លោកមហាសេដ្ឋី វ៉ារេន បាហ្វេត (Warren Buffett) ធ្លាប់បង្រៀនក្រុមសិស្សមួយពីមេរៀនដ៏មានតម្លៃទាក់ទិននឹងជីវិត និងកត្តាពីរយ៉ាង ដែលមនុស្សគ្រប់រូបមិនត្រូវមើលរំលងឡើយ ។ លោកបានមានប្រសាសន៍ថា «អ្នកមានស្មារតី និងរាងកាយតែមួយទេ ។ ហើយវានឹងបន្តដំណើរការពេញមួយជីវិតរបស់អ្នក ។
ប៉ុន្តែប្រសិនបើអ្នកមិនមើលថែស្មារតី និងរាងកាយនោះ វានឹងឈប់ដំណើរការក្នុងរយៈពេល៤០ឆ្នាំក្រោយ… អ្វីដែលអ្នកធ្វើនាពេលបច្ចុប្បន្ននេះ និងថ្ងៃនេះ គឺជាអ្វីដែលជះឥទ្ធិពលលើស្មារតី និងរាងកាយរបស់អ្នកក្នុងរយៈពេល១០ ២០ និង៣០ឆ្នាំទៅមុខ» ។ដើម្បីគោរពតាមដំបូន្មានដ៏មានតម្លៃរបស់មហាសេដ្ឋីខាងលើ យលងត្រូវតែចេះអនុវត្តទម្លាប់ល្អៗជារាងរាល់ថ្ងៃដែលមានដូចខាងក្រោមនេះ៖
១-ទម្លាប់មើលថែខ្លួនឯង
អ្នកត្រូវតែចាប់ផ្តើមធ្វើអ្វីដែលនាំយកអារម្មណ៍ស្ងប់ និងភាពសប្បាយរីករាយឲ្យមកខ្លួន ព្រមទាំងជួយជំរុញទឹកចិត្តអ្នកឡើងវិញពេលដែលអ្នកចូលមកកាន់ការិយាល័យធ្វើការ ។ តើមានអ្វីដែលអ្នកចូលចិត្តធ្វើតែមិនបានធ្វើវាអស់រយៈពេលជាយូរមកហើយ? តើមានសកម្មភាពអ្វីដែលអ្នកធ្លាប់ធ្វើពេលទំនេរ?ទោះជាអ្នកមិនចូលចិត្តធ្វើលំហាត់ប្រាណពិតមែនក្តី តើមានសកម្មភាពអ្វីដែលអាចជួយឲ្យអ្នកបែកញើសបាន ១៥នាទីទេ?
២-កំណត់ពេលវេលា សម្រាប់ការសម្រាកជារៀងរាល់ថ្ងៃ
មនុស្សត្រូវការពេលសម្រាកដែលអាចផ្តល់ជាកម្លាំងបន្ថែម ដើម្បីឲ្យពួកគេបំពេញការងារបានដោយមានប្រសិទ្ធិភាពជាងមុន ។ អ្នកជំនាញមួយចំនួនផ្តល់យោបល់ឲ្យធ្វើការដែលតម្រូវការផ្តោតស្មារតីច្រើនប្រមាណពី ៦០ ទៅ ៩០នាទីមុននឹងធ្វើការសម្រាកមួយភ្លែតទើបបន្តការងារទៅមុខទៀត ។
៣-ចូលដំណេកឲ្យបានទៀងទាត់៖
ការស្រាវជ្រាវបានបង្ហាញឲ្យដឹងថា ការធ្វើការមួយថ្ងៃពី១៧ ទៅ១៩ម៉ោងដោយមិនចូលដំណេកធ្វើឲ្យខួរក្បាលជួបប្រទះការលំបាកក្នុងការដំណើរការដូចពេលដែលមនុស្សស្រវឹងស្រាដែរ ។ អ្នកជំនាញបានផ្តល់យោបល់ឲ្យមានការចូលដំណេកឲ្យបាន ៨ម៉ោងជារៀងរាល់ថ្ងៃសម្រាប់សុខភាពផ្លូវស្មារតី និងផ្លូវកាយល្អ ៕
ចែករំលែកព័តមាននេះ