រាជធានីភ្នំពេញ ៖ លោក កី ម៉ានេរ៉ា ចៅក្រមស៊ើបសួរសាលាដំបូងរាជធានីភ្នំពេញ នារសៀលថ្ងៃទី១៥ ខែសីហា ឆ្នាំ២០២៥ បានចេញដីកាសម្រេចឃុំខ្លួនម្ចាស់សិប្បកម្មលួចវេចខ្ចប់…
រាជធានីភ្នំពេញ ៖ លោក កី ម៉ានេរ៉ា ចៅក្រមស៊ើបសួរសាលាដំបូងរាជធានីភ្នំពេញ នារសៀលថ្ងៃទី១៥ ខែសីហា ឆ្នាំ២០២៥ បានចេញដីកាសម្រេចឃុំខ្លួនម្ចាស់សិប្បកម្មលួចវេចខ្ចប់ ប៊ីចេង និងម្សៅស៊ុប ក្លែងបន្លំម៉ាក ឆេហ្វ៥៥ ដោយខុសច្បាប់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ.ក្លែងបន្លំលើផលិតផលទំនិញ និងសេវា ។
ម្ចាស់សិប្បកម្មនោះមានឈ្មោះ អ៊ីវ សារិន ភេទប្រុស អាយុ៤៦ឆ្នាំ មានទីលំនៅផ្ទះគ្មានលេខ ផ្លូវបេតុង ភូមិភ្លេងឆេះរទេះខាងលិច សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
តាមដីកាបង្គាប់ឲ្យឃុំខ្លួនជនត្រូវចោទពីបទ.ក្លែងបន្លំលើផលិតផលទំនិញនិងសេវា ប្រព្រឹត្តនៅចំណុចដីឡូគ្មានលេខ នៅផ្ទះគ្មានលេខ ស្ថិតនៅបណ្តោយផ្លូវរថភ្លើង ភូមិភ្លេងឆេះរទេះខាងលិច សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ កាលពីថ្ងៃទី១១ ខែសីហា ឆ្នាំ២០២៥ តាមបញ្ញត្តិមាត្រា ១៦ មាត្រា ១៧ និងមាត្រា ៦៣ នៃច្បាប់ស្តីពីការគ្រប់គ្រងគុណភាព សុវត្តិភាពលើផលិតផលទំនិញ និងសេវា។ ដីកាបានបង្គាប់ឲ្យសមត្ថកិច្ចនាំជនសង្ស័យទៅឃុំខ្លួននៅពន្ធនាគាររាជធានីភ្នំពេញ PJ ជាបណ្តោះអាសន្ន ដោយរង់ចាំបើកសវនាការជំនុំជម្រះលើអង្គសេចក្តី ។
សូមជម្រាបថា កាលពីព្រឹកថ្ងៃទី១១ ខែសីហា ឆ្នាំ២០២៥ កម្លាំងសមត្ថកិច្ចនគរបាលជំនាញការិយាល័យប្រឆាំងបទល្មើសកម្មសិទ្ធិបញ្ញានៃនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រោមការសម្របសម្រួលនីតិវិធីផ្ទាល់ពីលោក ប្លង់ សុផល ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងមានការចូលរួមពីមន្ត្រី ក.ប.ប សាខារាជធានីភ្នំពេញ និងអាជ្ញាធរមូលដ្ឋាន បានចុះបង្ក្រាបទីតាំងសិប្បកម្មមួយកន្លែង ស្ថិតនៅសង្កាត់ភ្លើងឆេះរទះ ខណ្ឌកំបូល រាជធានីភ្នំពេញ ដែលបាននិងកំពុង វេចខ្ចប់ ប៊ីចេង និងម្សៅស៊ុប ក្លែងបន្លំម៉ាក ឆេហ្វ 55 ដោយខុសច្បាប់ ដែលម្ចាស់សិប្បកម្មមានឈ្មោះ អ៊ីវ សារិន បាននាំចូល ប៊ីចេង និងម្សៅស៊ុប គ្មានម៉ាកយីហោមកពីប្រទេសចិន រួចលួច លាក់ធ្វើការវេចខ្ចប់ដាក់ម៉ាក ឆេហ្វ៥៥ ប្រើប្រាស់ស្លាកសញ្ញាគុណភាព បាកូដ និងអាសយដ្ឋានផលិតនៅប្រទេសថៃ រួចធ្វើការលក់ចែកចាយស្ទើរគ្រប់ទីផ្សារក្នុងប្រទេសកម្ពុជា ដោយក្លែងបន្លំដល់អ្នកប្រើប្រាស់ថា ជាផលិតផលរបស់ប្រទេសថៃ ។
ក្នុងការឆែកឆេរត្រួតពិនិត្យជាក់ស្តែង សមត្ថកិច្ចបានរកឃើញនូវសម្ភារៈ វត្ថុតាងដូចជា ៖ ប៊ីចេង ម្សៅស៊ុបវេចខ្ចប់រួច រួមនឹងសម្បកថង់ សម្បកកេស សម្បកបាវ ម៉ាក ឆេហ្វ 55 ខុសច្បាប់ ប្រមាណជាង ៣០តោន, ម៉ាស៊ីនវាយកាលបរិច្ឆេទ ០១គ្រឿង, ម៉ាស៊ីនវេចខ្ចប់ធំ០២គ្រឿង, ម៉ាស៊ីនវេចខ្ចប់តូច០៣គ្រឿង, ម៉ាស៊ីនអ៊ុតកេស ០២គ្រឿង, ម៉ាស៊ីនរ៉ៃ០២គ្រឿង, រថយន្តដឹកទំនិញ០៤គ្រឿង និងរ៉ឺម៉កសម្រាប់ដឹកទំនិញ០៦គ្រឿង ។
ក្រោយពីការឆែកឆេរត្រួតពិនិត្យជាក់ស្តែង ដោយពិនិត្យឃើញថា សម្ភារៈទាំងអស់បំរើឲ្យការងារវេចខ្ចប់ ដឹកជញ្ជូន ចែកចាយប៊ីចេង និងម្សៅស៊ុបម៉ាក ឆែស 55 ក្លែងបន្លំប្រភពផលិត ដូចនេះសមត្ថ កិច្ចបានសម្រេច ដកហូតសម្ភារៈ វត្ថុតាងទាំងអស់ខាងលើ ហើយធ្វើការបិទផ្លំបេសិប្បកម្មមួយនេះជាបណ្តោះអាសន្ន រង់ចាំការសម្រេចពីស្ថាប័នមានសមត្ថកិច្ច និងបាននាំខ្លួនម្ចាស់ទីតាំងឈ្មោះ អ៊ីវ សារិន ភេទប្រុស អាយុ៤៦ឆ្នាំ ជនជាតិខ្មែរ ទៅសាកសួរបំភ្លឺ នៅនាយកដ្ឋាននគរបាលប្រឆាំងបទល្មើសសេដ្ឋកិច្ច រួចក៏បានកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធីច្បាប់ ។
ឆ្លៀតក្នុងឱកាសនោះដែរ សមត្ថកិច្ចបានបន្តផ្តាំផ្ញើ និងក្រើនរំលឹកដល់បងប្អូនអាជីវករ សូមចូលរួមគោរពច្បាប់ទាំងអស់គ្នា រកស៊ីដោយសុច្ចរិត មិនក្លែងបន្លំ ឬផលិតនូវផលិតផលក្លែងក្លាយ ដើម្បីលើកកម្ពសសុខុមាលភាពរបស់ប្រជាពលរដ្ឋ អ្នកប្រើប្រាស់ ក៏ដូច ជាលើកកម្ពសមុខមាត់ផលិតផលខ្មែរយើងស្របច្បាប់៕
ចែករំលែកព័តមាននេះ