រាជធានីភ្នំពេញ ៖ សហព័ន្ធកីឡាប្រដាល់គុនខ្មែរបានប្រកាសជាផ្លូវការហើយថានឹងធ្វើការពន្យារពេលជាបណ្ដោះអាសន្ននូវរាល់កម្មវិធីប្រកួតទាំងឡាយនៅតាមបណ្ដាស្ថានីយទូរទស្សន៍។ ការប្រកាសនេះធ្វើឡើងកាលពីព្រឹកថ្ងៃទី១៩មីនា នៅក្នុងកិច្ចប្រជុំមួយរវាងមន្ត្រីសហព័ន្ធកីឡាប្រដាល់គុនខ្មែរជាមួយស្ថានីយទូរទស្សន៍ចំនួន៦ដែលមានរៀបចំកម្មវិធីប្រកួតប្រដាល់ ដើម្បីរួមចំណែកកាត់បន្ថយការរីករាលដាលនៃការឆ្លងវីរុសCOVID-19ដែលពិភពលោកកំពុងប្រឹងប្រែងទប់ស្កាត់។
លោកឧត្តមសេនីយ៍ឯក តែម ម៉ឺនប្រធានសហព័ន្ធកីឡាប្រដាល់គុនខ្មែរបានលើកឡើងនៅក្នុងអង្គប្រជុំថា លោកពិតជាមានការសោក ស្ដាយខ្លាំងណាស់ចំពោះវិធានការដែលនាំឱ្យមានការពន្យារពេលជាបណ្ដោះអាសន្ននូវកម្មវិធីប្រកួតប្រដាល់ដែលកំពុងតែមានការគាំទ្រនិងពេញនិយមខ្លាំងមួយនេះ ។ ប៉ុន្តែវាជារឿងចាំបាច់បំផុតដែលយើងត្រូវតែធ្វើ ព្រោះជារឿងអាយុជីវិតរបស់ប្រជាពលរដ្ឋ ។ ម្យ៉ាងវិញ ទៀតយើងក៏មិនអាចមិនអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជាដែលកំពុង តែយកចិត្តទុកដាក់យ៉ាងខ្លាំងបំផុតចំពោះ គ្រោះហានិភ័យដោយសារវីរុសCOVID-19បានដែរ ។
លោកលើកឡើងទៀតថា នេះគ្រាន់តែជាការពន្យារពេលជាបណ្ដោះអាសន្ន ប៉ុណ្ណោះមិនមែនមានន័យថាបិទទាំងស្រុងនោះទេ ។ លោកក៏មិនហ៊ានកំណត់ពេលវេលាថានឹងត្រូវប្រើរយៈពេលប៉ុន្មានសប្ដាហ៍នោះដែរអាស្រ័យទៅលើលទ្ធផលជាក់ស្ដែងតែប៉ុណ្ណោះ បើរាជរដ្ឋាភិបាលប្រកាសថា មានការធូរស្រាលហើយនឹងត្រូវចាប់ផ្ដើមប្រកួតជាបន្តភ្លាម។
នៅក្នុងកិច្ចប្រជុំនេះដែរមានតំណាងស្ថានីយទូរទស្សន៍ចំនួន៦ដែលមានរៀបចំកម្មវិធីប្រកួតកីឡាប្រដាល់ ក្នុងនោះមាន ក្រុមហ៊ុនCBS ស្ថានីយទូរទស្សន៍បាយ័ន្ត ស្ថានីយទូរទស្សន៍ ភីអិនអិន ស្ថានីយទូរទស្សន៍អាស៊ីអាគ្នេយ៍ ស្ថានីយទូរទស្សប៉ុស្តិ៍លេខ៥និងស្ថានីយទូរទស្សន៍ថោន ។ ប៉ុន្តែស្ថានីយទូរទស្សន៍២គឺទូរទស្សន៍ ប៉ុស្តិ៍លេខ៥និងទូរទស្សន៍ថោន បានសម្រេចប្រកាសពន្យារពេលការប្រកួតជាបណ្ដោះអាសន្ន តាមសំណើរបស់សហព័ន្ធកីឡាប្រដាល់គុនខ្មែរ ។
ចំណែកស្ថានីយទូរទស្សន៍៤ផ្សេងទៀតបានសំណូមពរសុំបន្តការប្រកួតមួយសប្ដាហ៍ទៀត មូលហេតុដោយសារតែការចេញសេចក្ដីប្រកាសរបស់សហព័ន្ធមានការយឺតយ៉ាវ ហើយកីឡាករប្រដាល់ទាំងបរទេសនិងកីឡាករខ្មែរបានមកជួបជុំគ្នាអស់ហើយ ទោះបីជាពួកគាត់(តំណាងទូរទស្សន៍)ចង់ពន្យារពេលប្រកួតក៏ពិបាកដែរ ។
ជាមួយគ្នានេះតំណាងស្ថានីយទូរទស្សន៍ទាំងនោះ សុទ្ធតែបង្ហាញសមានចិត្ត និងប្រកាន់គោលការណ៍ ច្បាស់លាស់ក្នុងការរួមចំណែកទប់ស្កាត់ការឆ្លងរីករាលដាលវីរុសCOVID-19គឺប្រកួតបិទទ្វារមិនឱ្យមានអ្នកចូលទស្សនាផ្ទាល់នោះទេ មានតែគណៈកម្មការរៀបចំការប្រកួតនិងកីឡាករប៉ុណ្ណោះហើយចំនួនមិនឱ្យលើសពី៥០នាក់ឡើយ ។ សំខាន់ជាងនេះទៅទៀតគឺត្រូវមានគ្រូពេទ្យប្រចាំការត្រួតពិនិត្យផ្ទាល់នៅហ្នឹងកន្លែងតែម្ដង។
នៅថ្ងៃចន្ទសប្ដាហ៍ក្រោយ នឹងមានការប្រជុំជាបន្តទៀតដើម្បីពិភាក្សាបន្ថែមថានឹងត្រូវឱ្យប្រកួតបន្តឬត្រូវពន្យារពេល ៕ (កែសម្រួលដោយ ៖ បុប្ផា)
ចែករំលែកព័តមាននេះ