រាជធានីភ្នំពេញ ៖ បន្ទាប់ពីរងនូវការ បរាជ័យទាំងមិនអស់ចិត្តក្រោមកណ្ដាប់ដៃកីឡាករកម្ពុជាមឿន សុខហ៊ុច កាលពីឆ្នាំ២០១៩កន្លងទៅ នៅថ្ងៃទី២២ កុម្ភៈ ខាងមុខនេះ ក្នុងកម្មវិធីប្រដាល់«កម្ពុជា សង្វៀនគុនខ្មែរ» កីឡាករថៃវីណៃឡេក ផ.រ៉ាំងសាន់ បានស្នើសុំសងសឹកហើយភ្លាមៗមឿន សុខហ៊ុច បានប្រកាសស្វាគមន៍សំណូមពរនេះដោយរីករាយ។
មុននឹងឈានជើងមកប្រកួតលើកនេះ វីណៃឡេក បានប្រើពេលយ៉ាងយូរក្នុងការហ្វឹក ហាត់ដើម្បីសងសឹកមឿន សុខហ៊ុច ។ ទោះបី យ៉ាងណាជើងខ្លាំងប្រចាំក្លិបពុទ្ធសេរីវង្សរូប នេះមិនត្រឹមតែប្រកាសស្វាគមន៍ប៉ុណ្ណោះទេថែមទាំងប្ដេជ្ញាថានឹងផ្ដល់មេរៀនជូរចត់ដល់កីឡាករថៃសាជាថ្មីទៀតផង ។
នៅថ្ងៃនោះដែរកីឡាករ ថា សារុន ដែលត្រូវជាសិស្សប្អូនមឿន សុខហ៊ុច ត្រូវបានគេផ្គូផ្គងឱ្យជួបប្រកួតជាមួយកីឡាករថៃ ភិតណាមអេក ស.ស.ប៉ាកន ។ កីឡាករថៃម្នាក់នេះធ្លាប់មកប្រកួតនៅស្រុកខ្មែរច្រើនលើករួចមកហើយគ្រាន់តែមិនធ្លាប់ជួបថា សារុនប៉ុណ្ណោះ ។ថា សារុន មួយរយៈចុងក្រោយនេះមិនសូវឃើញលេចមុខលើសង្វៀនប៉ុន្មានទេ តែអ្នកប្រដាល់ចាស់វស្សារូបនេះត្រូវបានគេចាត់ទុកថាជាខ្លាចាស់កំពូលល្បិច ដែលដៃគូល្មមៗពិបាកទប់ទល់ខ្លាំងណាស់ ។ លើកនេះគេប៉ះចំជើងខ្លាំងប្រចាំប្រទេសថៃ មិនដឹងថាអ្នកណាខ្លាំងជាងអ្នកណានោះទេ ។
មួយគូទៀត កីឡាករ កូយ ឡាយ មកពីក្លិបកងពលតូចទ័ពពិសេសឆត្រយោង៩១១ ប្រកួតជាមួយកីឡាករថៃ ភិតដាំ ពៀកខាឃែរ៍។
កូយ ឡាយ ក៏ខានឡើងសង្វៀនប្រកួតយូរខែមកហើយដែរ លើកនេះត្រូវបានគណៈកម្មការរៀបចំការប្រកួតផ្គូផ្គងឱ្យជួបប្រកួតជាមួយកីឡាកថៃ ភីតដាំ ដែលមានបទពិសោធន៍ប្រកួតនៅលើសង្វៀមិនតិចឆ្នាំនោះទេ ។
ប៉ុន្តែកុំភ្លេចថា គូនេះមិនធ្លាប់ប៉ះគ្នាពីមុនមកទេ ដូច្នេះសម្រាប់ការប្រកួតលើកនេះអត់មានអ្នកណាហ៊ានទាយទុកមុនថាយ៉ាងណានោះទេ អ្នកណាខ្លាំងជាងអ្នកណាមានតែចាំមើលការប្រកួតជាក់ស្ដែងប៉ុណ្ណោះ។ចំណែកគូប្រកួតមិត្តភាពធម្មតាវិញ កីឡាករ ធា វាសនា មកពីក្លិបរាជសីហ៍ខេត្តរតនគីរី ប្រកួតជាមួយកីឡាករ ចិត្រ សុភី មកពីក្លិបរស្មីភូមិគាបខេត្តបន្ទាយមានជ័យ៕ (កែសម្រួលដោយ ៖ បុប្ផា)
ចែករំលែកព័តមាននេះ