ព្រលឹង​អាប​គឺជា​មនុស្ស​ស្រី


ចាស់​ៗ​និយាយ​តំណាល​ត​ៗ​គ្នា​មក​ថា រូប​អាប​ដើម​ឡើយ​បាន​សិក្សា​រៀនសូត្រ​ស្នេហ៍មុខ ។ រូប​អាប​កម្រ​មាន​ភេទ​ប្រុស​ណាស់ ។ ស្ត្រី​ដែល​រៀន​ស្នេហ៍មុខ​នេះ លុះ​បាន​កាន់​អនុវត្ត​យូរ​ៗ​ទៅ សិល្ប៍​មន្ត​ស្នេហ៍​នេះ​ក៏​ចូល​ជោកជាំ​ក្នុង​ខ្លួន​ស្ត្រី​នេះ ហើយ​ក្លាយទៅជា​រូប​អាប​ទៅ ។ ព្រលឹង​អាប​បាន​សណ្ឋិត​ស្នាក់​នៅ​ក្នុង​តួអង្គ​រូប​នេះ​ជា​និច្ចកាល ។ ប្រសិនបើ​រូប​អាប​នេះ​ថ្នាំងថ្នាក់ អាក់អន់ចិត្ត ខឹង​នឹង​អ្នក​ណាមួយ ព្រលឹង​អាប​ទៅ​ធ្វើ​អ្នក​នោះ​ឱ្យ​ចុកពោះ ឈឺពោះ ឬ​ឡប់​ស្មារតី និយាយ​លែង​ដឹង​ខុស​ត្រូវ ។

ចាស់​ៗ​និយាយ​ទៀត​ថា ពេល​យប់​ព្រលឹង​អាប​ចេញពី​តួ​រូប​ទៅ​រកស៊ី​ឈាម​គំរង់ កូន​កង្កែប ហ៊ីង​ត្រី​មាន​រូបភាព​ជា​ភ្លើងពណ៌​ខៀវ ធំ​ជាងភ្លើង​អំពិលអំពែក ។ ពេល​វា​ដើរ ឬ​អណ្តែត ភ្លើង​នេះ​មិន​មាន​សកម្មភាព ភ្លឹបភ្លែត​ៗ ភ្លឺ​រលត់​ៗ ដូច​អំពិលអំពែក​ទេ គឺ​វា​ភ្លឺ​ធ្លោ​រហូត​តែបើ​កាលណា​វា​ចង់​បំបាំង​ខ្លួន ឬ​គេច​ពី​ឧបសគ្គ​អ្វីមួយ វា​ពន្លត់ភ្លើង​ឱ្យ​ងងឹត​មួយ​សំបក់ ។ បើ​សភាពការណ៍​បាន​ស្រួល​ឡើង​វិញ ទើប​អាប​បញ្ចេញ​រស្មី​ភ្លឺ​ខៀវ​ជា​បន្ត​ទៀត ។
គេ​តែង​ឃើញ​អាប​អណ្តែត​ផិត​ៗ​ដី​ស្វែងរក​អ្នក​ដែល​ទើប​សម្រាលកូន​ថ្មី​ៗ​ដែល​ជា​ធម្មតា តែងតែមាន​ឈាម​ធ្លាក់​ចុះ​មក​ក្រោមផ្ទះ ឬ​ក្រោម​គ្រែ​ដែល​ជា​កន្លែង​សម្រាលកូន​នោះ ។ ប៉ុន្តែ​ជា​ទូទៅ​នៅ​ស្រុកស្រែ​ចម្ការ ពេល​សម្រាលកូន​គេ​តែង​រក​គ្រូ​មក​ធ្វើ​កិច្ច​សែកមន្ត​វិជ្ជាការ​ព័ទ្ធសីមា​ដើម្បី​ការពារ​ព្រាយ​ក្រឡាភ្លើង ឬ​ការពារ​អាប​មក​យាយី​ព្យាបាទ​ស្ត្រី​សម្រាលកូន​ដោយ​យក​អំបោះ​មក​ព័ទ្ធសីមា ឬ​ស្រាស់​បន្លា​ជុំវិញ​គំនរ​ឈាម ។

គេ​តែង​និយាយ​ត​ៗ​គ្នា​ថា គេ​ឃើញ​រូបភាព​អាប​ជា​ពោះវៀន រ​តេ​រតាយ​ធ្លាក់​ចុះ​ប៉ប្រះ​ដី ឯ​ភ្លើង​ខៀវ​ផ្នែក​ខាង​លើ គឺជា​ក្បាល​អាប ។ គេ​ថា ពោះវៀន​នោះ​គឺជា​ពោះវៀន​របស់​ស្ត្រី​ជា​តួ​រូប​អាប​នោះ​ឯង ។ លុះ​ស្វែង​រកស៊ី​ចំណី​ក្នុង​ពេល​យប់​បាន​ឆ្អែតឆ្អន់​ហើយ អាប​ក៏​វិល​មក​ចូល​ក្នុង​តួ​រូប​អាប​ជា​មនុស្ស​វិញ ។

ប្រសិនបើ​ក្នុង​ពេល​រកស៊ី ពោះវៀន​អាប​ទាក់​ជាប់​ស្អិត​ក្នុង​បន្លា​រើ​ពុំ​រួច ឬ​ក៏​ត្រូវ​គ្រូសិល្ប៍​ណាមួយ​ចាប់​បាន​នោះ គេ​ថា​រូប​អាប​ជា​មនុស្ស​នោះ​នឹង​ត្រូវ​ឈឺ​ស្លាប់​ភ្លាម ។ នៅ​ក្នុងភូមិ​នានា​នៃ​ស្រុកស្រែ​ចម្ការ អ្នកផង​តែងតែ​ខ្លាច​រូប​អាប​នេះ​ណាស់ ។ បើកាលណា​រូប​អាប​នេះ​មក​រក​ទិញ ខ្ចី ឬ​សុំ​អ្វី គេ​តែង​បំពេញចិត្ត​គាត់​ភ្លាម ធ្វើ​យ៉ាង​ណា​កុំឱ្យ​គាត់​ខឹង ព្រោះ​ខ្លាច​ព្រលឹង​អាប​មក​ធ្វើបាប ប៉ុន្តែ​បើ​យាយ​អាប​ឈឺ​ស្លាប់​វិញ​នោះ អ្នកស្រុក​គេ​ហាក់ដូចជា​ធូរចិត្ត​ច្រើន​ណាស់ ព្រោះ​គេ​លែង​មាន​អ្នក​ឱ្យ​ទុក្ខ​ដល់​គេ​ទៀត ។ សាន សារិន

វប្ប​​​ធម៌

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

១០:១៩ | ក្នុងស្រុក

មិត្ត​ហ្វូ​ន​មាន​មោទនភាព​ដែល​បាន​ក្លាយ​ជា​ដៃគូ​យុទ្ធសាស្ត្រ​យូរអង្វែង​របស់​​ក្រសួង​អប់រំ យុវជន និង​កីឡា សហ​ការ​លើ «​បច្ចេកវិទ្យា​ព័ត៌មាន​ក្នុង​វិស័យ​​អប់រំ​»

ការស្ទង់មតិគេហទំព័រថ្មី




សូម​អរគុណ