ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា អភិបាលស្រុកបន្ទាយស្រី បានថ្លែងថា នឹងចាប់ឃាត់ខ្លួនបញ្ជូនទៅតុលាការ ប្រសិនបើម្ចាស់ដីឡូតិ៍នៅតែហ៊ានបន្តឈូសឆាយ ដោយបំពានដីព្រៃរបស់រដ្ឋតទៅទៀត។
អភិបាលស្រុកបន្ទាយស្រី លោក ឃឹម ហ្វីណង់ បានថ្លែងបញ្ជាក់តាមទូរស័ព្ទ នាព្រឹកថ្ងៃទី១៤ ខែកុម្ភៈយ៉ាងដូច្នេះថា បន្ទាប់ពីមានបុគ្គលទៅឈូសឆាយព្រៃបង្កើតជាគម្រោងពុះដីឡូតិ៍លក់ ដោយគ្មានច្បាប់អនុញ្ញាតិក្នុងតំបន់ហាមឃាត់។
លោកបន្តថា កាលពីថ្ងៃទី១៣ ខែកុម្ភៈនេះ មន្ត្រីបានចុះទៅពិនិត្យឃើញថា ទីតាំងដីខាងលើនៅក្នុងភូមិសាស្ត្រភូមិរុន ឃុំរុនតាឯក ស្រុកបន្ទាយស្រី ដីនេះស្ថិតក្នុងតំបន់២ ដែលជាដែនគ្រប់គ្រងដោយអាជ្ញាធរអប្សរា។ លោកទទួលស្គាល់ថា ពិតជាមានការឈូសឆាយរួចរាល់ប្រហែល៣ទៅ៤ហិកតាមែន តែសកម្មភាពនោះយើងទើបតែដឹង។ ជាមួយនឹងការចុះពិនិត្យរបស់មន្ត្រី គឺបានហៅម្ចាស់មកធ្វើកិច្ចសន្យាបញ្ឃប់គ្រប់សកម្មភាពទាំងអស់។
អភិបាលស្រុករូបនេះ បានបញ្ជាក់យ៉ាងដាច់ខាតថា លោកនឹងសហការជាមួយសមត្ថកិច្ចពាក់ព័ន្ធ ដើម្បីចាត់វិធានការចាប់ឃាត់ខ្លួនបញ្ជូនទៅតុលាការ ប្រសិនបើម្ចាស់គម្រោងដីឡូតិ៍ខាងលើ នៅតែបន្តឈូសឆាយ ឬឈូសឆាយដោយលួចលាក់ក្នុងប្រការណាមួយ។ មិនថា ដីនោះវាស្ថិតក្រោមការគ្រប់គ្រងរបស់អាជ្ញាធរអប្សរា ឬក៏ដីស្របច្បាប់នោះទេ តែរាល់ការធ្វើអាជីវកម្មណាមួយ ចាំចាប់ត្រូវសុំច្បាប់ជាមុន។
ទោះបីអាជ្ញាធរស្រុកបន្ទាយស្រី មិនទាន់បង្ហាញថា ម្ចាស់ទីតាំងដីឡូតិ៍ខាងលើជានណា ប៉ុន្តែមន្ត្រីដែលស្ថិតក្នុងហេតុការណ៍ បានឱ្យដឹងថា ម្ចាស់ដីឡូតិ៍ឈ្មោះ ឈិន សំអឿន ភេទប្រុស អាយុ៥៤ឆ្នាំ។ គាត់គ្រោងឈូសឆាយដីនៅទីនោះ ប្រហែល៤០ហិកតា ប៉ុន្តែពេលនេះទើបឈូសបាន៣ទៅ៤ហិកតាប៉ុណ្ណោះ។
នារសៀលថ្ងៃទី១៤ ខែកុម្ភៈនេះ លោក ឈិន សំអឿន ដែលអះអាងថា ជាម្ចាស់គម្រោងដីឡូតិ៍មិនអាចសុំការបំភ្លឺបានទេ ដោយអ្នកទទួលទូរស័ព្ទឆ្លើយថា ច្រឡំលេខ។
ចែករំលែកព័តមាននេះ