សហព័ន្ធបាល់ទាត់ប្រទេសស្វីសបានប្រកាសថា លោក Dominique Blanc អាយុ៧០ឆ្នាំ បានទទួលលទ្ធផលនៃការធ្វើតេស្តមួយកាលពីព្រឹកថ្ងៃអាទិត្យ ដោយបានបញ្ជាក់ថា លោកមានផ្ទុករីរុស Covid-19 បច្ចុប្បន្នរូបលោកត្រូវបានដាក់ឱ្យនៅដាច់ដោយឡែកពីគេ។
លោក Blanc បាននិយាយនៅក្នុងសេចក្តីថ្លែងការណ៍មួយ ដែលចេញដោយសហព័ន្ធថា «ខ្ញុំមានអារម្មណ៍ល្អណាស់ឥឡូវនេះ ហើយមានតែរោគសញ្ញាផ្តាសាយបន្តិចបន្តួចប៉ុណ្ណោះ»។
សហព័ន្ធបាននិយាយថា ទីស្នាក់ការកណ្តាលបាល់ទាត់ស្វីសនៅទីក្រុងប៊ែន ត្រូវបានបិទ ហើយបុគ្គលិកដែលមានទំនាក់ទំនងជាមួយលោក Blanc ថ្មីៗនេះ នឹងត្រូវទទួលការធ្វើតេស្តពីក្រុមគ្រូពេទ្យ។
លោក Blanc ក៏បានចូលរួមក្នុងកិច្ចប្រជុំប្រចាំឆ្នាំ នៃស្ថាប័នបាល់ទាត់អ៊ឺរ៉ុបកាលនៅថ្ងៃទី៣ ខែមីនាកន្លងទៅ និងបានលើកឡើងពីបញ្ហានៃផលវិបាក សម្រាប់ការពន្យារពេលការប្រកួតបាល់ទាត់ក្នុងប្រទេសស្វីស ជាមួយមេដឹកនាំមកពី៥៥ប្រទេសជាសមាជិកផងដែរ ៕ (ដកស្រង់ចេញពី BBC)
ចែករំលែកព័តមាននេះ