រាជធានីភ្នំពេញ ៖ ប្តីប្រពន្ធពីរនាក់ជិះម៉ូតូវ៉ាជែងទៅផ្លូវម្ខាងទៀតក៏ត្រូវបុរសម្នាក់បានជិះម៉ូតូមួយគ្រឿងក្នុងទិសដៅបញ្ច្រាសគ្នាជ្រុលទៅបុកពេញទំហឹង បណ្តាលម៉ូតូខ្ទាតទៅប៉ះរថយន្ដមួយគ្រឿងទៀតម៉ាកឡិចស៊ីស៣៥០ ដែលបើកកាត់តាមផ្លូវនោះដែរ បណ្តាលឱ្យប្តីប្រពន្ធ២នាក់រងរបួសធ្ងន់ស្រាល ចំណែកបុរសម្នាក់ទៀតបានបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៥ ខែមិនា ឆ្នាំ២០២០ នៅចំណុចខាងក្រោយមន្ទីរពេទ្យមិត្តភាពខ្មែរ-សូវៀត តាមបណ្តោយផ្លូវ៤៣០ កែងនឹង១៩៣ សង្កាត់ទំនប់ទឹក ខណ្ឌបឹងកេងកង ។
ជនរងគ្រោះម្នាក់ដែលបាត់បង់ជីវិតឈ្មោះ សូ ចាន់ណា ភេទប្រុស អាយុ២២ឆ្នាំ មុខរបរកម្មករសំណង់ មានស្រុកកំណើតនៅខេត្តពោធិ៍សាត់ ជាអ្នកបើកបរម៉ូតូមួយគ្រឿងម៉ាកស៊ុយហ្ស៊ុយគីស្មាសរីវ៉ូ ពណ៌ខ្មៅ ពាក់ស្លាកលេខ កំពង់ចាម ១D-៣០២៤ ។ ដោយឡែកពីរនាក់ប្តីប្រពន្ធដែលរងរបួសធ្ងន់ស្រាល មិនទាន់ស្គាល់អត្តសញ្ញាណនោះទេ គ្រាន់តែដឹងថា ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៤ ពាក់ស្លាកលេខ ភ្នំពេញ ១CK-៥៣១៧ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញប្តីប្រពន្ធ២នាក់ជិះម៉ូតូមួយគ្រឿងម៉ាកហុងដាឌ្រីម ធ្វើដំណើរតាមបណ្ដោយផ្លូវ៤៣០ ក្នុងទិសដៅពីត្បូងទៅជើង លុះមកដល់ចំណុចកើតហេតុ បានវ៉ាជែងទៅខាងឆ្វេងដៃរថយន្តមួយគ្រឿងចូលទៅផ្លូវម្ខាងទៀត គាប់ជួនពេលនោះ ស្រាប់តែមានបុរសម្នាក់ទៀតជិះម៉ូតូមួយគ្រឿងម៉ាកស៊ុយហ្ស៊ុយគីស្មាសរីវ៉ូ ធ្វើដំណើរក្នុងទិសដៅបញ្ច្រាសគ្នាពីជើងទៅត្បូង ក្នុងល្បឿនលឿន បានជ្រុលទៅបុកគ្នាចំពីមុខពេញទំហឹង បណ្តាលឱ្យម៉ូតូខ្ទាតទៅប៉ះរថយន្តមួយគ្រឿងម៉ាកឡិចស៊ីស RX៣៥០ ពណ៌ស ពាក់ស្លាកលេខ ភ្នំពេញ ២BE-៥៧៦៨ ដែលបើកបរដោយបុរសម្នាក់ បណ្តាលអោយអ្នកបើកបរម៉ូតូម៉ាកស្មាសរីវ៉ូ រងរបួសបែកក្បាលធ្ងន់ធ្ងរ ចំណែកខាងម៉ូតូហុងដាឌ្រីម បណ្តាលឱ្យបុរសជាប្តីរងរបួសបែកក្បាលធ្ងន់ធ្ងរ រីឯស្ត្រីជាប្រពន្ធ រងរបួសស្រាល ។
បន្ទាប់ពីកើតហេតុភ្លាមៗនោះដែរ ខាងរថយន្តម៉ាកឡិចស៊ីស RX៣៥០ មិនបានឈប់នោះទេ ក៏បានបើកចូលទៅក្នុងផ្ទះ ប៉ុន្តែត្រូវសមត្ថកិច្ចដេញឃាត់រថយន្ដបានមកវិញ ។
សមត្ថកិច្ចមូលដ្ឋានក៏ដូចជាជំនាញបានចុះទៅកន្លែងកើតហេតុ រួចទំនាក់ទំនងហៅរថយន្តសង្គ្រោះអោយមកដឹកជនរងគ្រោះទាំង៣នាក់យកទៅសង្គ្រោះនៅមន្ទីរពេទ្យមិត្តភាពខ្មែរសូវៀតដែលនៅក្បែរនោះមិនទាន់បាន១០នាទីផង ស្រាប់តែជនរងគ្រោះដែលជិះម៉ូតូម៉ាកស្មាសរីវ៉ូ បានបាត់បង់ជីវិតតែម្ដង ។
ក្រោយពេលកើតហេតុ នគរបាលជំនាញចរាចរណ៍ក្រុងភ្នំពេញបានចុះទៅកន្លែង រួចហើយធ្វើកំណត់ហេតុ និងទំនាក់ទំនងទៅសាច់ញាតិដើម្បីមកទទួលយកជនរងគ្រោះទៅធ្វើបុណ្យតាមប្រពៃណីនៅស្រុកកំណើត ។ ចំណែកម៉ូតូ២គ្រឿង និងរថយន្តមួយគ្រឿង ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ