ខេត្តកណ្តាល ៖ ប្រជាពលរដ្ឋរស់នៅតាមដងទន្លេមេគង្គក្នុងស្រុកលើកដែក ខេត្តកណ្តាលមានការព្រួយបារម្ភយ៉ាងខ្លាំងអំពីការបាក់ច្រាំងទន្លេនារដូវទឹកដំឡើងមួយឆ្នាំបន្តិចមួយឆ្នាំបន្តិចបណ្តាលឱ្យដីចំការ និងដីលំនៅឋានរបស់ពួកគាត់ជាច្រើនគ្រួសារត្រូវបាត់បង់ ហើយលំនៅឋានជាច្រើនខ្នងត្រូវបានបង្ខំចិត្តរុះរើជារៀងរាល់ឆ្នាំបន្តបន្ទាប់ផងដែរ។
ជាក់ស្តែង ខណៈពេលសន្ទុះទឹកឆ្នាំនេះកំពុងហក់ឡើងខ្លាំង លំនៅឋានរបស់ប្រជាពលរដ្ឋក្នុងភូមិព្រែកតូច ឃុំព្រែកទន្លាប់ ស្រុកលើកដែកចំនួន៣ខ្នងត្រូវបានរុះរើ ហើយជាច្រើនខ្នងទៀតនៅជិតៗគ្នាក៏អាចនឹងរុះរើបន្ថែមទៀតដោយសារគ្រោះបាក់ច្រាំងទន្លេនេះ ។
ដោយឡែកនៅក្នុងភូមិព្រែកដាច់ ឃុំព្រែកដាច់ ស្រុកលើកដែកឆ្នាំនេះក៏បានជួបគ្រោះបាក់ច្រាំងទន្លេ បាត់បង់ដីចំការរបស់ប្រជាពលរដ្ឋជាច្រើនដែរ។
ប្រជាពលរដ្ឋក្នុងភូមិ-ឃុំទាំង២ខាងលើបានឱ្យអ្នកយកព័ត៌មានដឹងថា គ្រោះបាក់ច្រាំងទន្លេមេគង្គចំណុចនេះបានបាក់រយៈពេល២ទៅ៣ឆ្នាំហើយ ហើយក៏មានផ្ទះប្រជាពលរដ្ឋរុះរើបន្តបន្ទាប់ដែរ ប៉ុន្តែមិនប៉ះពាល់ធ្ងន់ធ្ងរដូចឆ្នាំនេះទេ ដែលមួយរយៈពេលទឹកកំពុងហក់ឡើងខ្លាំងបានបង្កឱ្យបាក់ច្រាំងទន្លេនៅចំណុចភូមិព្រែកដាច់ និងភូមិព្រែកតូចយ៉ាងលឿនធ្វើឱ្យពួកគាត់បាត់បង់ដីចំការ និងដីលំនៅឋាន ហើយផ្ទះមួយចំនួនក៏ត្រូវរុះរើជាបន្តបន្ទាប់ ពួកគាត់សុទ្ធតែជាអ្នកក្រីក្រគ្មានលុយ គ្មានដីកន្លែងផ្សេងរស់នៅទេ ។
ជុំវិញបញ្ហានេះ ប្រជាពលរដ្ឋរងគ្រោះដោយបាក់ច្រាំងទន្លេក្នុងស្រុកលើកដែកជាច្រើនគ្រួសារសូមសំណូមពរដល់ប្រធានក្រុមការងារគណៈពង្រឹងស្រុកលើកដែក ជាពិសេសរាជរដ្ឋាភិបាលមេត្តាជួយពួកគាត់ផង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ