រាជធានីភ្នំពេញ ៖ រហូតមកទល់ពេលនេះ ការប្រកួតបាល់ទាត់ក្របខ័ណ្ឌមិត្តហ្វូនខេមបូឌាន
លីគប្រចាំឆ្នាំ២០២០ បានឈានចូលដល់សប្ដាហ៍ ទី៥ហើយ ។ បើក្រឡេកទៅមើលក្រុមខ្លាំងភ្នំពេញក្រោនឯណោះវិញនៅតែបន្តឈរនៅកំពូលតារាងយ៉ាងរឹងមាំដដែល ដោយការប្រកួតទាំង៥លើកនៅមិនទាន់ស្គាល់ចាញ់ឡើយ ជាពិសេសការប្រកួតកាលពីថ្ងៃអាទិត្យទី១៥ មីនានៅលើទឹកដីរបស់ខ្លួន គេបានយកឈ្នះក្រុមអង្គរ ថាយហ្គឺ១-០ និងមាន១៣ពិន្ទុនៅក្នុងដៃរួចទៅហើយ។
ទន្ទឹមជាមួយគ្នានេះដែរលោក ស៊ូ វណ្ណា ដែលជាគ្រូបង្គោលបានលើកឡើងថា ថ្វីត្បិតការប្រកួតទាំង៥លើកមកនេះភ្នំពេញក្រោនមិនទាន់របូតបាត់១គ្រាប់ណាក៏ដោយ ប៉ុន្តែខ្សែការពាររបស់លោកធ្វើបានល្អត្រឹមតែ៨០ទៅ៩០ភាគរយប៉ុណ្ណោះមិនទាន់បានល្អ១០០ភាគរយនោះទេ។
លោកបានលើកឡើងទៀតថា៖«និយាយទៅតាំងពីចាប់ផ្ដើមរដូវកាលប្រកួតរហូតមកទល់ពេលនេះ ប្រព័ន្ធការពាររបស់យើងធ្វើពុំទាន់បានល្អប៉ុន្មាននោះទេ អ៊ីចឹងយើងត្រូវកែកុនកីឡាករយើងមួយចំនួន ដើម្បីឱ្យគាត់បានយល់ ទាក់ទងទៅនឹងប្រព័ន្ធការពារ»។ ជាពិសេសសម្រាប់ការប្រកួតជាមួយក្រុមអង្គរថាយហ្គឺកាល ពីថ្ងៃអាទិត្យកន្លងមកនេះ ក្រុមភ្ញៀវមិនអាចបំប៉ោងសំណាញ់ទីក្រុមម្ចាស់ផ្ទះបានទេ ដោយ សារតែមានការរំខានពីខ្សែការពាររបស់ក្រុមម្ចាស់ផ្ទះជាញឹកញាប់ ។
ក្រុមភ្នំពេញក្រោនលេងវាយបកវិញរហូតរកបាន១គ្រាប់នៅនាទីទី៥៦ដោយកីឡាករPaulo Victor។ លោកបានលើកឡើងទៀតថា មិនត្រឹមតែប្រព័ន្ធការពារប៉ុណ្ណោះទេដែលមិនទាន់ធ្វើបានល្អ សូម្បីតែតំបន់បម្រើនៅមិនទាន់បានល្អដូចគ្នា គឺមាន ចន្លោះប្រហោងច្រើន ដូច្នេះត្រូវកែសម្រួលបន្ថែមទៀត ។
សម្រាប់ការប្រកួត៥លើកមកនេះក្រុមភ្នំពេញក្រោនឈ្នះ៤ប្រកួត ស្មើ១ប្រកួត មាន១៣ពិន្ទុ ក្រុមព្រះខ័នរាជស្វាយរៀងឈរនៅលេខរៀងទី២ ដោយប្រកួត៥លើកឈ្នះ៤ស្មើ១មាន១៣ពិន្ទុដូចគ្នាតែចាញ់គ្រាប់សំណល់ភ្នំពេញក្រោន ខណៈវិសាខាឈរនៅលេខរៀងទី៣ ដោយប្រកួត៥លើក ឈ្នះ៣ ចាញ់២ប្រកួតមាន៩ពិន្ទុ ៕ (កែសម្រួលដោយ ៖ បុប្ផា)
ចែករំលែកព័តមាននេះ