ទីក្រុងកៀវ៖ រុស្ស៊ីវាយប្រហារអ៊ុយក្រែនមួយប្រាវកាលពីយប់មិញធ្វើឱ្យប្រជាជនជាង១លាននាក់ដាច់ភ្លើងអគ្គិសនីនៅតំបន់ឌីនីប្រូប៉េត្រូស (Dnipropetrovsk)។ សូម្បីតែឧបករណ៍សម្រាប់បង្កើតកម្ដៅ ឬទឹកក្ដៅក៏គ្មានប្រើប្រាស់ដែរខណៈដែលពេលនេះជារដូវរងា។ នេះបើយោងតាមការប្រកាសរបស់រដ្ឋមន្ត្រីអ៊ុយក្រែនមួយរូប។ សីតុណ្ហភាពធ្លាក់ចុះដល់ក្រោមសូន្យអង្សា។
មិនខុសពីរដូវរងាមុនៗនោះទេ រុស្ស៊ីឱ្យតែដល់ខែនេះគឺសម្រុកវាយប្រហារទៅលើរោងចក្រអគ្គិសនី ឬហេដ្ឋារចនាសម្ព័ន្ធផលិតថាមពល។ ដូច្នេះធ្វើឱ្យអ៊ុយក្រែនគ្មានប្រព័ន្ធកម្ដៅខ្លួន។ រដ្ឋាភិបាលទីក្រុងកៀវ និងក្រុមសម្ព័ន្ធមិត្តចាត់ទុកថានេះជាយុទ្ធសាស្ត្រដោយចេតនារបស់រុស្ស៊ីដើម្បីបង្កការលំបាកដល់ទីបំផុតទៅលើប្រជាជនអ៊ុយក្រែន។ ការវាយប្រហារទ្រង់ទ្រាយធំដោយដ្រូនយប់មិញនោះក៏ធ្វើឱ្យដាច់ភ្លើងនៅតំបន់ហ្សាប៉ូរីហ្សៀផងដែរ និងធ្វើឱ្យមនុស្សរាប់ពាន់នាក់គ្មានភ្លើងអគ្គិសនី ឬប្រព័ន្ធកម្ដៅខ្លួនទេ។
រដ្ឋមន្ត្រីអ៊ុយក្រែនសរសេររៀបរាប់នៅលើបណ្ដាញសង្គមថាដំណើរការជួសជុលនៅឌីនីប្រូប៉េត្រូសនៅតែមិនទាន់ចប់សព្វគ្រប់នៅឡើយទេដើម្បីរៀបចំប្រព័ន្ធផ្គត់ផ្គង់កម្ដៅ និងទឹកស្អាតឡើងវិញសម្រាប់អ្នកប្រើប្រាស់ជាងមួយលាននាក់។ ទ័ពអាកាសអ៊ុយក្រែនឱ្យដឹងថារុស្ស៊ីបញ្ជូនដ្រូន៩៧គ្រឿងទៅវាយប្រហារ ប៉ុន្តែខ្លួនអាចបាញ់ទម្លាក់បាន៧០គ្រឿង។ នៅសល់២៧គ្រឿងទៀតអាចវាយប្រហារគោលដៅមួយចំនួន។
ប្រមុខយោធាអ៊ុយក្រែនប្រចាំតំបន់ឌីនីប្រូប៉េត្រូសថ្លែងថាការវាយប្រហារនោះធ្វើឱ្យខូចខាតហេដ្ឋារចនាសម្ព័ន្ធ។ លោកបង្ហោះសារនៅលើតេឡេក្រាមថាស្ថានការណ៍នៅពេលនេះពោរពេញដោយភាពលំបាក។ ប៉ុន្តែនៅពេលមានសន្តិសុខគ្រប់គ្រាន់ បុគ្គលិកផ្នែកជួសជុលបណ្ដាញថាមពលនឹងចាប់ផ្ដើមការងារតភ្ជាប់ឡើងវិញ។
នៅតំបន់ហ្សាប៉ូរីហ្សៀ ទីតាំងសំខាន់ៗដែលធ្លាប់តែដាច់ភ្លើងបានតភ្ជាប់ឡើងវិញអស់ហើយ។ ប៉ុន្តែប្រជាជនភាគច្រើននៅតែមិនទាន់មានភ្លើងប្រើប្រាស់ដដែល។ នេះបើយោងតាមអភិបាលនៃតំបន់នេះ។ ជាការឆ្លើយតបទៅនឹងការវាយប្រហាររបស់រុស្ស៊ី អ៊ុយក្រែនវាយបកវិញទៅលើដេប៉ូស្តុកប្រេងឆៅ និងរោងចក្រចម្រាញ់ប្រេងរបស់រុស្ស៊ីដើម្បីកាត់ផ្ដាច់សមត្ថភាពនាំចេញថាមពលរបស់រុស្ស៊ី និងធ្វើឱ្យរុស្ស៊ីខ្វះខាតឥន្ធនៈប្រើប្រាស់ក្នុងស្រុក។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ