ខេត្តព្រះសីហនុ ៖ លោក ថោង ខុន រដ្ឋមន្ត្រីក្រសួងទេសចរណ៍បានបង្ហាញនូវក្តីសង្ឃឹមថា បន្ទាប់ពីទទួលបានការអនុញ្ញាតឱ្យចូលចតពីប្រមុខរាជរដ្ឋាភិបាលកម្ពុជា ភ្ញៀវទេចរជាង២ពាន់នាក់នៅលើនាវាទេសចរណ៍ Westerdam នឹងនាំយកទង្វើមនុស្សធម៌កម្ពុជាទៅផ្សព្វផ្សាយក្នុងប្រទេសខ្លួនព្រមទាំងកៀរគរភ្ញៀវទេសចរមកកាន់ប្រទេសកម្ពុជាឱ្យកាន់តែច្រើនឡើងបន្ថែមទៀត…
ខេត្តព្រះសីហនុ ៖ លោក ថោង ខុន រដ្ឋមន្ត្រីក្រសួងទេសចរណ៍បានបង្ហាញនូវក្តីសង្ឃឹមថា បន្ទាប់ពីទទួលបានការអនុញ្ញាតឱ្យចូលចតពីប្រមុខរាជរដ្ឋាភិបាលកម្ពុជា ភ្ញៀវទេចរជាង២ពាន់នាក់នៅលើនាវាទេសចរណ៍ Westerdam នឹងនាំយកទង្វើមនុស្សធម៌កម្ពុជាទៅផ្សព្វផ្សាយក្នុងប្រទេសខ្លួនព្រមទាំងកៀរគរភ្ញៀវទេសចរមកកាន់ប្រទេសកម្ពុជាឱ្យកាន់តែច្រើនឡើងបន្ថែមទៀត ។
លោករដ្ឋមន្ត្រីបានថ្លែងថា លោកទាយទុកថា «ក្រោយនេះគេនឹងនិយាយល្អពីកម្ពុជារាប់ពាន់នាក់ និងនិយាយល្អពីកម្ពុជា អត់មានអ្នកណានិយាយមិនល្អពីកម្ពុជានោះទេ ហើយគេនឹង ទាក់ទាញភ្ញៀវទេសចរមកច្រើនទៀតមកកាន់គោលដៅក្រុងព្រះសីហនុក៏ដូចជាប្រទេសកម្ពុជាទាំងមូល»។
លោកបានបន្តថា ការអនុញ្ញាតឱ្យនាវា Westerdam គឺប្រទេសកម្ពុជាធ្វើតាមច្បាប់ និងបច្ចេកទេសត្រឹមត្រូវ មិនតែប៉ុណ្ណោះភ្ញៀវទេសចរទាំងអស់នៅលើនាវាជិត២ពាន់នាក់នោះពួកគាត់បានគោរពតាមច្បាប់របស់កម្ពុជាយ៉ាងខ្ជាប់ខ្ជួន ហើយអាចនិយាយថា ប្រទេសកម្ពុជា ជាប្រទេសដែលមានច្បាប់ទម្លាប់ត្រឹមត្រូវ ហើយជាពិសេសកម្ពុជាបានបង្ហាញច្បាស់អំពីកិច្ចការមនុស្សធម៌ ។
លោករដ្ឋមន្ត្រីបន្ថែមថា ទីក្រុងព្រះសីហនុត្រូវបានតភ្ជាប់ពីទីក្រុងសៀមរាបអង្គរព្រមទាំងតំបន់ទេសចរណ៍វប្បធម៌ដទៃទៀត ជាក់ស្តែងនៅថ្ងៃនេះលោកស្រីឯកអគ្គរដ្ឋទូតបារាំងប្រចាំប្រទេសកម្ពុជា ព្រមទាំងតំណាងឯកអគ្គរដ្ឋទូតប្រទេសមួយចំនួនបានអញ្ជើញមកត្រួតពិនិត្យ និងសហការដោយផ្ទាល់ជាមួយអាជ្ញាធរកម្ពុជា ព្រមទាំងបង្ហាះសារនៅគេហទំព័ររបស់ខ្លួន ល្អៗអំពីទឹកចិត្តមនុស្សធម៌មិនអាចកាត់ថ្លៃបានពីសំណាក់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានអនុញ្ញាតឱ្យនាវាដឹកនាំ ភ្ញៀវទេសចរនេះចូលសុំចតនៅកំពង់ផែខេត្តព្រះសីហនុដោយមិនរើសអើង ។
គួរជម្រាបថា នាវាទេសចរណ៍ខ្នាតយក្សរបស់អាមេរិក Westerdam បានចូលសុំចតនៅកំពង់ផែក្រុងព្រះសីហនុ នាព្រឹកថ្ងៃទី១៣ ខែកុម្ភៈ ឆ្នាំ២០២០ បន្ទាប់ពីទទួលបានការអនុញ្ញាតពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បន្ទាប់ពីនាវានេះរកទីសុំចតមិនបានអស់រយៈពេលប្រមាណ២សប្តាហ៍ ដោយសារតែប្រទេស និងកោះចំនួន៦បានបដិសេធដោយសារភ័យខ្លាចអ្នកដំណើរមានផ្ទុកវីរុសកូរ៉ូណាថ្មី ៕
កែសម្រួលដោយ ៖ សំណាង
ចែករំលែកព័តមាននេះ