ក្លិបបាល់ទាត់ Brondby នៅលីគកំពូលដាណឺម៉ាក បានដាក់មនុស្សចំនួន១៣នាក់រាប់បញ្ចូលទាំងកីឡាករម្នាក់ និងគ្រូជំនួយរបស់ពួកគេ បន្ទាប់ពីអតីតកីឡាករជម្រើសជាតិដាណឺម៉ាក Thomas Kahlenberg ត្រូវបានគេធ្វើរោគវិនិច្ឆ័យថា មានផ្ទុកជំងឺរលាកផ្លូវដង្ហើមដោយសាររីរុស…
ក្លិបបាល់ទាត់ Brondby នៅលីគកំពូលដាណឺម៉ាក បានដាក់មនុស្សចំនួន១៣នាក់រាប់បញ្ចូលទាំងកីឡាករម្នាក់ និងគ្រូជំនួយរបស់ពួកគេ បន្ទាប់ពីអតីតកីឡាករជម្រើសជាតិដាណឺម៉ាក Thomas Kahlenberg ត្រូវបានគេធ្វើរោគវិនិច្ឆ័យថា មានផ្ទុកជំងឺរលាកផ្លូវដង្ហើមដោយសាររីរុស Covid-19។
នាយកផ្នែកទំនាក់ទំនងក្លិបលោក Christian Schultz មានប្រសាសន៍ថាលោក Kahlenberg បានឆ្លងវីរុសនេះនៅទីក្រុង Amsterdam កាលពីចុងសប្តាហ៍មុន ហើយក៏បានបង្ហាញខ្លួននៅឯការប្រកួតរបស់ក្រុម Brondby ទល់នឹងក្រុម Lyngby កាលពីថ្ងៃអាទិត្យ។
ខ្សែការពារ Joel Kabongo វ័យ ២១ឆ្នាំកំពុងស្ថិតនៅដាច់ដោយឡែកពីគ្នា រួមជាមួយជំនួយការគ្រូបង្វឹកលោក Martin Retov ខណៈដែលក្រុម Lyngby ក៏មានកីឡាករ ៣នាក់ដែលត្រូវដាក់ដោយឡែកពីគេផងដែរ។
លោក Christian Schultz បានប្រាប់ទៅកាន់ BBC Radio 5 Live ថា Kabongo បានជួប Kahlenberg បន្ទាប់ពីចប់ការប្រកួតនេះ ដោយសារតែពួកគេជាមិត្តរួមក្រុមហើយពួកគេក៏បានចាប់ដៃគ្នាផងដែរ ។
លោកក៏បានបញ្ជាក់ផងដែរថា អ្នកវិភាគទិន្នន័យ អ្នកចិត្តវិទូ និងបុគ្គលិកចំនួន៩នាក់ រួមទាំងនាយកប្រតិបត្តិលោក Ole Palma ក៏ត្រូវដាក់ឱ្យដាច់ដោយឡែកពីគេផងដែរ។
ក្នុងនោះខ្សែបម្រើ Martin Ornskov ខ្សែការពារ Lyngby ខ្សែការពារស្លាបស្តាំ Kasper Jorgensen និងខ្សែការពារស្លាបឆ្វេង Patrick da Silva ក៏ស្ថិតក្នុងការតាមដានរយៈពេល១៤ថ្ងៃផងដែរ បន្ទាប់ពីបានជួបជាមួយ Kahlenberg នៅចប់ការប្រកួត។
លោក Schultz ក៏បានបញ្ជាក់បន្ថែមទៀតថា អតីតខ្សែបម្រើក្រុមហង្សក្រហម Liverpool លោក Christianax Poulsen ដែលបច្ចុប្បន្នជាជំនួយការគ្រូបង្វឹករបស់ក្លិប Ajax ក៏ត្រូវដាក់ដាច់ដោយឡែកពីគេ បន្ទាប់ពីបាននៅជាមួយ Kahlenberg ក្នុងទីក្រុង Amsterdam ។
ដោយឡែកកាសែត De Telegraaf របស់ហូឡង់ក៏បានរាយការណ៍ផងដែរថា គ្រូផ្នែកលំហាត់ប្រាណលោក Alessandro Schoenmaker និងគ្រូម្នាក់ទៀតក្នុងចំណោមអ្នកព្យាបាលផ្នែកកាយសម្ព័ន្ធរបស់ក្លិប Ajax ក៏ត្រូវបានដាក់ដោយឡែកផងដែរ។
សូមបញ្ជាក់ថា គិតមកទល់ពេលនេះ មានករណីឆ្លងវីរុស Covid-19 នេះច្រើនជាង៩ម៉ឺនករណីនៅក្នុងប្រទេសចំនួន៨៨ នៅជុំវិញពិភពលោក ៕ (កែសម្រួលដោយ ៖ ធីតា)
ចែករំលែកព័តមាននេះ