ខេត្តកំពង់ឆ្នាំង ៖ បុរសម្នាក់សង្ស័យផឹកស្រាស្រវឹងហើយខឹងនឹងម្ដាយទៀតនោះក៏បានដុតផ្ទះខ្លួនឯង បណ្ដាលឲ្យឆេះខ្ទេចតែម្ដង និងរាលដាលឆេះផ្ទះ១ខ្នងទៀតដែលនៅក្បែរគ្នានោះ បណ្តាលឱ្យឆេះអស់១ចំហៀងផងដែរ ប៉ុន្តែមិនបណ្តាលឱ្យមនុស្សណាម្នាក់រងគ្រោះនោះទេ ។ ហេតុការណ៍ខាងលើនេះបង្កការភ្ញាក់ផ្អើលនេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៣ ខែមីនា…
ខេត្តកំពង់ឆ្នាំង ៖ បុរសម្នាក់សង្ស័យផឹកស្រាស្រវឹងហើយខឹងនឹងម្ដាយទៀតនោះក៏បានដុតផ្ទះខ្លួនឯង បណ្ដាលឲ្យឆេះខ្ទេចតែម្ដង និងរាលដាលឆេះផ្ទះ១ខ្នងទៀតដែលនៅក្បែរគ្នានោះ បណ្តាលឱ្យឆេះអស់១ចំហៀងផងដែរ ប៉ុន្តែមិនបណ្តាលឱ្យមនុស្សណាម្នាក់រងគ្រោះនោះទេ ។
ហេតុការណ៍ខាងលើនេះបង្កការភ្ញាក់ផ្អើលនេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៣ ខែមីនា ឆ្នាំ ២០២០ នៅភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង ។
សមត្ថកិច្ចនគរបាលក្រុងកំពង់ឆ្នាំងបានអោយដឹងថា ផ្ទះកើតហេតុខាងលើសង់អំពីឈើប្រក់ស័ង្កសី មានទំហំ៦ម៉ែត្រគុណនឹង១២ម៉ែត្រ ត្រូវភ្លើងឆេះខ្ទេចអស់ទាំងស្រុង មានម្ចាស់ឈ្មោះ ហុក ហាត ភេទស្រី អាយុ៦៤ឆ្នាំ ជាស្ត្រីមេម៉ាយ មានកូនចំនួន៤នាក់ រស់នៅក្នុងភូមិឃុំកើតហេតុខាងលើ ។ ចំណែកផ្ទះមួយខ្នងទៀតដែលជាផ្ទះបងប្អូនរបស់ស្ត្រីរងគ្រោះ មានទំហំ៥ម៉ែត្រគុណនឹង៦ម៉ែត្រត្រូវភ្លើងឆេះអស់មួយចំហៀង ។ រីឯកូនប្រុសដែលជាជនដៃដល់ឈ្មោះជៀម ចាន់នឿន អាយុ៣៦ឆ្នាំ ។
តាមប្រភពដដែលបានបន្តថា មុនពេលកើតហេតុ ស្ត្រីជាម្ដាយមិនបាននៅផ្ទះនោះទេ ប៉ុន្តែ កូនប្រុសដែលជាជនដៃដល់បាននៅផ្ទះម្នាក់ឯង និងផឹកស្រាស្រវឹង គួបផ្សំខឹងនឹងម្តាយមិននៅផ្ទះផងនោះ ក៏បានយកភ្លើងដុតផ្ទះ បណ្ដាលឱ្យឆេះទាំងស្រុងតែម្ដង ខណៈនោះដែរអណ្តាតភ្លើងបានឆេះរាលដាលទៅផ្ទះជិតគ្នាមួយខ្នងទៀត បណ្តាលឱ្យឆេះអស់មួយចំហៀង ។ ក្នុងពេលកើតហេតុនោះ រថយន្តពន្លត់អគី្គភ័យមិនអាចចុះទៅជួយបានទេ ព្រោះផ្ទះកើតហេតុនៅម្ខាងទន្លេ ប៉ុន្តែមានប្រជាពលរដ្ឋនាំគ្នាជួយពន្លត់ ទើបផ្ទះមួយខ្នងទៀតត្រូវភ្លើងឆេះអស់មួយចំហៀងប៉ុណ្ណោះ។
សមត្ថកិច្ចបានបញ្ជាក់ថា ដោយសារតែជនដៃដល់មានជំងឺសរសៃប្រសាទ និងមានលិខិតបញ្ជាក់ពីគ្រូពេទ្យ ព្រមជាមួយនឹងការធានារបស់ម្ដាយនិងក្រុមគ្រួសារ ក៏ដូចជាម្ចាស់ផ្ទះរងគ្រោះទី២ ដែលភ្លើងឆេះផ្ទះអស់មួយចំហៀងជាបងប្អូននឹងគ្នាផងនោះ ទើបសមត្ថកិច្ចបាន ឲ្យជនដៃដល់ត្រឡប់ទៅវិញ ៕ (កែសម្រួលដោយ ៖ ធីតា)
ចែករំលែកព័តមាននេះ