លុបបំបាត់មន្ត្រីឡេមឡឺម ! សម្តេចតេជោ ៖ ដំណែងអភិខេត្តដកតែ៣ម៉ោង និងអភិបាលរង១៥នាទីប៉ុណ្ណោះ

ថ្ងៃទី ២១ ខែ កុម្ភៈ ឆ្នាំ ២០២០
ម៉ោង ១៥:១៤
អ៊ាង ប៊ុនរិទ្ធ

រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ការដកដំណែងអភិបាលមួយៗចំណែកពេលតែ៣ម៉ោង ហើយអភិបាលរងតែ១៥នាទីប៉ុណ្ណោះ អីញ្ចឹងត្រូវលុបបំបាត់មន្ត្រីឡេមឡឺម ។ លើកឡើងក្នុងពិធីបិទសន្និបាតបូកសរុបលទ្ធផលការងារ ឆ្នាំ២០១៩ និងលើកទិសដៅការងារ ឆ្នាំ២០២០ កាលពីថ្ងៃទី២០ ខែកុម្ភៈនេះ របស់ក្រសួងមហាផ្ទៃ សម្តេចតេជោបានដាស់តឿន អភិបាលខេត្តថ្មីទាំងអស់ដែលទើបតែឡើងកាន់ដំណែងមិនត្រូវធ្វើការមើលងាយប្រធានក្រុមប្រឹក្សានោះទេ ។

ខ្ញុំពិបាកដកប្រធានក្រុមប្រឹក្សា តែអភិបាលខេត្តត្រឹម៣ម៉ោង ចំណែកចៅហ្វាយស្រុក និងអភិបាលរងខេត្តប្រើពេលតែ១៥នាទីដកចោលស្រួល ព្រោះទម្រង់មានជាការស្រេចដោយគ្រាន់តែបញ្ចូលឈ្មោះថ្មី ស៊ីញ៉េបោះត្រាចប់ ។ សម្តេចតេជោបានគូសបញ្ជាក់ថា ៖«មន្ត្រីឡេមឡឺមតែងតែរត់ទៅរត់រកកន្លែងណាដែលតែងតាំង អាហ្នឹងមន្ត្រីឡេមឡឺម អីញ្ចឹងដើម្បីកុំឲ្យមន្ត្រីនឹងរត់ទៅកៀកអ្នកនេះកៀកអ្នកនោះវិធីតែមួយគត់ គឺប្រធានក្រុមប្រឹក្សា និងអភិបាលនៅជាមួយគ្នាលើការតែងតាំងមន្ត្រី ។ ធ្វើដូច្នេះកុំឲ្យមានការបែងចែកធ្វើឲ្យកម្លាំងទៅប្រមូលផ្តុំតែមួយ ហើយលុបបំបាត់មន្ត្រីឡេមឡឺម ។

បើមិនដូច្នេះទេ ចៅហ្វាយខេត្តចេះតែមានសិទ្ធិស៊ីញ៉េតែងតាំងអ្នកនេះ អ្នកនោះ ព្រោះប្រធានក្រុមប្រឹក្សាមិនមានសិទ្ធិស៊ីញ៉េតែងតាំងទេ ហើយអភិបាលចេះស៊ីញ៉េដាក់អ្នកនេះ ដាក់អ្នកនោះ ធ្វើឲ្យមានជំងឺបែកបាក់គ្នា» ។ សម្តេចបន្តថា នៅក្នុងខេត្តកណ្តាលមានការស្នើសុំច្រើននាក់ ប៉ុន្តែសម្តេចបានសម្រេចដោយឆន្ទានុសិទ្ធិរបស់សម្តេចតែម្តង ។ ចៅហ្វាយខេត្តកណ្តាលសម្តេចបានតេធ្វើការទាក់ទងទៅសម្តេច ស ខេង ដោយកំណត់យកលោក គង់ សោភ័ណ្ឌ ជាអភិបាលខេត្ត ប៉ុន្តែមិនទាន់ប្រកាសផងក៏មានបញ្ហានូវអភិរងទៀតរហូតដល់អភិបាលស្រុកថែមទៀត ។

សម្តេចតេជោ បានសង្កត់ធ្ងន់ថា ៖«ដើម្បីលុបបំបាត់មន្ត្រីឡេមឡឺមនោះ គឺអភិបាលខេត្តជាមួយប្រធានក្រុមប្រឹក្សា ព្រោះនឹងមានមាត់ចាប មាត់ខ្យងជាមិនខាន» ។ ជាមួយគ្នានោះដែរ សម្តេចតេជោទទូចកុំឲ្យមានការបញ្ជូនមន្ត្រីថ្នាក់ជាតិចុះទៅដណ្តើមតួនាទីមន្ត្រីថ្នាក់មូលដ្ឋាននោះទេ ។ ការធ្វើបែបនេះទុកឱកាសឲ្យខាងមូលដ្ឋានរៀបចំមន្ត្រីរបស់គេ ។ ក្នុងឱកាសនោះដែរ សម្តេចតេជោក៏បានឲ្យមានការកំណត់ថ្ងៃប្រជុំក្រុមប្រឹក្សារាជធានីខេត្តឲ្យបានជាក់លាក់មួយផងដែរ ។

សម្តេចបន្តថា នៅថ្ងៃសុក្រក្នុងសប្តាហ៍យើងប្រជុំគណៈរដ្ឋមន្ត្រី អីញ្ចឹងយកថ្ងៃព្រហ្មស្បត្តិ៍ប្រជុំគណៈ អភិបាលទៅរៀងរាល់សប្តាហ៍ទី៤ នៃខៃនីមួយៗត្រូវប្រជុំគណៈអភិបាលជាមួយក្រុមប្រឹក្សា ។ ចំណែកតាមខេត្តនីមួយៗយកការប្រជុំខ្លះអាទិត្យទី១ ខ្លះយកអាទិត្យទី៣ ប្រជុំ ឬអាទិត្យទី២ ជារឿងរបស់ខេត្តនីមួយៗ ។ ប៉ុន្តែហាមដាច់ខាតការអវត្តមានអភិបាលខេត្ត ត្រូវធ្វើគណនេយ្យភាពជាមួយក្រុមប្រឹក្សា ។

សម្តេចបញ្ជាក់ថា ៖«អីញ្ចឹងខ្ញុំសូមដាស់តឿន ស្រុកក៏ដូចគ្នាដែរ ព្រោះមានក្រុមប្រឹក្សាដែរ ដែលក្រុមប្រឹក្សានេះប្រៀមដូចជា សភាខេត្ត សភាស្រុក សភាខណ្ឌ អីញ្ចឹងជាពិសេសនោះប្រធានក្រុមប្រឹក្សាខេត្ត ស្រុក ប្រៀបដូចជា សហប្រធានអីញ្ចឹង ។ ពេលខ្លះត្រូវដឹកដៃគ្នាប្រជុំតែពីរនាក់ ដើម្បីធ្វើការដោះស្រាយបញ្ហា ហើយគ្មានកើតជំងឺបែកបាក់» ។

សម្តេចតេជោក៏បានលើកឡើងថា នេះជាបទបញ្ជាមិនមែនជាច្បាប់ទេ តែវាមិនខុសច្បាប់នោះទេ ដោយកន្លងមកអស់លោកមិនបានធ្វើនៅកន្លែងខ្លះ ។ ការធ្វើបែបនេះ ដើម្បីពង្រឹងប្រសិទ្ធភាពការងារ ពិសេសនោះការតែងតាំងមន្ត្រី ដែលការតែងតាំងនេះចាំបាច់ត្រូវតែពិភាក្សាគ្នា ។ សម្តេចលើកករណីការតែងតាំងអភិបាលខេត្តកណ្តាលថ្មីគ្មាននណាម្នាក់ដឹងឡើងជាអភិបាលខេត្តនោះទេ គ្រាន់តែខ្ញុំ «សម្តេច»ហៅទូរស័ព្ទទៅសម្តេច ស ខេង ភ្លាមចេញប្រុយតែម្តង ដែលអ្នកខ្លះប៉ាន់ស្មានអ្នកនេះ អ្នកនោះ ។ ប៉ុន្តែគ្មានអ្នកណាដឹងនោះទេ ។
សម្តេចក៏បានលើកឡើងថា ការដកលោក ម៉ៅ ភិរុណ អតីតបាលខេត្តកណ្តាលមកធ្វើជានាយករដ្ឋខុន្ទកាល័យសម្តេចផ្ទាល់ ហើយជាបន្តធ្វើជាប្រធានក្រុមប្រឹក្សាភិបាលនៅខេត្តកណ្តាលផងដែរ ដើម្បីធ្វើការបន្តទៀត ៕