ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា ជនជាតិវៀតណាមម្នាក់ បានត្រូវមន្ត្រីឧទ្យានុរក្សចាប់ឃាត់ខ្លួនបានភ្លាមៗ ខណៈជននេះ និងបក្ខពួកបានធ្វើសកម្មភាពចាប់សត្វព្រៃ ដោយដាក់អន្ទាក់ចាប់សត្វក្ងោកចំនួន១ក្បាល ហើយព្យាយាមរត់គេចខ្លួន និងបន្សល់ទុកនូវវត្ដុតាងម៉ូតូ២គ្រឿងទៀតនៅកន្លែងកើតហេតុ។…
ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា ជនជាតិវៀតណាមម្នាក់ បានត្រូវមន្ត្រីឧទ្យានុរក្សចាប់ឃាត់ខ្លួនបានភ្លាមៗ ខណៈជននេះ និងបក្ខពួកបានធ្វើសកម្មភាពចាប់សត្វព្រៃ ដោយដាក់អន្ទាក់ចាប់សត្វក្ងោកចំនួន១ក្បាល ហើយព្យាយាមរត់គេចខ្លួន និងបន្សល់ទុកនូវវត្ដុតាងម៉ូតូ២គ្រឿងទៀតនៅកន្លែងកើតហេតុ។
សេចក្តីរាយការណ៍បន្តថា ហេតុការណ៍ខាងលើនេះកើតឡើងកាលពីថ្ងៃទី២២ ខែកុម្ភៈ ឆ្នាំ ២០២០ នៅចំណុចពាមអូរឡាវ ស្ថិតក្នុងភូមិកោះម្យើលលើ ឃុំណងឃីលឹក ស្រុកកោះញែក ខេត្តមណ្ឌលគិរី ក្នុងដែនជម្រកសត្វព្រៃស្រែពក។
សេចក្តីរាយការណ៍បន្តទៀតថា ជនសង្ស័យខាងលើ ឈ្មោះ ង្វៀង វ៉ាន់ស៊ី ភេទប្រុស អាយុ៥០ឆ្នាំ រស់នៅឃុំហ្វាំងលីវ ស្រុកហ្វាំងហ្វា ខេត្តដាក់ឡាក់។
បច្ចុប្បន្នមន្ត្រីឧទ្យានុរក្សដែនជម្រកសត្វព្រៃស្រែពក នៃមន្ទីរបរិស្ថានខេត្តមណ្ឌលគិរី បានកសាងសំណុំរឿងបញ្ជូនជនសង្ស័យខាងលើទៅសាលាដំបូងខេត្តមណ្ឌលគិរី ដើម្បីចាត់ការបន្តតាមនីតិវិធីច្បាប់ហើយ។
ក្រោយការសាកសួរ និងចោទប្រកាន់ដោយតំណាងអយ្យការ តាមបញ្ញត្តិមាត្រា៦១ និងមាត្រា៥៦ ជាបទល្មើសធនធានធម្មជាតិថ្នាក់ទី៣ នៃច្បាប់ស្ដីពីតំបន់ការពារធម្មជាតិ រួចមក ជនត្រូវចោទឈ្មោះ ង្វៀង វ៉ាន់ស៊ី ត្រូវបានចៅក្រមស៊ើបសួរនៃសាលាដំបូងខេត្តមណ្ឌលគិរី នៅរសៀលថ្ងៃទី២៤ ខែកុម្ភៈ ឆ្នាំ២០២០ សម្រេចឃុំខ្លួនដាក់ពន្ធនាគារបណ្ដោះអាសន្ននៅក្នុងខេត្តមណ្ឌលគិរី៕ (កែសម្រួលដោយ ៖ បុប្ផា)
ចែករំលែកព័តមាននេះ