រាជធានីភ្នំពេញ ៖ រឿងរ៉ាវបង្ករបួសស្នាមរវាងនិស្សិតស្រី២នាក់នៅសាកលវិទ្យាល័យចេនឡា កាលពីវេលាម៉ោង៤ និង៣០នាទីរសៀលថ្ងៃទី២៣ មីនា នៅសង្កាត់ទឹកល្អក់ទី៣ ខណ្ឌទួលគោក ធ្វើឱ្យមានការចាប់អារម្មណ៍យ៉ាងខ្លាំង ហើយគេឆ្ងល់ថា ហេតុអ្វីបានជាពួកនាងដែលជាមិត្តភក្តិនឹងគ្នា មានទំនាស់គ្នាឈានទៅប្រើកាំបិតជាអាវុធកាប់គ្នាបែបនេះ ។ និស្សិតស្រីរងរបួសធ្ងន់ឈ្មោះទូច នីដា អាយុ២១ឆ្នាំ មានទីលំនៅក្នុងក្រុងសៀមរាប ខេត្តសៀមរាប រួមទាំងក្រុមគ្រួសារប្រាប់ឱ្យដឹងថា វាមិនមែនជាការទាស់ទែងគ្នាទេ គឺជាអំពើប៉ុនប៉ងប្លន់យកម៉ូតូ និងសំភារ តែពុំបានសម្រេច ។
រឿងហេតុនោះកើតឡើងកាលពីថ្ងៃទី២៣ មីនាវេលាម៉ោង៤ និង៣០នាទីរសៀលនៅផ្ទះលេខ១១៨B ផ្លូវលេខ១៨៦ ក្រុមទី២៤ ភូមិទី៩ សង្កាត់ទឹកល្អក់ទី៣ ខណ្ឌទួលគោក ដែលជាផ្ទះរបស់ឈ្មោះទូច នីដា អាយុ២១ឆ្នាំ ។ នៅពេលទាស់ទែងគ្នានោះឈ្មោះបាន ចន្ធី អាយុ២០ឆ្នាំ ស្នាក់នៅផ្ទះជួលលេខ៣២ ផ្លូវលេខ៤២០ សង្កាត់បឹងត្របែក ខណ្ឌចំការមន រងរបួសស្រាល ហើយត្រូវសមត្ថកិច្ច ខណ្ឌទួលគោកឃាត់ខ្លួនកាលពីវេលាម៉ោង៤ និង៣០នាទីរសៀលថ្ងៃទី២៤ មីនា នៅពេលចូលខ្លួនទៅបំភ្លឺនៅប៉ុស្តិ៍ប៉ូលិស ។ ទោះបីជាបែបណាក្តី ដោយនាងមានជំងឺបេះដូង និងរបួសស្រាលផងនោះ ត្រូវបានបញ្ជូនទៅព្យាបាលនៅគ្លីនិកទួលគោកដោយសមត្ថកិច្ចខណ្ឌនៅការពារ ។
សមត្ថកិច្ចខណ្ឌទួលគោកឱ្យដឹងថា ផ្តើមចេញពីទំនាស់គ្នារឿងយកកុំព្យូទ័រទៅសង ហើយកុំព្យូទ័រនោះខូច ទើបកើតរឿងនោះ ។ នាងបាន ចន្ធី បានយកកុំព្យូទ័រឡេបថបទៅសងឈ្មោះទូច នីដា ដល់ផ្ទះ ។ នៅទីនោះពួកនាងនាំគ្នាហូបស្វាយ ស្របពេលនោះនាងទូច នីដា បើកកុំព្យូទ័រមិនចេញក៏ខឹង បណ្តាលឱ្យមានទំនាស់គ្នា និងឈានទៅកាប់គ្នាទៅវិញទៅមកតែម្តង ។ ការកាប់ចាក់នោះបណ្តាលឱ្យឈ្មោះទូច នីដា រងរបួសក្បាល ម្រាមជើងស្តាំ និងកូនម្រាមដៃស្តាំ ។ ឯចំណែកនាងបាន ចន្ធី បានរងរបួសស្រាល ។
រឿងរ៉ាវនាងទូច នីដា និងបងប្រុសឈ្មោះ ទូច ណារ៉ា អាយុ៣៧ឆ្នាំ ចោទថា មិនមែនជាការទាស់ទែងគ្នាទេ គឺឈ្មោះបាន ចន្ធី មានបំណងសម្លាប់នាងទូច នីដា ដើម្បីប្លន់យកម៉ូតូ និងសំភារ តែពុំបានសម្រេចដោយសារតែអ្នកជិតខាងទៅបើកទ្វារឃើញ ។ នាងទូច នីដា ឱ្យដឹងថា នាងបាន ចន្ធី យកកុំព្យូទ័រទៅសងនាង ព្រមទាំងទិញស្វាយយកទៅញ៉ាំជាមួយគ្នាផង ។ ខណៈនោះនាងបាន ចន្ធី សួរថា ក្នុងផ្ទះមានគ្នានៅប៉ុន្មាននាក់ រូបនាងប្រាប់ថា នៅជាមួយបងប្អូន២នាក់ ។ នាងបាន ចន្ធី សួរទៀតថា តើបងប្អូនមកវិញនៅម៉ោងប៉ុន្មាន? ព្រមទាំងឈរក្បែរបង្អួចមើលទៅផ្លូវ ។
នាងទូច នីដា និយាយថា នៅពេលមកដល់ភ្លាម នាងបាន ចន្ធី សួររកកាំបិតកាត់ខ្សែអាវ ។ បន្ទាប់ពីហូបស្វាយរួច រូបនាងអង្គុយអានសៀវភៅ ស្រាប់តែនាងបាន ចន្ធី យកកូនកាំបិតចាក់និងអារ.ក តែនាងរើបំរះបណ្តាលឱ្យមុតដៃ ។ ខណៈពេលរើបំរះ នាងបានដួល ហើយត្រូវនាងបាន ចន្ធី សង្កត់ពីលើ និងយកកាំបិតចាក់ក្បាល ត្របកភ្នែក ក្រោមក្លៀក ជើង និងចាក់ចូលមាត់ទៀត បំណងសម្លាប់ ។ ទោះជាយ៉ាងណាក្តី មានអ្នកជិតខាងបើកទ្វារចូលធ្វើឱ្យនាងបាន ចន្ធី ស្រឡាំងកាំង ហើយនាងរើបំរះ រួច។ ភ្លាមនោះនាងទាញកាំបិតប៉័ងតោគំរាមកុំឱ្យនាងបាន ចន្ធី ចូលមកទៀត ។ នេះជាការរៀបចំគម្រោងប្លន់ ។
ពេលភ្ញាក់ផ្អើល សោម៉ូតូបានធ្លាក់នៅក្បែរមាត់ទ្វារ និងមួកត្រូវនាងបាន ចន្ធី យកទៅដាក់នៅលើម៉ូតូ តែយកម៉ូតូពុំបានសម្រេចឡើយ ។ ចំណែកនាងបាន ចន្ធី ដែលកំពុងសម្រាកព្យាបាលនៅគ្លីនិកទួលគោក និងក្រុមគ្រួសារពុំបានអះអាងបែបណាឡើយ ។ ពួកគេគ្រាន់តែនិយាយថា «រឿងនេះទុកឱ្យច្បាប់ជាអ្នកដោះស្រាយចុះ» ។ គេមិនដឹងថា រឿងរ៉ាវចម្រូង ចម្រាសនេះនឹងទៅជាយ៉ាងណាទេ ៕
ចែករំលែកព័តមាននេះ