រាជធានីភ្នំពេញ៖ ក្នុងវិស័យសំណង់របស់កម្ពុជាកាលពីជាងពាក់កណ្តាលឆ្នាំ២០១៩និងនៅដើមឆ្នាំ២០២០បានបង្កើតព្រឹត្តិការណ៍ប្រវត្តិសាស្ត្រមួយស្តីពីការបាក់រលំអគារនៅខេត្តព្រះសីហនុនិងខេត្តកែប ដែលបានបណ្តាលឱ្យកម្មករបម្រើការនៅក្នុងវិស័យនេះបាត់ជីវិតនិងរងរបួសអស់ជាច្រើននាក់។ ករណីបាក់រលំអគារទាំងពីរលើកនេះបានធ្វើប្រជាពលរដ្ឋមួយចំនួននៅមានចង្ងល់ក្នុងចិត្តថាតើឧបទ្ទេវហេតុរន្ធត់បែបនេះប្រហែលអាចកើតឡើងជាលើកទី៣នៅថ្ងៃអនាគត។ តើការព្រួយបារម្ភនៃករីបាក់រលំអគារនៅក្នុងវិស័យសំណង់កម្ពុជាអាចនិងកើតឡើងជាលើកទី៣ ដែរឬទេ?
បើតាមអ្នកជំនាញនៅក្នុងគណៈស្ថាបត្យកម្មកម្ពុជាទទួលស្គាល់ថាការសាងសង់សំណង់អគារនៅកម្ពុជានាពេលកន្លងមានខុសច្បាប់និងត្រូវច្បាប់ ។ ប៉ុន្តែចាប់ពីពេលនេះទៅមានន័យថា ចាប់ដើមឆ្នាំ២០២០ទៅ រាល់ការសាងសង់ត្រូវតែគោរពទៅតាមច្បាប់ហើយការបាក់រលំអគារនៅពេលកន្លងមកនឹងត្រូវបានកាត់បន្ថយបានច្រើន ។
លោក មាន ដារ៉ាឬទ្ធិ មន្ត្រីគណៈស្ថាបត្យកម្មកម្ពុជានៃក្រសួងរៀបចំដែនដី នគរូបនីយកម្ម និងសំណង់បានឱ្យដឹងក្នុងពិធីផ្សព្វផ្សាយស្តីពីច្បាប់សំណង់កាលថ្មីៗនេះថា វិស័យសំណង់កម្ពុជាចាប់រីកលូតលាស់នៅពេលមានទីផ្សារបើកចំហរជើងមេឃ ។ ប៉ុន្តែយើងមិនទាន់មានច្បាប់ឱ្យបានត្រឹមត្រូវតែមកដល់ពេលនេះយើងមានច្បាប់ចេញមក ។ ដូចនេះយើងអាចអនុវត្តវិស័យសំណង់គោរពទៅតាមគោលការណ៍ច្បាប់។ លោកបានលើកឡើងថា «ការរីកចម្រើននៃវិស័យសំណង់កន្លងមកយើងធ្វើវាមានខុសច្បាប់ខ្លះនិងត្រូវច្បាប់ខ្លះ អីចឹងយើងមិនបានគោរពតាមបទដ្ឋានបច្ចេកទេសនេះទើបឱ្យមានបញ្ហាបាក់រលំអគារ២ កន្លែងនៅខេត្តព្រះសីហនុ និងខេត្តកែប ។ ដូចនេះចាប់ពីពេលនេះទៅយើងគោរពទាំងអស់គ្នា»។
តាមមន្ត្រីរូបនេះការផ្សព្វផ្សាយច្បាប់សំណង់ទៅដល់អ្នកជំនាញខាងផ្នែកស្ថាបត្យកម្មនៅក្នុងវិស័យសំណង់នេះ គឺវិស្វករនិងស្ថាបត្យករជាបន្តបន្ទាប់ដើម្បីឱ្យអ្នកជំនាញទាំងនោះឱ្យយល់បានកាន់តែច្បាស់ដើម្បីឱ្យគាត់ទៅកាន់ការដ្ឋាន ក៏ដូចជាកាន់គម្រោងប្លង់ឱ្យត្រូវទៅនឹងច្បាប់ ។ ដូចនេះចាប់ពីពេលនេះទៅ ក្រសួងរៀបចំដែនដី បានដាក់វិធានការបើវិស្វករនិងស្ថាបត្យករមិនគោរពច្បាប់ក្នុងនាមខ្លួនឯងជាអ្នកបច្ចេកទេសនិងជាអ្នកសិក្សាគម្រោងប្លង់ឱ្យបានត្រឹមត្រូវនោះនឹងទទួលទោសទៅតាមបទប្បញ្ញាតដែលបានចែងនៅក្នុងច្បាប់សំណង់ ។ លោកបានសង្កត់ធ្ងន់ថា «យើងសង្ឃឹមថាទៅថ្ងៃខាងមុខនៅក្នុងវិស័យសំណង់របស់យើងនឹងមិនមានបញ្ហាអ្វីកើតឡើងទៀតទេ (បាក់រលំអគារ) ដើម្បីឱ្យម្ចាស់សំណង់គាត់មានភាពកក់ក្តៅក្នុងការទទួលយកសំណង់ ហើយប្រជាជនរបស់យើងគាត់មករស់នៅក៏ផុតពីការភ័យព្រួយ។ការបាក់រលំអគារយើងនឹងមានការកាត់បន្ថយ ពីព្រោះយើងមានច្បាប់ត្រឹមត្រូវ ទាំងម្ចាស់សំណង់និងអ្នកបច្ចេកទេសគាត់ត្រូវគោរពច្បាប់ទាំងអស់គ្នា។កាលណាច្បាប់សំណង់ចេញមកយើងបានរឹតបណ្តឹង។
បានន័យថាម្ចាស់សំណង់ពីដើមគាត់សន្សំសំចៃថវិកាគាត់រកតែក្រុមជាងមានតម្លៃសមរម្យមកធ្វើ អីចឹងក្រុមជាងគាត់មិនបានយល់ដឹងច្បាប់អំពីបច្ចេកទេសនៃសំណង់ធំៗដែលមានកំពស់ខ្ពស់ៗមិនអាចទទួលខុសត្រូវបានទេ ព្រោះជាងធម្មតាគាត់ធ្វើទៅតាមការចំណាំតាមរយៈធ្វើផ្ទះល្វែងត្រឹមមួយជាន់ឬពីរជាន់។ប៉ុន្តែចាប់ពីបីជាន់ឡើងទៅមិនអាចឱ្យជាងធម្មតាគ្រប់គ្រងបានទេ ហើយម្ចាស់សំណង់នៅពេលយើងមានច្បាប់សំណង់បែបនេះក៏ធ្វើឱ្យគាត់មានទោស។ ដូចនេះគាត់ត្រូវតែទៅជួលវិស្វករ ស្ថាបត្យករមកសិក្សាគម្រោងប្លង់និងមើលការដ្ឋានរបស់ពួកគាត់ ហើយនៅពេលខាងមុខនេះពេលចុះទៅត្រួតពិនិត្យមើលការដ្ឋានមិនឃើញមានស្វករនិងស្ថាបត្យករប្រចាំការ សំណង់នឹងត្រូវបិទ រីឯម្ចាស់សំណង់នឹងមានបញ្ហាទៅតាមផ្លូវច្បាប់»។
លោក មាន ដារ៉ាឬទ្ធិបានមានប្រសាសន៍ថា «ដូចនេះយើងសង្ឃឹមទៅមុខ យើងត្រូវគោរពច្បាប់ទាំងអស់គ្នា អីចឹងសំណង់នឹងលែងមានបញ្ហាបាក់រលំសំណង់ទៀតហើយ។ចាប់ពីយើងបានផ្សព្វផ្សាយច្បាប់សំណង់នេះទៅ ព្រោះតម្រូវឱ្យមានការទទួលទោសទាំងពីរនាក់ម្ចាស់ផ្ទះក៏មានទោស និងស្ថាបត្យករនិងវិស្វករដៅសិក្សាគម្រោងប្លង់ក៏មានទោស»។
លោក ហាក់ ងួនឈាង អគ្គនាយកក្រុមហ៊ុនពៅលាភអេនជីនារីង & ខនស្ត្រាក់សិន ឯ.ក មានប្រសាសន៍ក្នុងនាមវិស្វករដែលបានចុះបញ្ជីនៅក្នុងគណៈវិស្វករកម្ពុជា ដូចវិស្វករអាស៊ាន មានសេចក្តីសោមនស្សយ៉ាងខ្លាំងដែលក្រសួងរៀបចំដែនដី នគរូបនីយកម្មនិងសំណង់បានផ្តល់ឱកាសដល់ក្រុមវិស្វករបានចូលរួមក្នុងកម្មវិធីផ្សព្វផ្សាយស្តីពីច្បាប់សំណង់។លោក ហាក់ ងួនឈាង បានមានប្រសាសន៍ថា «ច្បាប់សំណង់ចេញមកនេះវាមានអត្ថប្រយោជន៍យ៉ាងច្រើនទាក់ទងនឹងឱ្យយើងរឹតបណ្តឹងបញ្ហារចនាបទខ្មែររបស់យើង។មានន័យថាមិនចេះតែទៅធ្វើអ្វីផ្តេសផ្តាសបានទេមកដល់ឥលូវនេះគឺត្រូវមានការស្នើសុំមកខាងក្រសួងពាក់ព័ន្ធ។អីចឹងរចនាបទខ្មែរមានការកំណត់ច្បាស់លាស់ទៅតាមបទដ្ឋានរបស់យើង។លើសពីនេះ គឺធ្វើឱ្យវិស្វករមានឱកាសជួបពួកគាត់បានច្រើននិងស្តាប់យើងបានច្រើនហើយទាក់ទងនឹងជាងសាងសង់ក៏ដូចគ្នា»។ លោកបានលើកឡើងថា កន្លងមកលោកពុំធ្លាប់បានជួបថ្នាក់ដឹកនាំក្រសួងដែនដីដោយផ្ទាល់ទេ ធ្វើការកាសាងសង់ហាក់នៅមានភាពញញើតញញើមនៅលើបញ្ហាច្បាប់ថាតើនៅពេលវិស្វករថាគួរធ្វើបែបនេះតើគេទទួល ឬមិនទទួល (ម្ចាស់សំណង់) តែពេលនេះមានទឹកចិត្តក្នុងការងារសំណង់។
លោកជា សុផារ៉ា ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានមានប្រសាសន៍ថា ដើម្បីផ្តល់ជំនឿជឿជាក់និងឱ្យមានការគាំំទ្រដល់ការវិនិយោគនៅក្នុងវិស័យសំណង់នេះ គឺអ្នកវិនិយោគចង់បានភាពរឹងមាំ ។ បានន័យថានៅប្រទេសណាក៏ដោយគេមកបោះទុន គេថាតើនៅស្រុកយើងមានច្បាប់សំណង់ឬអត់ បើអត់មានច្បាប់សំណង់ឱ្យគេបានលើអី? លោកឧបនាយករដ្ឋមន្ត្រីបានបញ្ជាក់ថា « ការផ្សព្វផ្សាយថ្ងៃនេះគឺចង់ពង្រឹងច្បាប់សំណង់ វិស្វករនិងស្ថាបត្យករគឺជាអ្នកដែលមានវិជ្ជាជីវៈនៅក្នុងវិស័យសំណង់និងការត្រួតពិនិត្យបញ្ជាក់អំពីវិស័យសំណង់»៕ កែសម្រួលដោយ៖ សុឃាក់
ចែករំលែកព័តមាននេះ