រាជធានីភ្នំពេញ ៖ បុរសម្នាក់បានបាត់បង់ជីវិតបន្ទាប់ពីបញ្ជូនទៅដល់មន្ទីរពេទ្យ និងម្នាក់ទៀតរងរបួសធ្ងន់ធ្ងរ ខណៈពេលជនរងគ្រោះទាំង២នាក់ជិះម៉ូតូមួយគ្រឿងឈប់ ដើម្បីឱ្យរថយន្តកុងតឺន័របត់ឆ្លងផ្លូវ ស្រាប់តែមានរថយន្តម៉ាកកមារីឆ្លាមមួយគ្រឿងទៀតបើកមុខពីក្រោយបុកម៉ូតូផ្ទប់ចូលក្រោមរថយន្តកុងតឺន័រ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១យប់ថ្ងៃទី២៩ ខែកុម្ភៈ ឆ្នាំ២០២០ ត្រង់ចំណុចគ្លីនិកឯកជនឯករាជ្យ ស្ថិតតាមបណ្ដោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។
ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះឈាន ពុទ្ធា ភេទប្រុស អាយុ៣៥ឆ្នាំ ជាមន្ត្រីប៉ូលិស មានទីលំនៅនៅភូមិសន្សំកុសល សង្កាត់បឹងទំពន់ ខណ្ឌមានជ័យ បានបាត់បង់ជីវិត និងម្នាក់ទៀតដែលរងរបួសធ្ងន់ធ្ងរឈ្មោះគុណ ប៊ុនថន ភេទប្រុស អាយុ២៩ឆ្នាំ ជាជាងកាត់សក់ ស្នាក់នៅភូមិឃុំកើតហេតុខាងលើ កំពុងសម្រាកព្យាបាលនៅគ្លីនិកឯក ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកស្គូពី ស៊េរីឆ្នាំ២០២០ ពណ៌ទឹកប្រាក់ ពាក់ស្លាកលេខ ភ្នំពេញ ១HK-៨៤១៨ រងការខូចខាតស្ទើរទាំងស្រុង ។
ចំណែករថយន្តមួយគ្រឿងម៉ាកកាមរីឆ្លាម ពណ៌ស្ករ ពាក់ស្លាកលេខ ភ្នំពេញ ២K-៣៦០០ រងការខូចខាតមួយកំណាត់មុខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ស្រមោល ។ រីឯរថយន្តកុងតឺន័រម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ៣E-៤០៦៥ អ្នកបើកបរមិនត្រូវបានស្គាល់ឈ្មោះឡើយ ត្រូវសមត្ថកិច្ចឃាត់ខ្លួន។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស២នាក់ជិះម៉ូតូមួយគ្រឿងធ្វើដំណើរតាមបណ្ដោយផ្លូវវ៉េងស្រេង ក្នុងទិសដៅពីលិចទៅកើត លុះ មកដល់ចំណុចកើតហេតុ ក៏បានឈប់ម៉ូតូ ដើម្បីឱ្យរថយន្តកុងតឺន័របត់ឆ្លងផ្លូវ ស្របពេលនោះស្រាប់តែមានរថយន្តម៉ាកកាមរីឆ្លាមបើកមកពីក្រោយក្នុងល្បឿនយ៉ាងលឿនក៏បានជ្រុលចង្កូតបុកម៉ូតូយ៉ាងពេញទំហឹង បណ្ដាលឱ្យម៉ូតូបោកផ្ទប់ចូលក្រោមរថយន្តកុងតឺន័រ ចំណែកអ្នកជិះម៉ូតូទាំងពីរនាក់បានរងរបួសយ៉ាងធ្ងន់ធ្ងរ។
តាមប្រភពដដែលបានបន្តឲ្យដឹងទៀតថា បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុហៅរថយន្តមកដឹកជនរងគ្រោះទៅសង្គ្រោះបន្ទាន់នៅគ្លីនិកឯកជនដែរ តែដោយសារជនរងគ្រោះម្នាក់រងរបួសធ្ងន់ធ្ងរពេកក៏បានបាត់បង់ជីវិតនៅពាក់កណ្ដាលផ្លូវ។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចការិយាល័យចរាចរណ៍ជើងគោករាជធានីភ្នំពេញចុះធ្វើការវាស់វែងយករថយន្ដទាំងពីរគ្រឿង និងអ្នកបើកបររថយន្តកុងតឺន័រ ព្រមទាំងម៉ូតូទៅរក្សាទុកនៅចរាចរណ៍ជើងគោករាជធានីភ្នំពេញរង់ចាំធ្វើការដោះស្រាយនៅពេលក្រោយ។ ចំណែកសពជនរងគ្រោះត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ