ប្រទេសចិន ៖ ប្រធានាធិបតីចិនលោកស៊ីជីនពីងថ្លែងកាលពីថ្ងៃទី២៣កុម្ភៈថា បណ្ដាវិធានការដែលចិនប្រកាន់យក ដើម្បីទប់ការឆ្លងរាលដាលនៃវីរុសCOVID-19 កំពុងមានប្រសិទ្ធភាព ប៉ុន្តែការប្រយុទ្ធនៅតែស្ថិតក្នុងដំណាក់កាលសំខាន់ ប្រឆាំងគ្រោះអាសន្នសុខាភិបាលធ្ងន់ធ្ងរបំផុត ដែលចិនមិនធ្លាប់ជួបប្រទះចាប់តាំងពីការបង្កើតរបបកុំមុយនីស្តចិនពីឆ្នាំ១៩៤៩មក។ មេដឹកនាំចិនអះអាងថា…
ប្រទេសចិន ៖ ប្រធានាធិបតីចិនលោកស៊ីជីនពីងថ្លែងកាលពីថ្ងៃទី២៣កុម្ភៈថា បណ្ដាវិធានការដែលចិនប្រកាន់យក ដើម្បីទប់ការឆ្លងរាលដាលនៃវីរុសCOVID-19 កំពុងមានប្រសិទ្ធភាព ប៉ុន្តែការប្រយុទ្ធនៅតែស្ថិតក្នុងដំណាក់កាលសំខាន់ ប្រឆាំងគ្រោះអាសន្នសុខាភិបាលធ្ងន់ធ្ងរបំផុត ដែលចិនមិនធ្លាប់ជួបប្រទះចាប់តាំងពីការបង្កើតរបបកុំមុយនីស្តចិនពីឆ្នាំ១៩៤៩មក។
មេដឹកនាំចិនអះអាងថា សម្រាប់យើងគឺជាវិបត្តិមួយ ហើយក៏ជាការសាកល្បងដ៏ធំមួយដែរ។ បច្ចុប្បន្នសភាពការណ៍នៃការឆ្លងនៅតែធ្ងន់ធ្ងរនិងស្មុគ្រស្មាញ ហើយការងារបង្ការនិងត្រួតពិនិត្យ ស្ថិតក្នុងដំណាក់កាលដ៏លំបាកបំផុតនិងគ្រោះថ្នាក់បំផុត។
លោកបញ្ជាក់ថាភាពកំសាកនិងភាពទន់ជ្រាយមិនអាចមានឡើយ។ លោកបន្តថាការឆ្លងរាលដាលនឹងនាំឲ្យមានការប៉ះពាល់ខ្លាំងបំផុតលើសេដ្ឋកិច្ចនិងសង្គម តែរដ្ឋាភិបាលរបស់លោកនឹងផ្ដោតលើនយោបាយជួយទ្រទ្រង់ ដើម្បីឲ្យបណ្ដាទិសដៅនៃការអភិវឌ្ឍន៍សង្គម-សេដ្ឋកិច្ចត្រូវប្រកាន់យកក្នុងឆ្នាំ២០២០នេះ។
ចិននឹងរក្សានយោបាយរូបិយវត្ថុដែលមានការប្រុងប្រយ័ត្ន ហើយលាតត្រដាងបណ្ដាវិធានការថ្មីៗទៅតាមកាលបរិច្ឆេទសមស្រប។លោកលើកជាពិសេសពីលទ្ធភាពកាត់បន្ថយពន្ធដា ដោយជួយទ្រទ្រង់ដល់បណ្ដាសហគ្រាសធុនតូចដែលកំពុងជួបការលំបាក។
ប្រធានាធិបតីចិនក៏ទទួលស្គាល់ដែរភាពច្រឡោះប្រហោងនានា ក្នុងការឆ្លើយតបចំពោះការឆ្លងរាលដាលនៃវីរុស។ លោកថាគេត្រូវទាញយកបណ្ដាមេរៀននៃភាពច្រឡោះប្រហោងដែលជួបប្រទះ ក្នុងការឆ្លើយតបចំពោះការឆ្លង។
ក្នុងកិច្ចប្រជុំមួយជាមួយបណ្ដាមេដឹកនាំជាន់ខ្ពស់របស់ប្រទេស លោកស៊ីលើកឡើងទៀតថា ការឆ្លងរាលដាលនៃវីរុសCOVID-19 ដែលឆ្លងដល់មនុស្សជិត៧៧.០០០នាក់នៅចិន ក្នុងនោះបាត់បង់ជីវិតជាង២.៤០០នាក់ គឺជាវិបត្តិមួយនិងជាវិញ្ញាសារធំមួយសម្រាប់យើង៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ