រាជធានីភ្នំពេញ ៖ បុរសម្នាក់ជិះម៉ូតូបត់ឆ្លងផ្លូវសង្ស័យខ្វះការប្រុងប្រយ័ត្នត្រូវរថយន្ដមួយគ្រឿងបុក និងកិនអូសជិត១០ម៉ែត្រ បណ្តាលឲ្យអ្នកបើកបរម៉ូតូរងរបួសធ្ងន់បាក់ជើងម្ខាង បង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី១២ ខែកុម្ភៈ ឆ្នាំ២០២០ តាមបណ្ដោយផ្លូវវិថីឈ្នះឈ្នះ ហៅផ្លូវ ទំនប់កប់ស្រូវ ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
ភាគីខាងរថយន្ដមួយគ្រឿងខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣E-៤៣០៥ អ្នកបើកបរមិនស្គាល់អត្តសញ្ញាណ ចំណែកភាគីខាងម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១J-៩៩៣១ បើកបរដោយបុរសម្នាក់មិនស្គាល់អត្តសញ្ញាណ បានរងរបួសធ្ងន់បាក់ជើង។
តាមប្រភពព័ត៌មានពីមិត្តភ័ក្ដិរបស់ជនរងគ្រោះបាននិយាយថា មុនពេលកើតហេតុ ពេលចេញពីធ្វើការ គាត់បានជិះម៉ូតូ១គ្រឿង ចំណែកជនរងគ្រោះក៏បានជិះម៉ូតូមួយគ្រឿងផង ដែរ ដោយធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុដែលនៅទល់មុខរោងប៊ឺរី ក៏បានបត់ឆ្លងផ្លូវក្នុងទិសដៅពីលិចទៅកើតក្នុងគោលបំណងធ្វើដំណើរទៅផ្ទះជួល ។
តាមប្រភពដដែលបានបន្តថា ខណៈកំពុងបត់ឆ្លងបានពាក់កណ្តាលផ្លូវ ស្រាប់តែមានរថយន្ត១គ្រឿងម៉ាកហ៊ីយ៉ាន់ដាយ ពណ៌ស បើកបរក្នុងទិសដៅពីត្បូងទៅជើងក្នុងល្បឿនយ៉ាងលឿនជាន់ហ្វ្រាំងមិនជាប់ក៏ជ្រុលទៅបុកម៉ូតូជនរងគ្រោះយ៉ាងពេញទំហឹង និងកិនអូសជិត១០ម៉ែត្រ បណ្តាលឲ្យជនរងគ្រោះខ្ទាតចេញពីម៉ូតូហើយរងរបួសធ្ងន់បាក់ជើងសន្លប់ស្តូកស្តឹងតែម្តង។ ភ្លាមៗនោះត្រូវបានខាងរថយន្តរបស់គ្លីនិកឯកជនបានមកដឹកជនរងគ្រោះយកទៅសង្គ្រោះភ្លាមៗផងដែរ ចំណែកអ្នកបើកបររថយន្ដត្រូវបានប្រជាពលរដ្ឋនាំគ្នាចាប់ឃាត់ខ្លួននៅនឹងកន្លែងកើតហេតុដើម្បីប្រគល់អោយសមត្ថកិច្ច។
ពេលនោះដែរ កំលាំងសមត្ថកិច្ចនគរបាលប៉ុស្តិ៍ចោមចៅទី៣បានចុះមកអន្តរាគមន៍នៅកន្លែងកើតហេតុ និងបាញ់ថ្នាំ រួចយកទាំងម៉ូតូ និងរថយន្តមកដាក់អែបខាងដើម្បីកុំឲ្យមានការកកស្ទះចរាចរណ៍។ ចំណែកអ្នកបើកបររថយន្ដត្រូវបានប្រជាពលរដ្ឋប្រគល់ទៅអោយសមត្ថកិច្ចនគរបាលប៉ុស្តិ៍ចោមចៅទី៣នាំយកទៅប៉ុស្តិ៍ភ្លាមៗផងដែរ។
ក្រោយពេញពេលកើតហេតុ នគរបាលប៉ុស្តិ៍ចោមចៅទី៣បានប្រគល់អ្នកបើកបររថយន្ដ ទៅអោយផ្នែកជំនាញចរាចរណ៍រាជធានីភ្នំពេញព្រមទាំងរថយន្តនិងម៉ូតូយកទៅរក្សាទុករង់ចាំធ្វើការដោះស្រាយនៅថ្ងៃក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ