វីរុស COVID-19 ៖ អ្នកបាត់បង់ជីវិតឡើងជាង២.១១៨នាក់ រីឯការឆ្លងហាក់ចុះថយ

ថ្ងៃទី ២០ ខែ កុម្ភៈ ឆ្នាំ ២០២០

ម៉ោង ១៥:៣៣

ប្រទេសចិន ៖ ចំនួនអ្នកឆ្លងវីរុស COVID-19ថ្មីនៅចិន ដែលអាជ្ញាធរចិនបានប្រកាសនាថ្ងៃទី២០កុម្ភៈ ហាក់មានការចុះថយយ៉ាងច្បាស់ ហើយអង្គការសុខភាពពិភពលោកWHOបានសម្ដែងការអបអរសាទរ ចំពោះការរីកចម្រើនដ៏ធំធេង ដើម្បីឈានទៅរាំងខ្ទប់ការឆ្លងខណៈតុល្យការនៃចំនួនអ្នកបាត់បង់ជីវិតបានឡើងដល់២.១១៨នាក់នៅចិនដីគោក ជាមួយអ្នកឆ្លងថ្មី៣៩៤នាក់នាំឲ្យចំនួនអ្នកឆ្លងសរុបឡើងដល់៧៤.៥៧៦នាក់។

នៅហុងកុងកត់សម្គាល់ឃើញអ្នកបាត់បង់ជីវិតទី២ម្នាក់ទៀត ហើយអ៊ឺរ៉ង់ប្រកាសពីមនុស្សបាត់បង់ជីវិត២នាក់ដោយសារវីរុសនេះ។ ចំណែកមនុស្ស២អ្នកជាអ្នកឆ្លងវីរុសនៅលើនាវាកម្សាន្តDIAMOND PRINCESSក៏បានបាត់បង់ជីវិតដែរ។

សរុបមានមនុស្សបាត់បង់ជីវិតថ្មី១០៨នាក់ទៀតត្រូវបានជម្រឿនឃើញនាថ្ងៃទី១៩កុម្ភៈ ក្នុងខេត្តហ៊ូប៉ី ដែលជាចំណុចចាប់ផ្ដើមនៃការឆ្លង ចាប់តាំងពីខែធ្នូមក។ មានមនុស្សឆ្លងថ្មីតែ៣៤៩នាក់ក្នុងខេត្តត្រូវបានកត់សម្គាល់ឃើញដែលនោះជាការចុះថយយ៉ាងខ្លាំង បើប្រៀបធៀបទៅនឹងអ្នកឆ្លងថ្មី១.៦៩៣នាក់រាយការណ៍នាថ្ងៃទី១៩កុម្ភៈ។ នេះបើតាមអាជ្ញាធរសុខាភិបាលខេត្តហ៊ូប៉ីដែលក៏លើកពីការចុះថយចំនួនអ្នកឆ្លង នាបណ្ដាថ្ងៃមុនៗដែរ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)

អត្រាប្តូរប្រាក់

អត្រាប្តូរប្រាក់ផ្សេងទៀត