រាជធានីភ្នំពេញ ៖ លោកព្រឹទ្ធាចារ្យក្រមាមាសមាស សាន គីមស៊ាន ដែលបច្ចុប្បន្នគឺជាប្រធានរាជបណ្ឌិតសភាល្បុក្កតោកម្ពុជា មានវ័យ៧៥ឆ្នាំទៅហើយនោះ បានបង្ហាញអារម្មណ៍ចង់ឃើញកីឡាល្បុក្កតោ ត្រូវបានបរទេសយកទៅហ្វឹកហាត់ជាលក្ខណៈផ្លូវការ ដូចគ្នានឹងកម្ពុជាហ្វឹកហាត់កីឡាបរទេសដែលរួមមាន…
រាជធានីភ្នំពេញ ៖ លោកព្រឹទ្ធាចារ្យក្រមាមាសមាស សាន គីមស៊ាន ដែលបច្ចុប្បន្នគឺជាប្រធានរាជបណ្ឌិតសភាល្បុក្កតោកម្ពុជា មានវ័យ៧៥ឆ្នាំទៅហើយនោះ បានបង្ហាញអារម្មណ៍ចង់ឃើញកីឡាល្បុក្កតោ ត្រូវបានបរទេសយកទៅហ្វឹកហាត់ជាលក្ខណៈផ្លូវការ ដូចគ្នានឹងកម្ពុជាហ្វឹកហាត់កីឡាបរទេសដែលរួមមាន តេក្វាន់ដូ និងការ៉ាតេដូជាដើម ។
លោកថាក្បាច់គុនកីឡាខ្មែរក៏ល្អ និងរស់រវើកមិនចាញ់កីឡាបរទេសនោះទេ ទើបលោកប្រកាសថា ឱ្យតែបន្តបំផុស និងធ្វើឱ្យល្បីបន្តទៀត គឺច្បាស់ណាស់ថា ភាគីខាងបរទេស នឹងអាចយកកីឡានេះ ទៅហ្វឹកហាត់ដូចកម្ពុជា យកកីឡាបរទេសមួយចំនួនមកបង្កើតជាសហព័ន្ធផ្លូវការដូច្នេះ ដែរ ។ យ៉ាងណាក៏ដោយ លោកមិនហ៊ានរំពឹងដល់ថ្នាក់បរទេសយកល្បុក្កតោកម្ពុជា ទៅបង្កើតជាសហព័ន្ធនោះទេ។
លោកតាសាន គឹមស៊ាន បញ្ជាក់ថា ល្បុក្កតោ កម្ពុជាមកទល់ពេលនេះកាន់តែមានការទទួល
ស្គាល់ តែនៅមិនទាន់ដល់គោលដៅដូចអ្វីដែលលោកធ្លាប់ស្រមៃទេ ដោយសារតែលោកមានបំណងចង់ឃើញកីឡាមួយនេះ មានប្រទេសខាងក្រៅយកទៅបើកជាសហព័ន្ធ ឬបើកជាក្លិប
បង្វឹកដល់កូនចៅរបស់គេ ដូចកូនខ្មែរហាត់រៀនកីឡានាំចូលពីបរទេសដូចគ្នា ។
លោកថា កន្លងមកនៅតាមបណ្ដាប្រទេសមួយចំនួន មានការចាប់អារម្មណ៍យកកីឡាល្បុក្កតោទៅហាត់ហើយ តែភាគច្រើនជាការផ្ដួចផ្ដើមរបស់បងប្អូនខ្មែរសុទ្ធសាធរស់នៅទីនោះប៉ុណ្ណោះ ទើបលោកចង់ឱ្យមានមន្ត្រីសហព័ន្ធរបស់ប្រទេសនីមួយៗតែម្ដង យកកីឡារបស់ខ្មែរទៅបង្ហាត់ជាផ្លូវការនៅទីនោះ ។ ជាមួយគ្នានោះលោកថា នឹងបន្តនៅជាមួយល្បុក្កតោរហូត បើទោះជាពេលនេះលោកមានវ័យជាង៧០ឆ្នាំ និងជរាទៅហើយ។
លោករំលឹកថា មនុស្សជាច្រើនយល់ថា ក្រោយពេលលោកលាចេញពីប្រធានសហព័ន្ធ គឺលោកលែងរវល់នឹងល្បុក្កតោ ប៉ុន្តែការពិតគឺលោកសកម្មជាងមុននោះផង ក្នុងនាមជាប្រធានរាជបណ្ឌិតសភាល្បុក្កតោកម្ពុជា ដែលក្រៅពីបំផុស និងប្រមែប្រមូលសមាសភាពថ្មីៗឱ្យមកធ្វើជាធនធានរបស់ល្បុក្កតោ ។ លោកបន្តថា៖«រាល់ថ្ងៃខ្ញុំចាស់មែន សុខភាពប្រែប្រួលមែន ប៉ុន្តែខ្ញុំអត់ដកខ្លួនពីល្បុក្កតោទេ គឺនៅសកម្ម តែមកពីខ្ញុំធ្វើតែការងារខាងលើច្រើនជាង ទើបអ្នកខ្លះថា តាសាន គឹមស៊ាន អត់មានសកម្មភាព»។
លោកថា ការងាររបស់លោកមិនមែនត្រឹមតែបន្តបើកក្លិបដើម្បីបង្ហាត់ក្មេងៗដូចដើម ខណៈដែលលោកក៏បានបណ្ដុះកូនប្រុសឱ្យបន្តតំណែង និងទើបតែរៀបចំដឹកនាំអ្នកក្បាច់គុនល្បុក្កតោរាប់រយនាក់ឱ្យថតភាពយន្តរឿង«ព្រលឹងល្បុក្កតោ»ដើម្បីបំផុសឱ្យកីឡាមួយនេះ កាន់តែជ្រួតជ្រាបដល់ពិភពលោក ។ លោកថាសព្វថ្ងៃនៅពេលលោកកាន់តែចាស់ ខួរក្បាលកាន់តែមិនសូវស្រឡះដូចមុន ប៉ុន្តែមិនបានបន្ធូរដៃទេ គឺរឹតតែសកម្មក្នុងកីឡានេះ ដោយតាមគម្រោងគឺលោកនឹងតស៊ូនៅក្នុងវិស័យល្បុក្កតោលុះណាតែកម្លាំងលោកទៅលែងរួច ។
លោកថា ខ្លួនកាន់តែចាស់ គឺកាន់តែសប្បាយនឹងដឹងឮពីល្បុក្កតោ ជាពិសេសសូម្បីតែឃើញក្មេងៗ កាន់តែពូកែ កាន់តែស្រឡាញ់ល្បុក្កតោ ក៏លោកសប្បាយ និងរំភើបចិត្តដែរ ។ លោកបានថ្លែងកោតសរសើរក្មេងៗ នៅក្នុងកម្មវិធីប្រកួតប្រជែងមុនថា ធ្លាប់តែបង្ហាត់សិស្សមុនៗ រៀងពិបាក ដល់ឃើញក្មេងៗឥឡូវពូកែៗ គឺរឹតតែលែងចង់ឈឺ លែងចង់ចាស់ ហើយមានកម្លាំងចិត្តចង់ស្លាប់រស់ជាមួយល្បុក្កតោតែម្ដង។
លោកនិយាយថា ក្មេងៗបច្ចុប្បន្នកាន់តែមានបច្ចេកទេសល្អជាងរៀមច្បង និងសិស្សដែល លោកធ្លាប់បង្ហាត់កន្លងមក ។ លោកបានទាំងបង្ហាញការភ្ញាក់ផ្អើល និងរំភើបនៅពេលឃើញក្មេងៗទាំងនោះ បង្ហាញឱ្យលោកឃើញពីឆន្ទៈ ក្នុងការលះបង់ចង់ហាត់កីឡានេះចេញពីបេះដូង ដែលលោកបានហៅសកម្មភាពនេះថា គឺជាការរួមចំណែកអភិរក្ស និង អភិវឌ្ឍន៍គុនល្បុក្កតោ ដែលជាកេរដំណែលរបស់បុព្វបុរសខ្មែរដ៏សំខាន់។
លោកគ្រូតាក្រមាមាស សាន គឹមស៊ានប្រធានរាជបណ្ឌិតសភាល្បុក្កតោកម្ពុជាបន្តបញ្ជាក់ក្នុងពិធីបិទការប្រកួតកីឡាគុនល្បុក្កតោ ជ្រើសរើសជើងឯកថ្នាក់ជាតិប្រចាំឆ្នាំ២០១៩ ដែល ទើបបញ្ចប់ថា តាមរយៈការសង្កេតកីឡាករកីឡាការិនីដែលបង្ហាញខ្លួនឆ្នាំនេះ គឺមានសមត្ថ ភាព និងបច្ចេកទេសកើនឡើងគួរឲ្យកត់សម្គាល់បើធៀបនឹងឆ្នាំមុន ។ អនុប្រធានសហព័ន្ធកីឡាល្បុក្កតោកម្ពុជារូបនេះបានប្រៀបធៀបថា កីឡាករបច្ចុប្បន្នមានបច្ចេកទេសល្អជាងរៀមច្បងនិងសិស្សជំនាន់មុនៗពិសេសលើការសម្តែងទ្វារមេគុនព្រលឹងល្បុក្កតោ ។
ដកស្រង់សម្ដីនៅចំពោះមុខថ្នាក់ដឹកនាំគ្រូព្រឹទ្ធាចារ្យ គ្រូបង្វឹក និងកីឡាករ-កីឡាការិនី ព្រឹទ្ធាចារ្យក្រមាមាសរូបនេះលើកឡើងដូច្នេះថា ៖« ខ្ញុំខានមើលចៅៗចៅទួតល្បុក្កតោតែមួយរយៈពេលខ្លីស្រាប់តែមកមើលលើកនេះភ្ញាក់ ផ្អើលមែនទែន! ល្អណាស់ ជោគជ័យល្បុក្កតោ !
ក្មួយៗចៅៗបង្ហាញស្នៀតទ្វារមេគុនព្រលឹងល្បុក្កតោល្អជាងគ្រូៗផង ។ សំខាន់ក្មួយៗធ្វើចេញពីព្រលឹងជាតិដែលមានក្នុងបេះដូងយើងទាំងអស់គ្នា ។ ខ្ញុំឃើញក្មួយៗ ចៅៗ ទាំងអស់ ធ្វើចេញពីកម្លាំងចិត្ត កម្លាំងកាយ ចេញពី បេះដូង ខ្ញុំរន្ធត់មែនទែន ! ខ្ញុំស្ទើរតែមិនជឿថា ព្រលឹងជាតិនេះ ខ្លាំងក្លា មិននឹកស្មានដល់ » ។
ស្ថាបនិកល្បុក្កតោ ដែលជាទីប្រឹក្សាក្រសួងវប្បធម៌ និងវិចិត្រសិល្បៈរូបនេះបន្ថែមថា៖«ពេលខ្ញុំបង្ហាត់រៀមច្បង និងគ្រូពួកយើងពីមុនៗ មក ខ្ញុំគិតថាដូចជាមិនសូវល្អប៉ុន្មាននោះទេ មិនមែនបង្អាប់ទេ ។ ប៉ុន្តែពេលមកឃើញការប្រកួតនិងសម្តែងរបស់ចៅៗចៅទួតបច្ចុប្បន្នគឺអស្ចារ្យមែនទែន ! ខ្ញុំយល់ឃើញថា អ្វីដែលខ្ញុំបានខិតខំបង្ហាត់បង្រៀនតាំងពីឆ្នាំ២០០៤ដល់ឆ្នាំ២០១៩មិននឹកស្មានថា អ្វីដែលខ្ញុំបានបង្កើតនិងខំប្រឹងកន្លងមកលទ្ធផលនៅឆ្នាំនេះជាលទ្ធផលជោគជ័យដ៏អស្ចារ្យចំពោះខ្ញុំ » ។
ជាមួយជំហរនេះហើយទើបលោកប្រកាសថា អត់រួញរាក្នុងការតស៊ូ និងលះបង់ដើម្បីល្បុក្កតោនោះទេ ដរាបណាលោកនៅតែមានសមត្ថភាពដើរបាន អង្គុយបាន និងមានកម្លាំងរួមចំណែក ៕ (កែសម្រួលដោយ ៖ បុប្ផា)
ចែករំលែកព័តមាននេះ