ខេត្តបាត់ដំបង ៖ ធ្លាប់តែមានភ្ញៀវទេសចរ ស្ទើរគ្រប់ជាតិសាសន៍យ៉ាងអ៊ូរអ ធ្លាប់តែបង្ហាញនូវភាពញញឹមជាមួយនឹងមុខរបរយ៉ាងមមារញឹករាល់ថ្ងៃ ស្រាប់តែពេលនេះ រមណីយដ្ឋាន «ប្រាសាទបាណន់» ដ៏ល្បីល្បាញនេះ ហាក់កំពុងក្លាយជាទីស្ថានយ៉ាងស្ងាត់ជ្រងំដោយសារគ្មានភ្ញៀវ ធ្វើឱ្យអ្នកលក់ចំណីអាហារនានា ម្នាក់ៗបង្ហាញពីភាពស្រងូតស្រងាត់ ព្រោះតែបាត់អ្នកទិញ ។ ស្ថិតក្នុងស្ថានភាពស្ងប់ស្ងាត់បែបនេះ នៅតាមបណ្ដាតូបលក់ទំនិញ ឬលក់ចំណីអាហារនានា គេឮតែសំឡេងអ្នកលក់រអ៊ូរទាំ និងត្អូញត្អែរតែអំពីការខាតបង់ លក់មិនដាច់ គ្មានប្រាក់បង់ថ្លៃតូប ជាមួយនឹងការស្ដីបន្ទោសចំៗលាយឡំនឹងអារម្មណ៍ខឹងសម្បារផងថា គឺដោយសារតែការផ្ទុះនូវមេរោគ« កូវីដ-១៩» រួមផ្សំនឹងអាកាសធាតុក្ដៅហែងផង ទើបធ្វើឲ្យភ្ញៀវទេសចរខ្លបខ្លាចមិនហ៊ានធ្វើដំណើរកម្សាន្ត ។
យើងបានសម្គាល់ឃើញទីតាំង២កន្លែង នៅរមណីយដ្ឋាន «ប្រាសាទបាណន់» ដែលកំពុងស្ថិតក្នុងស្ថានភាពយ៉ាងស្ងប់ស្ងាត់បំផុត គឺទីតាំងជិះ«ឡូរី» និងទីតាំងបរិវេណខាងមុខ«ប្រាសាទបាណន់» ដែលតំបន់កំសាន្តទាំង២នេះ ធ្លាប់តែជាទីប្រជុំជន ប្រមូលផ្ដុំទៅដោយភ្ញៀវទេសចរជាតិ និងអន្តរជាតិយ៉ាងអ៊ូរអស្ទើររាល់ថ្ងៃ តែពេលនេះបែរជាស្ងាត់ជ្រងំ ។ អ្នកលក់ចំណីអាហារម្នាក់នៅកន្លែងជិះ«ឡូរី»បានប្រាប់កោះសន្តិភាព កាលពីសប្ដាហ៍មុននេះថា ចាប់តាំងពីផ្ទុះនូវជំងឺ«កូវីដ-១៩»មក ស្រាប់តែភ្ញៀវទេសចរចាប់ផ្ដើមថយចុះយ៉ាងគំហុកតែម្ដង ។ តូបលក់ដូរជាច្រើននៅកន្លែងជិះឡូរី មានការស្ងប់ស្ងាត់ មានតុ មានអង្រឹងសម្រាប់ភ្ញៀវអង្គុយលេង តែគ្មានអ្នកលក់។
គេឃើញតែអ្នកស្រី ចក់ ផល្លា ម្នាក់ប៉ុណ្ណោះ ដែលបានរៀបចំលក់ចំណីអាហារនៅកន្លែងជិះ«ឡូរី ជើងភ្នំបាណន់»នេះ។ ជួបជាមួយកោះសន្តិភាព អ្នកស្រី បានរៀបរាប់ដូច្នេះថា «មួយរយៈនេះ ខ្ញុំលក់មិនដាច់ទេ ព្រោះគ្មានភ្ញៀវ។ បើតាមខ្ញុំកត់សម្គាល់ គឺភ្ញៀវហាក់មានការថយចុះ ចាប់តាំងពីមានផ្ទុះជំងឺកូរ៉ូណាវីរុស។ កាលពីមុនខ្ញុំលក់មួយថ្ងៃ បានពី១០ទៅជាង១០ម៉ឺនរៀលក្នុងមួយថ្ងៃ តែពេលនេះលក់មិនដាច់បាត់ចំណូលជាងពាក់កណ្ដាល»។ គាត់និយាយថា ភ្ញៀវខ្លះមកលេងដែរ តែពេលជិះឡូរីកំសាន្តរួចត្រឡប់ទៅវិញភ្លាម មិនបានអង្គុយទទូលទានទឹកឬចំណីអាហារទេ តែបើថ្ងៃចុងសប្ដាហ៍ គ្រាន់បើបន្តិច។ ទំនងទើបទទួលបានភ្ញៀវម្នាក់គត់ នាព្រឹកនោះ អ្នកស្រី ចក់ ផល្លា បានបញ្ជាក់ថា កន្លងមក មានភ្ញៀវបរទេសច្រើនបានមកជិះឡូរីកំសាន្ត តែបើភ្ញៀវអឺរុបពួកគេទិញគ្រឿងកំប៉ុងផឹកខ្លះ តែបើភ្ញៀវជនជាតិចិនមិនទិញសោះតែម្ដង។ ពេលនេះមានតែគាត់ទេ ដែលតស៊ូមកលក់ រីឯអ្នកលក់ដទៃទៀត បានផ្អាកបណ្ដោះអាសន្នហើយដោយសារគ្មានអ្នកទិញ ម្យ៉ាងបែបខ្លាចមេរោគ«កូវីដ-១៩»ផង។
ដោយឡែក អ្នកលក់នៅក្បែរជណ្ដើរឡើងប្រាសាទបាណន់ម្នាក់ទៀត ក៏មិនខុសពីអ្នកលក់នៅកន្លែងជិះឡូរីនេះដែរ ។ គាត់បានត្អូញត្អែរអំពីការខាតបង់ លក់ចំណីអាហារមិនដាច់ ដោយសារស្ងាត់ភ្ញៀវទេសចរនេះ។ ស្ថិតក្នុងស្ថានភាពស្ងាត់ជ្រងំ សូម្បីតែភ្ញៀវម្នាក់ក៏គ្មានដែរ បុរសសម្បុរខ្មៅរូបនេះ បានប្រាប់កោះសន្តិភាពកាលពីសប្ដាហ៍មុននេះដែរថា «រយៈ៤ថ្ងៃហើយ ដែលតូបខ្ញុំ គ្មានភ្ញៀវម្នាក់សោះ ចូលតូបរបស់ខ្ញុំ។ ខ្ញុំយល់ថា ប្រហែលមកពីផ្ទុះរឿងរោគ កូរ៉ូណា វិរុស នេះហើយទើបស្ងាត់ភ្ញៀវ» ។ គ្មានអាវ មានតែក្រម៉ារុំជាប់ចង្កេះ អង្គុយលើអង្រឹង គាត់គ្រវីក្បាលសើចបន្តិច ហើយនិយាយថា «ប៉ុន្មានថ្ងៃកន្លងទៅនេះ ខ្ញុំលក់មិនដាច់សោះ។ ថ្ងៃខ្លះខ្ញុំលក់បានប្រាក់មិនបាន១ម៉ឺនរៀលផង។ កាលពីមិនទាន់ស្ងាត់ភ្ញៀវ ជាមធ្យមខ្ញុំលក់មួយថ្ងៃ អាចបានចំណូលចន្លោះពី១០ ទៅ១៥ម៉ឺនរៀលដែរ តែពេលនេះថ្ងៃខ្លះ សូម្បីទឹក១ដបក៏លក់មិនដាច់ដែរ»។
គាត់បានបញ្ជាក់ថា ពេលនេះ មិនមែនមានតែគាត់ទេ ដែលកំពុងប្រឈមនិងការដាច់បាយ អ្នកលក់ដទៃទៀត នៅក្នុងបរិវេណប្រាសាទបាណន់នេះ ក៏កំពុងត្អូញត្អែរពីរឿងដាច់បាយដូចគ្នាដែរ។ បើតាមការពិនិត្យជាក់ស្ដែង គេសង្កេតឃើញមានភ្ញៀវទេចសចរតិចតួចបំផុត ដែលបានធ្វើដំណើរទៅទស្សនាកំសាន្ត នៅរមនីយដ្ឋាន ប្រាសាបាណន់ នាពេលនេះ ។ យូរៗម្ដងគេប្រទះពួកភ្ញៀវច្រមុះស្រូតពី២ ទៅ៣នាក់ បានធ្វើដំណើរទៅទីនោះយ៉ាងស្ងាត់ស្ងៀម។ ពួកគេហាក់មិនរវីរវល់នឹងទំនិញ ឬចំណីអាហារដែលលក់ដូរនៅទីនោះទេ គ្រាន់តែទៅទស្សនាប្រាសាទ ហើយពួកគេត្រឡប់ទៅវិញភ្លាម ។ រីឯអ្នកលក់ដូរវិញម្នាក់ៗអង្គុយធ្វើមុខស្អុយ ស្ថិតក្នុងសភាពយ៉ាងស្ងាត់ស្ងៀម ព្រោះគ្មានអតិថិជនចូលទិញ ឬ ចូលអង្គុយលេងក្នុងតូប។ ពួកគេបានលើកឡើងស្រឌៀងៗគ្នាអំពីការបាត់បង់ភ្ញៀវទេសចរនេះ ។ ពួកគេបានធ្វើការសន្និដ្ឋាន២ចំណុចសំខាន់ៗ គឺទី១ ភ្ញៀវខ្លាច «កូវីដ-១៩» និងទី២ ដោយសារអាកាសធាតុ«ក្ដៅខ្លាំង»នេះជាមូលហេតុដែលនាំឲ្យភ្ញៀវខ្លាចរអារមិនហ៊ានដើរកំសាន្ត។
ពាក់ព័ន្ធនឹងបញ្ហាស្ងាត់បាត់ភ្ញៀវទេសចរពីរមណីយដ្ឋានប្រាសាទបាណន់ និងការត្អូញត្អែររបស់អ្នកលក់ដូរនៅតំបន់ទេសចរណនេះ អភិបាលស្រុកបាណន់ លោកប៉ែន សារីយូ ក៏បានទទួលស្គាល់ និងយល់ឃើញដូចការលើកឡើងរបស់ពលរដ្ឋខាងលើនេះដែរ ។ លោក ប៉ែន សារីយូ បានមានប្រសាសន៍ថា ការយល់ឃើញ និងការលើកឡើងពីសំណាក់ពលរដ្ឋ ដែលលក់ដូរនៅរមណីយដ្ឋាន ប្រាសាទបាណន់នេះ មិនខុស
ទេ។ លោកថា ភ្ញៀវទេសចរពិតជាថយចុះខ្លាំងមែនទេន ហើយការថយចុះភ្ញៀវនេះ មិនមែនមានតែនៅរមណីយដ្ឋានប្រាសាទបាណន់មួយទេ គឺកើតមានស្ទើរគ្រប់តំបន់ទេសចរណ៍ទាំងអស់នៅក្នុងខេត្ត ដោយសារតែការផ្ទុះឡើងនូវ«កូវីដ-១៩»។
លោកអភិបាលស្រុករូបនេះបានថ្លែងថា ពេលនេះ យើងកំពុងស្ថិតក្នុងវិធានការក្ដៅគគុក ដែលរាជរដ្ឋាភិ បាល បានអំពាវនាវឲ្យមានការចូលរួមទប់ស្កាត់ទាំងអស់គ្នា ជារឿងសំខាន់បំផុត ។ ដូច្នេះ ក្នុងនាមរូបលោកជាអាជ្ញាធរស្រុកបាណន់ សូមអំពាវនាវដល់បងប្អូនប្រជាពលរដ្ឋ ដែលមានមុខរបរលក់ដូរនៅតាមរមណីយដ្ឋាននានា សូមមេត្តាមានការអត់ធ្មត់ឲ្យបានខ្លាំងបំផុតចំពោះបញ្ហានេះ។ ព្រោះមិនមែនមានតែនៅក្នុងស្រុកបាណន់ ឬនៅក្នុងខេត្តបាត់ដំបងមួយទេ ដែលកំពុងជួបវិបត្តិនេះ គឺយើងកំពុងប្រឈមនៅទូទាំងប្រទេស។ ពេលនេះ ក្រសួងពាក់ព័ន្ធ និងប្រមុខរាជរដ្ខាភិបាល បាននិងកំពុងប្រឹងប្រែងយ៉ាងពេញទំហឹង ក្នុងការចាត់វិធានការការពារ វិធានការទប់ស្កាត់ និងរកវិធីសាស្ក្រដំណោះស្រាយ ។ ប៉ុន្តែអ្វីៗគ្រប់បែបយ៉ាងនឹងវិលមករកភាពប្រក្រតិឡើងវិញ នៅពេល«កូវីដ-១៩»រលាយសាបសូន្យ ។
ចែករំលែកព័តមាននេះ