ខេត្តបាត់ដំបង ៖ បើយោងតាមព័ត៌មានបឋមដែលកោះសន្តិភាពទទួលបាននាប៉ុន្មានថ្ងៃកន្លងទៅនេះ ពីជនរងគ្រោះផ្ទាល់ និងប្រជាពលរដ្ឋមួយចំនួនផងដែរ បានឲ្យដឹងថា ក្នុងរយៈពេលជាង១សប្ដាហ៍ចុងក្រោយនៃខែកុម្ភៈ កន្លងទៅនេះ អំពើចោរកម្មបានកើតឡើងជាបន្តបន្ទាប់ស្ទើររាល់យប់ ដែលបង្កឡើងដោយជនមិនស្គាល់មុខ…
ខេត្តបាត់ដំបង ៖ បើយោងតាមព័ត៌មានបឋមដែលកោះសន្តិភាពទទួលបាននាប៉ុន្មានថ្ងៃកន្លងទៅនេះ ពីជនរងគ្រោះផ្ទាល់ និងប្រជាពលរដ្ឋមួយចំនួនផងដែរ បានឲ្យដឹងថា ក្នុងរយៈពេលជាង១សប្ដាហ៍ចុងក្រោយនៃខែកុម្ភៈ កន្លងទៅនេះ អំពើចោរកម្មបានកើតឡើងជាបន្តបន្ទាប់ស្ទើររាល់យប់ ដែលបង្កឡើងដោយជនមិនស្គាល់មុខ បានចូលលួចតាមផ្ទះអាជីវករនានានៅក្នុង «ផ្សារដំណាក់ស្ដៅ» ស្ថិតក្នុងឃុំស្ដៅ ស្រុករតនៈមណ្ឌល ហើយភាគច្រើន គឺកើតឡើងនៅពាក់កណ្ដាលយប់ និងនៅពេលទៀបភ្លឺ តែសមត្ថកិច្ចហាក់ព្យាយាមបិទបាំងព័ត៌មាននេះ មិនរាយការណ៍ជូនការិយាល័យជំនាញ ឬទៅលោកស្នងការខេត្តបានជ្រាបឡើយ។
បើតាមប្រភពពីអាជីវករ «ផ្សារដំណាក់ស្ដៅ» បានប្រាប់កោះសន្តិភាពតាមទូរស័ព្ទថា បើគិតចាប់ពីជាងពាក់កណ្ដាលខែមករា រហូតមកដល់ត្រឹមថ្ងៃទី២៦ កុម្ភៈ កន្លងទៅនេះ អំពើចោរកម្មបានកើតឡើងយ៉ាងតិចចំនួន៦លើក ដែលចោរបានឡើងផ្ទះអាជីវករនានានៅម្ដុំផ្សារដំណាក់ស្ដៅ លួចទ្រព្យសម្បត្តិ ដែលភាគច្រើនកើតឡើងនៅកណ្ដាលអធ្រាត្រ និងនៅវេលាទៀបភ្លឺ។ នេះមិនទាន់គិតនៅកន្លែងផ្សេងៗទៀត កើតមានដែរឬយ៉ាងណានោះទេ?
ប្រភពដដែលបានបញ្ជាក់ថា ផ្ទះអាជីវករខ្លះត្រូវចោរឡើងលួចទ្រព្យសម្បត្តិរហូតដល់ទៅ២លើកផ្ទូនៗ និងមានរូបសកម្មភាពចោរជាប់នៅក្នុងកាមេរ៉ាសុវត្ថិភាពទៀតផង តែសមត្ថកិច្ចហាក់ស្ងៀមស្ងាត់មិនមានលទ្ធិផលអំពីការស៊ើបអង្កេតឡើយ។ មិនតែប៉ុណ្ណោះ សមត្ថកិច្ចថែមទាំងហាមប្រាម មិនឲ្យជនរងគ្រោះថតទីតាំងកើតហេតុបង្ហោះតាមបណ្ដាញសង្គម ឬមិនឲ្យផ្ដល់ព័ត៌មានទៅខាងក្រៅទៀតផង។ ពេលនេះទាំងជនរងគ្រោះ ទាំងអាជីវករនានា ដែលរស់នៅម្ដុំផ្សារដំណាក់ស្ដៅនោះ កំពុងមានការព្រួយបារម្ភយ៉ាងខ្លាំងអំពីសុវត្ថិភាពនៅពេលយប់។
ជុំវិញអំពើចោរកម្មដែលកើតឡើងយ៉ាងកក្រើកនៅ «ផ្សារដំណាក់ស្ដៅ» ខាងលើនេះ លោក រស់ លឹមស៊ឺន អធិការរងស្រុករតនមណ្ឌល ទទួលបន្ទុកព្រហ្មទណ្ឌ បានបដិសេធនូវចំនួនបទល្មើសដែលបានកើតឡើងរហូតដល់៦លើក តែលោកទទួលស្គាល់ថា «ពិតជាមានអំពើចោរកម្មមែន»។
ដំបូងលោកអធិការរងរូបនេះ បានទទួលស្គាល់ថា បទល្មើសបានកើឡើងតែ២លើកទេ គឺនៅផ្ទះអាជីវករ ឈ្មោះ កៅ គារ ភេទស្រី និងឈ្មោះវ៉ាត ម៉ៅ ភេទស្រី។ ប៉ុន្តែនៅពេលកោះសន្តិភាពបង្ហាញឈ្មោះជនរងគ្រោះបន្ថែមទៀត ដែលត្រូវចោរចូលលួចចុងក្រោយ ទើបលោកអធិការរងឆ្លើយថា គឺឡើងចំនួន៤លើក។ ប៉ុន្តែការបំភ្លឺនេះ គឺផ្ទុយពីសេចក្ដីរាយការណ៍ពីជនរងគ្រោះ និងពលរដ្ឋដែលអះអាងថា ចោរបានធ្វើសកម្មភាពជាបន្តបន្ទាប់ចំនួន៦លើក ដោយនៅខែមករា ១លើក និងនៅអំឡុងសប្ដាហ៍ចុងក្រោយ នៃខែកុម្ភៈ កន្លងទៅនេះ មានចំនួន៥លើក។
លោករស់ លឹមស៊ឺន អធិការរង បានចង្អុលប្រាប់អំពីតម្រុយនៃមុខសញ្ញាថា បើតាមការស្រាវជ្រាវលើមុខសញ្ញាជនសង្ស័យដែលធ្វើសកម្មភាពលួចយ៉ាងសកម្មខាងលើនេះ គឺមិនមែនជាមុខសញ្ញា ដែលរស់នៅក្នុងមូលដ្ឋានទេ គឺអាចពាក់ព័ន្ធនឹងមុខសញ្ញាមកពីស្រុកថ្មគោល។ ប៉ុន្តែលោកបញ្ជាក់ថា សកម្មភាពជនសង្ស័យនេះ ហាក់មិនបានលួចយកទ្រព្យសម្បត្តិធំដុំទេ គ្រាន់តែលួចយកខ្សែភ្លើងប៉ុន្មានដុំប៉ុណ្ណោះ ហើយសព្វថ្ងៃកម្លាំងរបស់លោកកំពុងពង្រឹងយ៉ាងមមាញឹកក្នុងការចុះល្បាតពេលរាត្រី។
បើតាមរបាយការណ៍បឋមដែលកោះសន្តិភាព ទទួលបានពីជនរងគ្រោះ និងពលរេដ្ឋ គឺ១-ឈ្មោះ កៅ គារ ត្រូវចោរលួចនាឡិការមានតំលៃ១គ្រឿង និងខ្សែភ្លើង១ដុំ ២-ឈ្មោះវ៉ាត ម៉ៅ ត្រូវចោរលួចទូរស័ព្ទស៊េរីទំនើបចំនួន២គ្រឿង ៣-ឈ្មោះ ណាក់ លក់ខោអាវ និងលក់ទូរស័ព្ទ ៤-ឈ្មោះការ៉េម រត់តាក់ស៊ី ៥-ឈ្មោះ ជា ពេជ្រ លក់ជី និង៦- នៅផ្ទះជួល តែមិនស្គាល់ឈ្មោះ។ ចំនួន៣ផ្ទះចុងក្រោយនេះ គេមិនទាន់ដឹងពីការបាត់បង់ទ្រព្យនោះទេ តែបើតាមព័ត៌មានថា ជនរងគ្រោះខ្លះ បានបាត់លុយរាប់ពាន់ដុល្លារ។
ពាក់ព័ន្ធនឹងអំពើចោរកម្មដែលកើតឡើងយ៉ាងកក្រើកអាជីវករនៅ «ផ្សារដំណាក់ស្ដៅ» ខាងលើនេះ បើតាមមន្ត្រីការិយាល័យជំនាញ នៃស្នងការខេត្ត បាននិយាយថា បើពិនិត្យលើរបាយការណ៍ដែលពលរដ្ឋបានរាយការណ៍អំពីបទល្មើសដែលបានកើតឡើងក្នុងខែកុម្ភៈ កន្លងទៅនេះ គឺហាក់មានចំនួនច្រើនគួរសម។ ប៉ុន្តែលោកសន និល អធិការស្រុក និងលោករស់ លឹមស៊ឺន អធិការរង មិនដែលបានរាយការណ៍ទៅកាន់ស្នងការខេត្ត នូវបទល្មើសម្ដងណាទេ។ ពោល គឺសមគំនិតគ្នាបិទបាំងព័ត៌មាននេះតែម្ដង។
មន្ត្រីដដែលបានបញ្ជាក់ថា បើយោងលើរូបភាព និងសកម្មភាពដដែលៗ ដែលជនល្មើសបានធ្វើសកម្មភាពជាបន្តបន្ទាប់នោះ គេសង្ស័យថា ជនស្មើសមិនមែនមកពីចម្ងាយ ដូចការអះអាងរបស់លោកអធិការរង រស់ លឹមស៊ឺន នោះទេ គឺជនដៃដល់អាចជាមុខសញ្ញានៅក្នុងមូលដ្ឋាននេះតែម្ដង ព្រោះជននេះហាក់ធ្វើសកម្មភាពដដែលៗ ហើយក៏មិនធំដុំដែរ។ ដូច្នេះមន្ត្រីមូលដ្ឋានមិនគួរលាក់បាំងបទល្មើសបែបនេះទេ គួរតែរាយការណ៍ជូនលោកស្នងការខេត្ត ដើម្បីមានវិធានការស្រាវជ្រាវរកមុខសញ្ញានេះ។
ជាមួយនឹងការបិទបាំងបទល្មើសរបស់លោកអធិការស្រុករតនមណ្ឌលនេះ លោកឧត្តមសេនីយ៍ត្រី ជេត វណ្ណនី ស្នងការរងខេត្ត បានមានប្រសាសថា ចំនួនបទល្មើសដែលបានកើតឡើងខាងលើនេះ លោកមិនដែលទទួលបានរបាយការណ៍ម្ដងណាទេ។ លោកស្នងការរងបានប្រាប់ថា បទល្មើសដែលបានកើតឡើង គេមិនគួរលាក់បាំងទេ។ ព្រោះវាបានធ្វើឲ្យមន្ត្រីជំនាញជួបការលំបាកក្នុងការស្រាវជ្រាវកំណត់មុខសញ្ញា និងមិនអាចបង្ក្រាបបាន ហើយជនប្រព្រឹត្តនៅតែបន្តរស់នៅក្រៅសំណាញ់ច្បាប់ ដើរធ្វើសកម្មភាពយ៉ាងគគ្លើនដដែល។
លោកជេត វណ្ណនី បានស្នើដល់លោកអធិការគ្រប់ស្រុក-ក្រុង ត្រូវតែរាយការណ៍ទៅការិយាល័យជំនាញ ឬលោកស្នងការខេត្ត អំពីបទល្មើសនានា ដែលបានកើតឡើងនៅក្នុងទឹកដីដែលខ្លួនគ្រប់គ្រង មិនត្រូវនាំគ្នាបិទបាំងបទល្មើសដ៏ច្រើនសន្ធឹកសន្ធាប់បែបនេះទេ។ បើនាំគ្នាលាក់បទល្មើសបែបនេះ តើយើងត្រូវធ្វើការស្រាវជ្រាវរកមុខសញ្ញាជនសង្ស័យបានដោយរបៀបណា?
លោកស្នងការរងបានបញ្ជាក់ដែរថា ប្រសិនបើចំនួនបទល្មើស បានកើតឡើងដូចការផ្ដល់ព័ត៌មានពីអាជីវករ និងប្រជាពលរដ្ឋខាងលើនេះមែន មន្ត្រីជំនាញនៃអធិការស្រុករតនមណ្ឌល គួរតែធ្វើរបាយការណ៍ជូនការិយាល័យជំនាញ និងលោកស្នងការខេត្ត ដើម្បីថ្នាក់លើមានវិធានការបន្តតាមនីតិវិធី មិនត្រូវនាំគ្នាលាក់បាំងបទល្មើសនេះបន្តទៅទៀតឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ