ខេត្តកំពត ៖ ស្ត្រីដើរបេះស្លឹកអំពិល និងបេះស្តៅលក់ម្នាក់ត្រូវរន្ទះបាញ់ស្លាប់ចោលកូនតូចៗ៤នាក់ កាលពីវេលាម៉ោង២រសៀល ថ្ងៃទី២២ សីហា ២០១៤ ខណៈពេលស្ត្រីរូបនោះដើរចេញពីផ្ទះទាំងភ្លៀងរលឹមជាមួយកូនស្រីអាយុ៦ឆ្នាំទៅបេះស្លឹកអំពិល ក្តិបអំពិល និងត្រួយស្តៅនៅខាងត្បូងផ្ទះចម្ងាយកន្លះគីឡូម៉ែត្រ ស្ថិតក្នុងភូមិកោះទន្សែ ឃុំទូកមាសខាងលិច ស្រុកបន្ទាយមាស។
ស្ត្រីរងគ្រោះត្រូវគេស្គាល់ឈ្មោះនាង មឿន អាយុ៣២ឆ្នាំ មានប្តី និងកូន៤នាក់ រស់នៅភូមិ-ឃុំកើតហេតុខាងលើ។ តាមការឱ្យដឹងពីបុរសជាប្តីស្ត្រីរងគ្រោះបានឱ្យដឹងថា គ្រួសារគាត់មានជីវភាពខ្សត់ខ្សោយណាស់ ប៉ុន្តែពេលរន្ទះបាញ់ប្រពន្ធគាត់នេះ គាត់មិនបាននៅផ្ទះទេ គឺគាត់ទៅធ្វើកម្មករលីស្រូវឱ្យគេនៅឯភ្នំកន្លង់ឯណោះ។
ក្រោយកើតហេតុការណ៍នេះមួយថ្ងៃ នៅព្រឹកថ្ងៃទី២៣ សីហា លោកមួង នឿន អភិបាលស្រុកបន្ទាយមាស រួមដំណើរដោយលោកស្រីមេឃុំទូកមាសខាងលិច លោកមេភូមិកោះទន្សែបានចុះសួរសុខទុក្ខគ្រួសារស្ត្រីរងគ្រោះ ដោយផ្តល់ប្រាក់អំណោយចំនួន២២ម៉ឺនរៀលជូនគ្រួសារស្ត្រីរងគ្រោះសម្រាប់ចាត់ចែងក្នុងពិធីបុណ្យផងដែរ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ