សប្បុរសជនជួយឧបត្ថម្ភដល់កុមារកំព្រានៅអង្គការផ្ទះបាយកុមារ
- ភ្នំពេញ
រាជធានីភ្នំពេញ ៖ កាលពីវេលាម៉ោង៨និង៣០នាទីព្រឹក ថ្ងៃទី១៨ ខែកុម្ភៈ ឆ្នាំ២០២០ សប្បុរសជនមួយក្រុមដោយមានការចូលរួមអំពីសំណាក់លោកជំទាវ ឆាយ ស៊ីណា ជីវកេង…
រាជធានីភ្នំពេញ ៖ កាលពីវេលាម៉ោង៨និង៣០នាទីព្រឹក ថ្ងៃទី១៨ ខែកុម្ភៈ ឆ្នាំ២០២០ សប្បុរសជនមួយក្រុមដោយមានការចូលរួមអំពីសំណាក់លោកជំទាវ ឆាយ ស៊ីណា ជីវកេង , លោកជំទាវឧកញ៉ា យីន ផាន្នី ថុង អ៊ុយប៉ាង ស្ថាបនិកកាសែតកោះសន្តិភាព, លោកជំទាវ ប៉ែន អ៊ាន, លោកជំទាវ គីម ចន្ធូ នឹម ថូត និងលោកស្រី ទឹម សុខា នាយិការសាលាបឋមសិក្សាជ័យជំនះ បាននាំនូវថវិកាចំនួន១លាន៥០ម៉ឺនរៀល និង១០០ដុល្លារ សម្ភារៈសិក្សាចំនួន២០០កញ្ចប់ រួមទាំងនំចំណី និងស្បែកជើងចំនួន១កេសផងដែរ។
ដើម្បីទៅចែកជូនដល់ក្រុមក្មេងៗអនាថា ក្មេងកំព្រា និងក្មេងៗដើររើសអេតចាយ ដែលមកពីតាមបណ្តាតំបន់អនាធិបតេយ្យមួយចំនួនមានដូចជា តំបន់បឹងត្របែក ស្ទឹងមានជ័យ និងតំបន់អនាធិបតេយ្យក្បែរផ្សារសុវណ្ណា ចំនួន២៥០នាក់នៅអង្គការផ្ទះបាយកុមារ ដែលមានទីតាំងនៅតាមបណ្តោយផ្លូវលេខ ១១៣ (ខាងក្រោយ សាលាបឋមសិក្សាជ័យជំនះ) ក្នុងសង្កាត់បឹងកេងកងទី៣ ខណ្ឌបឹងកេងកង។
លោកជំទាវ ប៉ែន អ៊ាន បានមានប្រាសាសន៍ថា ពេលនេះដែរ ក្នុងនាមរូបនាងខ្ញុំផ្ទាល់ ក៏ដូចជាលោកជំទាវៗជាមិត្តភក្តិទាំងអស់គ្នា បាននាំយកនូវអំណោយមួយចំនួនមានដូចជា ថវិកា សម្ភារៈសិក្សា នំចំណី និងស្បែកជើង រួមទាំងរបស់ប្រើប្រាស់មួយចំនួនទៀត បានយកមកចែកជូនដល់ក្រុមកុមារកំព្រា ដោយខ្លះក៏មានឪពុកម្តាយ ខ្លះទៀតមិនមានឪពុកម្តាយ ខ្លះម្តាយកើតអេដស៍ ម្តាយឈឺ ដូច្នេះការរៀនសូត្ររបស់ពួកគេក៏មិនបានរៀន និងក្រោយពីបានដឹងពីមិត្តភក្តិក៏បាននាំគ្នាយកមកធ្វើការឧបត្ថម្ភក្រុមកុមារកំព្រាទាំងអស់គ្នានេះតែម្តង។
លោកជំទាវ ថ្លែងថា ដោយទឹកចិត្តរបស់ពួកយើងខ្ញុំ មានការសប្បាយរីករាយ ដោយបានឃើញកុមារកំព្រាទាំងអស់របស់យើងនៅទីនេះ បានអង្គការផ្ទះបាយកុមារជាបង្អែក ហើយពួកយើងក៏កំពុងតែធ្វើការអំពាវនាវទៅដល់បណ្តាមិត្តភក្តិ សប្បុរសជន ដើម្បីជួយឧបត្ថម្ភជាបន្តបន្ទាប់ទៅទៀតផងដែរ។
លោកជំទាវក៏បានថ្លែងបន្តទៀតថា ឃើញថា ក្រុមក្មេងទាំងនេះ ពួកគេមានជីវភាពរស់នៅជួបការលំបាកយ៉ាងខ្លាំង ដោយខ្លះដើរសុំទាន ខ្លះដើររើសអេតចាយ និងខ្លះទៀតដើរគេងនៅតាមសួនច្បារសាធារណៈជាដើម ដោយពួកយើងខ្ញុំបានឃើញអំពីស្ថានភាពបែបនេះ ក៏មានចិត្តជ្រះថ្លាបបួលគ្នាមកជួយឧបត្ថម្ភដល់កុមារកំព្រាៗទាំងនេះ និងជាទឹកចិត្តរបស់ពួកយើងខ្ញុំទាំងអស់គ្នាផងដែរទៅដល់ពួកគេ។
លោក ង៉ូវ ឈីវ ប្រធានអង្គការផ្ទះបាយកុមារបានថ្លែងថា អង្គការផ្ទះបាយកុមាររបស់លោក គឺជាអគារស្បៀងអាហារសំរាប់ក្មេងៗកំព្រា ក្មេងអនាថា ក្មេងៗដើររើសអេតចាយ ទីទាល់ក្រ ដែលមានជីវភាពក្រលំបាក ធ្វើម្ហូបអាហារសំរាប់ទទួលពួកគេចូលមកហូបបាយជាប្រចាំរៀងរាល់ថ្ងៃ។ ដោយក្នុងមួយថ្ងៃៗ អង្គការផ្ទះបាយកុមាររបស់លោក បានធ្វើការចំអិនម្ហូបអាហារចំនួន២ពេល គឺពេលព្រឹក និងថ្ងៃត្រង់ សំរាប់ឱ្យពួកគេហូប ក្រោយពីពួកគេទាំងអស់គ្នាមកពីដើរលេង ដើររើសអេតចាយ មកពីសាលារៀន ដោយមិនមានការរើសអើង ហើយបាននាំគ្នាចូលមកហូបក្នុងមួយថ្ងៃចាប់ពីចំនួន២៥០នាក់ ទៅជាង ៣៥០នាក់ជាប្រចាំ។
លោក ង៉ូវ ឈីវ ថ្លែងបន្តថា ក្រុមក្មេងទាំងអស់គ្នាដែលតែងតែមកហូបបាយនៅអង្គការផ្ទះបាយកុមាររបស់លោកនេះ ភាគច្រើនជាក្មេងរស់នៅតាមតំបន់អនាធិបតេយ្យមួយចំនួនមានដូចជា មកពីម្តុំបឹងត្របែក ស្ទឹងមានជ័យ និងតំបន់ក្បែរផ្សារសុវណ្ណា ដោយមួយចំនួនមកហូបតែមួយពេលៗ តែពេលព្រឹក ឬថ្ងៃត្រង់ប៉ុណ្ណោះ និងមានខ្លះទៀត មកហូបទាំងពេលព្រឹក និងថ្ងៃត្រង់ រួចទើបវិលត្រលប់ទៅផ្ទះវិញក៏មានដែរ។ ក្រៅពីម្ហូបអាហារទទួលពួកគេ អង្គការរបស់លោកក៏មានការណែនាំឱ្យពួកគេបានចូលរៀន មុជទឹកសំអាតខ្លួន ផ្តល់សម្លៀកបំពាក់ថ្មីស្អាតៗស្លៀកទៅរៀន កាត់សក់ថែមទៀតឱ្យជាប្រចាំមិ ដែលខាន។
លោកក៏បានប្រាប់បន្តទៀតថា សំរាប់ថវិកាដែលយកមកធ្វើម្ហូបអាហារផ្តល់ឱ្យក្រុមកុមារទាំងអស់គ្នាជាប្រចាំទាំងនេះ គឺអង្គការផ្ទះបាយកុមាររបស់លោក ទទួលបានអំពីសំណាក់សប្បុរសជាច្រើនដែលតែងតែជួយឧបត្ថម្ភ យកមកធ្វើម្ហូបអាហារទទួលទានសំរាប់ក្មេងៗកំព្រា ក្មេងអនាថា ក្មេងរើសអេតចាយ ជាបន្តបន្ទាប់មិនដាច់នាកន្លងមកនោះ។
ក្នុងថ្ងៃនេះដែរ ក្នុងនាមរូបខ្ញុំផ្ទាល់ដែលជាប្រធានអង្គការផ្ទះបាយកុមារ ក៏សូមធ្វើការថ្លែងអំណរគុណយ៉ាងជ្រាលជ្រៅទៅដល់លោកជំទាវៗទាំងអស់គ្នាមានចិត្តសប្បុរសធម៌ ដែលបាននាំនូវថវិកាចំនួន ១លាន ៥០ម៉ឺនរៀល និងប្រាក់ដុល្លារចំនួន១០០ដុល្លារសំរាប់យកមកទិញម្ហូបអាហារផ្តល់ដល់កុមារទាំងអស់គ្នា រួមទាំងសម្ភារៈសិក្សាចំនួន២០០កញ្ចប់ និងនំចំណីមួយចំនួនយកមកចែកជូនណាពេលនេះផងដែរ។
នាមសប្បុរសជនមាន ទី១-លោកជំទាវ ឆាយ ស៊ីណា ជីវ កេង បានផ្តល់ជូននូវថិកាចំនួន ៥០ម៉ឺនរៀល សម្ភារៈសិក្សាចំនួន២០០កញ្ចប់ នំដូណាត់១៥០នំ, ទី២-លោកជំទាវឧកញ៉ា យីន ផាន្នី ថុងអ៊ុយប៉ាង ស្ថាបនិកកាសែតកោះសន្តិភាព ឧបត្ថម្ភថវិកាចំនួន ៥០ម៉ឺនរៀល នំចំនួន២ប្រអប់ ស្បែកជើង១កេស ដំណាប់ និងគ្រាប់សណ្តែក៤កំប៉ុង, ទី៣-លោកជំទាវ ប៉ែន អ៊ាន ថវិកាចំនួន ១០០ដុល្លារ និងទី៤-លោកជំទាវ គីម ចន្ធូ នឹមថូត ថវិកាចំនួន ៥០ម៉ឺនរៀល។ ដើម្បីផ្តល់ជូនទៅអង្គការផ្ទះបាយកុមារ ទុកប្រើប្រាស់សម្រាប់ទិញអង្ករ បន្លែ ត្រី សាច់ យកមកធ្វើម្ហូបអាហារសំរាប់ផ្តល់ជូនកុមារៗទាំងអស់គ្នាជាប្រចាំថ្ងៃ និងចែកជូនសម្ភារៈសិក្សា នាំចំណីដល់ពួកគេ ហើយក៏បានផ្តល់ជាថវិកាលើកទឹកចិត្តមួយចំនួនទៅដល់កុមារីឈ្មោះ រិត ស្រីណយ សិស្សពូកែរៀនថ្នាក់ទី១ ក២ ជាប់ចំណាត់ថ្នាក់លេខ១ប្រចាំខែ នៅសាលាបឋមសិក្សាជ័យជំនះ ជាក្មេងរបស់អង្គការផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ