ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា នៅទីបំផុតលទ្ធផលធ្វើតេស្តពីមន្ទីរពិសោធន៍ប៉ាស្ទ័រ បានបង្ហាញហើយថា អ្នកទេសចរ២០នាក់នៅលើកប៉ាល់ WESTERDAM ដែលសុខភាពមិនប្រក្រតីនោះ គឺមិនមានផ្ទុកមេរោគកូរ៉ូណា ឬហៅ Covid-19 នោះទេ នេះបើយោងតាមលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងប្រាប់នាយកប្រតិបត្តិអង្គភាពព័ត៌មាននាយប់ថ្ងៃទី១៣ ខែកុម្ភៈ ឆ្នាំ២០២០នេះ។
លោករដ្ឋមន្ត្រី ម៉ម ប៊ុនហេង បានបញ្ជាក់ទៀតថា «តារាងលទ្ធផលពីប៉ាស្ទ័រឃើញថា អ្នកទេសចរ២០នាក់ គឺមិនមានផ្ទុកវិរ៉ុសកូរ៉ូណា ឬ Covid-19 នោះទេ»។
សូមរំលឹកថា កាលពីព្រឹកថ្ងៃទី១៣ ខែកុម្ភៈ ឆ្នាំ២០២០ អភិបាលខេត្តព្រះសីហនុលោក គួច ចំរើន បានឲ្យដឹងថា មានមនុស្ស២០នាក់នៅលើកប៉ាល់ដែលចតនៅព្រះសីហនុ ចំនួន២០នាក់ មានសុខភាពមិនប្រក្រតី ។ មនុស្សដែលនៅលើកប៉ាល់មិនមានជនជាតិមកពីទីក្រុងវូហាននោះទេ គឺមានតែជនជាតិចិនតែម្នាក់ប៉ុណ្ណោះដែលជាអនិជន។
សូមរំលឹកថា អ្នកមកតាមកប៉ាល់ចំនួន២០នាក់មានសុខភាពមិនប្រក្រតី ក្នុងនោះមានជំងឺក្រពះ និងជំងឺផ្សេងៗ តែទោះបីជាអ្នក២០នាក់ មានសុខភាពមិនប្រក្រតីមែន តែមិនមានន័យថា គាត់មានផ្ទុកជំងឺកូរ៉ូណាថ្មីនោះទេ គឺត្រូវធ្វើការវិភាគពីគ្រូពេទ្យយើងសិន ។
សូមរំលឹកទៀតថា មនុស្ស២០នាក់នៅលើកប៉ាល់ដែលចតនៅព្រះសីហនុមានសុខភាពមិនប្រក្រតី ។ (កែសម្រួលដោយ ៖ បុប្ផា)
ចែករំលែកព័តមាននេះ