ខេត្តបាត់ដំបង ៖ លោកថោង ខុន រដ្ឋមន្ត្រីក្រសួងទេសចរណ៍បានសង្កត់ធ្ងន់ថា កម្ពុជានៅតែជាគោលដៅទេសចរណ៍ប្រកបដោយសុខសន្តិភាព សុវត្ថិភាព ផ្តល់ភាពកក់ក្តៅសម្រាប់ភ្ញៀវជាតិ និងអន្តរជាតិ ការលើកឡើងបែបនេះត្រូវបានធ្វើឡើងក្នុងកិច្ចប្រជុំត្រៀមរៀបចំពិធីបុណ្យទន្លេ…
ខេត្តបាត់ដំបង ៖ លោកថោង ខុន រដ្ឋមន្ត្រីក្រសួងទេសចរណ៍បានសង្កត់ធ្ងន់ថា កម្ពុជានៅតែជាគោលដៅទេសចរណ៍ប្រកបដោយសុខសន្តិភាព សុវត្ថិភាព ផ្តល់ភាពកក់ក្តៅសម្រាប់ភ្ញៀវជាតិ និងអន្តរជាតិ ការលើកឡើងបែបនេះត្រូវបានធ្វើឡើងក្នុងកិច្ចប្រជុំត្រៀមរៀបចំពិធីបុណ្យទន្លេ នៅសាលាខេត្តបាត់ដំបង នាថ្ងៃទី២២ ខែកុម្ភៈ ដែលមានការចូលរួមពីលោក ថោង ខុន រដ្ឋក្រសួងទេសចរណ៍ និងងួន រតនៈ អភិបាលនៃគណៈអភិបាលខេត្តបាត់ដំបង មន្ត្រីពាក់ពន្ធ័ជាច្រើនរូប ។
លោករដ្ឋមន្ត្រីបានលើកឡើងថា កម្ពុជាក៏ដូចជា ពិភពលោកទាំងមូលកំពុងតែខិតខំប្រយុទ្ធប្រឆាំងជាមួយជំងឺ Covid-19 ដើម្បីទាក់ទាញកំណើនទេសចរដែលកំពុងមានការធ្លាក់ចុះមកវិញ ខណៈកម្ពុជានៅតែជាគោលដៅទេសចរណ៍ប្រកបដោយសុខសន្តិភាព សុវត្ថិភាព ផ្តល់ភាពកក់ក្តៅ គ្មានការភ័យព្រួយរឿងឆ្លងជំងឺនេះឡើយ ព្រោះក្រោមការដឹកនាំរបស់សម្តេចតេជោនាយករដ្ឋមន្ត្រី គ្រប់ផ្នែក គ្រប់ជំនាញ ពិសេសជំនាញសុខាភិបាលបានធ្វើការដោយហ្មត់ចត់ ប្រកបដោយសីលធម៌វិជ្ជាជីវៈ និងការទទួលខុសត្រូវខ្ពស់ចំពោះសុខភាពរបស់ប្រជាពលរដ្ឋកម្ពុជាក៏ដូចសម្រាប់មនុស្សជាតិទាំងមូល ។
លោកថា ភ្ញៀវទេសចរមកពីកប៉ាល់ Westerdam សុទ្ធតែបានសម្ដែងនូវការកោតសរសើរចំពោះកម្ពុជា ដែលបានផ្តល់នូវបដិសណ្ឋារកិច្ចស្វាគមន៍គ្រប់ទីកន្លែង និងផ្តល់ភាពកក់ក្តៅដល់ពួកគេ ។ លោករដ្ឋមន្ត្រីបានបន្តថា ដើម្បីសម្រេចបានកំណើនទេសចរមកវិញកម្ពុជាបានខិតខំជំរុញចលនាទេសចរក្នុងស្រុកខិតខំពង្រីកការផ្សព្វផ្សាយពីគោលដៅទេសចរណ៍របស់ខ្លួនទៅកាន់ទីផ្សារទេសចរណ៍អន្តរជាតិនានាខិតខំបង្កើតព្រឹត្តិការណ៍ទេសចរណ៍នានា ។
ជាក់ស្ដែងពិធីបុណ្យទន្លេនៅខេត្តបាត់ដំបងនេះក៏ជាព្រឹត្តិការណ៍ទេសចរណ៍ដ៏ធំមួយដែរ ដែលនឹងចូលរួមចំណែកជំរុញចលនាទេសចរក្នុងស្រុក និងទាក់ទាញទេសចរអន្តរជាតិមួយចំនួនផងដែរ ។ លោករដ្ឋមន្ត្រី ថោង ខុន បានផ្ដល់អនុសាសន៍ឱ្យពង្រីកការផ្សព្វផ្សាយពីព្រឹត្តិការណ៍បុណ្យទន្លេទៅដល់ទីផ្សារទេសចរណ៍ក៏ដូចជា ទៅដល់ប្រជាពលរដ្ឋក្នុងប្រទេសឱ្យកាន់តែខ្លាំងជាងមុន ដើម្បីចូលរួមចំណែកក្នុងការជំរុញចលនាទេសចរក្នុងប្រទេស ស្របដែលមានវិបត្តិនៃការរីករាលដាលជំងឺ Covid-19 ខណៈដែលកម្ពុជាកំពុងខិតខំប្រឹងប្រែងផ្សព្វផ្សាយថា ប្រទេសខ្លួនជាគោលដៅទេសចរណ៍ប្រកបដោយភាពកក់ក្ដៅ និងសុវត្ថិភាពមិនភ័យព្រួយពីបញ្ហាឆ្លងវីរុសកូរ៉ូណា ប្រភេទថ្មីដូចប្រទេសដទៃឡើយ ។
លោករដ្ឋមន្ត្រីបានបង្ហាញការរំពឹងទុកថា ពីធីបុណ្យទន្លេនៅខេត្តបាត់ដំបងនៅឆ្នាំនេះនឹងទទួលបានភ្ញៀវទេសចរមិនតិចជាង១លាននាក់ ដោយរំពឹងទទួលបានចំណូលក្នុងរង្វង់ ៥០លានដុល្លារ (ទេសចរម្នាក់ចាយមិនក្រោម៥០ដុល្លារ) ពីព្រោះខេត្តបាត់ដំបង ជាគោលទេសចរណ៍ទី២ មានសក្ដានុពលទេសចរណ៍គួរឱ្យទាក់ទាញ និងមានបន្សល់នូវសម្បត្តិបេតិកភណ្ឌជាច្រើនសម្បូរបែប ម្យ៉ាងនៅជិតគោលដៅទេសចរណ៍សៀមរាប-អង្គរថែមទៀត ហើយអាចមានលំហូរពីខាងប្រទេសថៃ ។
លោកក៏បានផ្ដល់អនុសាសន៍ដល់អនុគណៈកម្មការកីឡាអញ្ជើញក្រុមកីឡាករគុនសៅលីញពីប្រទេសចិន ឱ្យចូលរួមសម្ដែងប្រកួតក្នុងពិធីបុណ្យទន្លេ ដើម្បីឱ្យព្រឹត្តិការណ៍កីឡាកាន់តែអធិកអធម ក្រៅពីកីឡាប្រដាល់គុនខ្មែរ និងកម្មវិធីកីឡាជាច្រើនទៀត ។ លោករដ្ឋមន្ត្រីក្រសួងទេសចរណ៍បានណែនាំឱ្យមានការឃោសនាផ្សព្វផ្សាយពីការសម្ដែងសិល្បៈរបាំ ល្ខោនបាសាក់ ការប្រគំតន្ត្រី ដល់ប្រជាពលរដ្ឋនៅតាមភូមិស្រុកជនបទ ដើម្បីឱ្យប្រជាជនបានទស្សនាការសម្ដែងសិល្បៈល្អៗមកពីថ្នាក់ជាតិ និងផ្សព្វផ្សាយពីវប្បធម៌ជាតិដល់ពួកគេផងដែរ ៕
ចែករំលែកព័តមាននេះ