សហរដ្ឋអាមេរិក ៖ មន្ទីរប៉ង់តាហ្គោននឹងបោះបង់ចោល ការទិញយន្តហោះបំបាំងកាយធុនF-35និងដ្រូនជាច្រើនគ្រឿង ដើម្បីបញ្ចេញប្រាក់៣,៨ពាន់លានដុល្លារបន្ថែមទៀត សម្រាប់ជញ្ជាំងព្រំដែនដែលប្រធានាធិបតីលោកដូណាល់ត្រាំ ចង់កសាងតាមបណ្ដោយព្រំដែនជាមួយម៉ិកស៊ិក។
អ្នកទទួលខុសត្រូវម្នាក់របស់មន្ទីរប៉ង់តាហ្គោន ទទួលបន្ទុកសំណុំរឿងនោះ លោកBOB SALESSES គូសបញ្ជាក់កាលពីថ្ងៃទី១៣កុម្ភៈថា ជាការឆ្លើយតបចំពោះសំណើរបស់ក្រសួងសន្តិសុខផ្ទៃក្នុង រដ្ឋមន្ត្រីការពារប្រទេសអាមេរិកលោកMARK ESPER បានសម្រេចកសាងជញ្ជាំងព្រំដែន ប្រវែង២៨៥គីឡូម៉ែត្រជិតក្រុងសាន់ឌីយេហ្គោ អែលសេនត្រូ យូម៉ា អែលប៉ាសូនិងដែលរីយ៉ូ។ លោកបន្តថាលោកESPER បានអនុញ្ញាតឲ្យប្រើប្រាស់ប្រាក់ប្រមាណជា៣,៨ពាន់លានដុល្លារ សម្រាប់ឆ្លើយតបចំពោះសំណើរបស់ក្រសួងសន្តិសុខផ្ទៃក្នុង។
ក្នុងបណ្ដាឯកសារដែលប្រគល់នាពេលមុននេះដល់សភា មន្ទីរប៉ង់តាហ្គោនបញ្ជាក់ថា មូលនិធិទាំងនោះនឹងត្រូវផ្ទេរក្នុងរង្វង់២,២ពាន់លានដុល្លារ ដកពីថវិកាឆ្នាំ២០២០សម្រាប់ទិញគ្រឿងឧបករណ៍ បំពាក់ឲ្យកងទ័ពអាកាសនិងកងទ័ពជើងទឹក។ ចំណែកទឹកប្រាក់ក្រៅពីនេះទាញយកមកពី់ប្រាក់សម្រាប់ប្រតិបត្តិការក្រៅប្រទេស របស់កងទ័ពអាមេរិកនៅអាហ្វហ្គានីស្ថាន សីុរីនិងអ៊ីរ៉ាក់។
ទឹកប្រាក់ទាំងនេះនាំឲ្យមូលនិធិដែលផ្ដល់ ចាប់តាំងពីខែកក្កដាមក ដោយក្រសូងការពារប្រទេសអាមេរិក សម្រាប់ការកសាងជញ្ជាំងព្រំដែន តាមការទាមទាររបស់លោកត្រាំ ឡើងដល់៩,៩ពាន់លានដុល្លារ។ លោកត្រាំសន្យាកសាងជញ្ជាំងព្រំដែនជាមួយម៉ិកស៊ិកនោះ ដើម្បីទប់ការហូរចូលរបស់ពួកអន្តោប្រវេសន៍លួចលាក់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ