ខេត្តព្រះវិហារ ៖ សេចក្តីរាយការណ៍បឋមបានឲ្យដឹងថា អាជ្ញាធរខេត្តព្រះវិហារបានអំពាវនាវដល់ប្រជាពលរដ្ឋនៅទូទាំងខេត្តព្រះវិហារប្រុងប្រយ័ត្នអោយបានខ្ពស់ក្នុងការបង្ការនឹងទប់ស្កាត់កុំអោយមានអគ្គិភ័យកើតឡើងខណៈក្នុងឆ្នាំ២០១៩ កន្លងទៅនេះខេត្តព្រះវិហារគ្រោះអគ្គីភ័យមានការកើនឡើង១៤លើក ។
ថ្លែងក្នុងទិវាជាតិបង្ការ និងពន្លត់អគ្គីភ័យលើកទី៥ នៅមណ្ឌលកីឡាដ្ឋានខេត្តព្រះវិហារចុងសប្ដាហ៍កន្លងទៅនេះលោក ស៊ូ សិរី អភិបាលរងខេត្តព្រះវិហារមានប្រសាសន៍ថា បញ្ហាគ្រោះអគ្គីភ័យនៅតែជាបញ្ហាដែលអាជ្ញាធរយកចិត្តទុកដាក់ និងត្រៀមបង្ការជាប់ជាប្រចាំ ពិសេសនោះនៅពេលរដូវប្រាំងមានភ្លើងឆេះព្រៃតែម្តង វាអាចបណ្តាលអោយឆេះរាលដាលដល់ផ្ទះសម្បែងប្រជាពលរដ្ឋ ជាយថាហេតុ ប្រសិនបើប្រជាពលរដ្ឋពុំមានការប្រុងប្រយ័ត្នទេនោះ ។
លោកថា ម្យ៉ាងវិញទៀត នៅពេលមានពិធីបុណ្យទានពលរដ្ឋខ្លះដុតធូបទៀនដោយមានការធ្វេសប្រហែសក៏អាចបង្កអោយកើតជាអគ្គីភ័យមួយផ្នែកដែរ ។ ដូច្នេះហើយលោកក៏បានទទូចដល់ប្រជាពលរដ្ឋក៏ដូចជាកសិករត្រូវប្រុងប្រយ័ត្នជានិច្ចមុននឹងចាកចញពីលំនៅឋានត្រូវពិនិត្យមើលភ្លើងចង្ក្រានទៀនធូបនឹងអគ្គិសនីអោយបានត្រឹមត្រូវ ដើម្បីចៀសវាងការបង្កជាអគ្គីភ័យបំផ្លាញផ្ទះសម្បែង ទ្រព្យសម្បត្តិ ដែលយើងមិនអាចដឹងមុនបាន ។
ជាមួយគ្នានេះ លោកឧត្តមសេនីយ៍ត្រី ចាន់ សាមឿន ស្នងការរងនគរបាលខេត្តព្រះវិហារ បានបង្ហាញថា ក្នុងឆ្នាំ២០១៩កន្លងទៅនេះ ខេត្តព្រះវិហារ មានគ្រោះអគ្គីភ័យបានកើតឡើងចំនួន៣០លើកកើនឡើង១៤លើក ក្នុងនោះឆេះតូបចំនួន០១ ឆេះផ្ទះចំនួន២៥ខ្នង និងទ្រព្យសម្បត្តិមួយចំនួនទៀត នេះបើធៀបនឹងឆ្នាំ២០១៨កន្លងទៅ ៕
ចែករំលែកព័តមាននេះ