ក្លិបអុីតាលីសេះបង្កង់ Juventus បានបញ្ជាក់ថាខ្សែបម្រើ Blaise Matuidi បានធ្វើតេស្តរកឃើញថាមានវីរុសមានផ្ទុកវីរុស Covid-19 នេះបើយោងតាមការចេញផ្សាយពីក្លិបមួយនេះ។
កីឡាករអន្តរជាតិបារាំងរូបនេះគឺជាកីឡាករទី២ ក្នុងក្លិប Juventus ដែលបានឆ្លងវីរុសខាងលើនេះ នៅក្រោយការប្រកាសកាលពីថ្ងៃពុធសប្តាហ៍មុន ដែលខ្សែការពារ Daniele Rugani បានក្លាយជាកីឡាករទី១ក្នុងក្លិប និងជាកីឡាករអាជីពដំបូងគេនៅលីគកំពូល Serie A ឆ្លងវីរុសដ៏កាចសាហាវ ដែលបានកំពុងរីករាលដានជុំវិញពិភពលោក។
Matuidi ដែលតែងតែបង្ហាញខ្លួនញឹកញាប់សម្រាប់ក្រុម Juventus ក្នុងរដូវកាលនេះបានស្ថិតនៅដាច់ដោយឡែកពីគេដោយស្ម័គ្រចិត្តចាប់តាំងពីថ្ងៃពុធសប្តាហ៍មុន ហើយកំពុងធ្វើតាមនីតិវិធីស្រដៀង នឹងមិត្តរួមក្រុមរបស់គេផងដែរ។
សូមបញ្ជាក់ថា ប្រទេសអុីតាលីបានស្ថិតនៅក្នុងការបិទទ្វារក្នុងគោលបំណងដើម្បីការពារការផ្ទុះឡើងនៃវីរុសឆ្លង (គិតមកទល់ពេលមានអ្នកឆ្លងជិត ៣២,០០០ករណី ខណៈអ្នកស្លាប់កើនដល់ ២,៥០៣នាក់) ដែលបានប៉ះពាល់ដល់កីឡាករនៅលីគ Serie A ជាច្រើនរួចទៅហើយ។
រដ្ឋាភិបាលបានដាក់ចេញនូវវិធានការបិទទ្វារយ៉ាងតឹងរ៉ឹងលើព្រឹត្តិការណ៍សាធារណៈ និងការជួបជុំនានាត្រូវបានហាមឃាត់ និងហាងទាំងអស់ក្រៅពីហាងលក់អាហារ និងឱសថស្ថាននានាត្រូវបានបិទ។ ជាមួយគ្នានេះ ក្រុមបាល់ទាត់ទាំងអស់ក្នុងប្រទេសនេះ បាននិងកំពុងអនុវត្តយ៉ាងតឹងរ៉ឹងនូវនីតិវិធី ដែលបានកំណត់ដោយរដ្ឋាភិបាល ៕ (ដកស្រង់ចេញពី Goal.com)
ចែករំលែកព័តមាននេះ