្លូវបេតុង ក្នុងទិសដៅពីរត្បួងទៅជើង លុះពេលទៅដល់ត្រង់ចំណុចកើតហេតុខាងលើ ក៏ស្រាប់តែជួបជនសង្ស័យ២នាក់ និងបក្សពួកសរុប៣៥នាក់ ជិះម៉ូតូប្រហែល២០គ្រឿង ។
ខណៈនោះក្រុមជនសង្ស័យ ក៏បានធ្វើសកម្មភាពយកដងឆត្រព្រួតគ្នាវ៉ៃទៅលើជនរងគ្រោះទាំង០២នាក់ បន្ទាប់មកក៏បាននាំគ្នាជិះម៉ូតូគេចខ្លួនបាត់អស់ ចំណែកជនរងគ្រោះទាំង២នាក់ ក៏បាននាំគ្នាជិះម៉ូតូចេញពីកន្លែងកើតហេតុទៅបាត់ដែរ ដោយមិនបានរាយការណ៍ប្រាប់សមត្ថកិច្ច ឬដាក់ពាក្យបណ្ដឹងអ្វិឡើយ ។
នគរបាលបានប្រាប់ឲ្យដឹងបន្តទៀតថា ក្រោយពីមានហេតុការខាងលើកើតឡើង ទោះបីជាគ្មានបណ្ដឹងពីជនរងគ្រោះ ក៏ដោយក៏នគរបាលប៉ុស្តិ៍ជើងឯកចុះទៅធ្វើការស្រាវជ្រាវដែរ ហើយក៏កំណត់បានមុខសញ្ញា និងស្លាកលេខម៉ូតូរបស់ជនសង្ស័យដែលធ្វើសកម្មភាពនោះ ។ លុះដល់ថ្ងៃ១៣ ខែសីហា ឆ្នាំ២០២៥ វេលាម៉ោង១៤រសៀល នគរបាលប៉ុស្តិ៍ជើងឯក ខណ្ឌដង្កោ រាជធានីភ្នំពេញ បានសហការជាមួយប៉ុស្តិ៍នគរបាលរដ្ឋបាលសំរោងធំ នៃអធិការដ្ឋាននគរស្រុកកៀនស្វាយ ខេត្តកណ្ដាល ឃាត់ខ្លួនបានជនសង្ស័យទាំង២នាក់ខាងលើ នៅត្រង់ចំណុចតារាងបាល់ទេះ ស្ថិតនៅតាមផ្លូវបេតុង ភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្ដាល ។
នគរបាលដដែលបានបញ្ជាក់ប្រាប់ទៀតថា បន្ទាប់មកបាននាំយកមកធ្វើការសាកសួរនៅអធិការដ្ឋាននគរបាលខណ្ឌដង្កោ ហើយជនសង្ស័យបានសារភាពថា ក្រុមខ្លួនមានរហស្សនាម«ក្រោយវត្ត ហៅកាត់KV» មានគ្នា៣៥នាក់ ហើយពិតជាបានធ្វើសកម្មភាពព្រួតវាយជនរងគ្រោះខាងលើនោះមែន ព្រមទាំងថតរូបសកម្មភាពពេលព្រួតគ្នា វាយទៅលើជនរងគ្រោះនោះទៀតផង ។ កន្លងមក ក្រៅពីការធ្វើសកម្មភាពវាយអ្នកដទៃនិងវាយបំផ្លាញនោះក្រុមខ្លួនក៏ធ្លាប់បានធ្វើសកម្មភាពធាក់ប្លន់យកម៉ូតូរបស់ប្រជាពលរដ្ឋ តាមដងផ្លូវជាច្រើនកន្លែងទៀតផងដែរ ៕
ចែករំលែកព័តមាននេះ