ADផ្ទាំងផ្សព្វផ្សាយពាណិជ្ជកម្ម

មកដឹងពិធីដង្ហែអ្នកតាចិន ឬហៅថា អញ្ចើញអ្នកតាចុះពីលើមេឃ

4 ឆ្នាំ មុន

ភ្នំពេញ
១១ ខែ កុម្ភៈ ឆ្នាំ ២០២០ ម៉ោង ១១:៣៤

រាជធានីភ្នំពេញ ៖ ប្រជាពលរដ្ឋខ្មែរជាច្រើនដែលមានជាប់ខ្សែស្រឡាយខាងខ្សែចិន បាននាំគ្នាប្រារព្ធពិធីដង្ហែអ្នកតាចិនតាមទំនៀមទម្លាប់អបិយជំនឿរបស់ពួកគេ ដើម្បីប្រោះព្រំទឹកមន្តតាមផ្ទះនីមួយៗ សំុសេចក្តីចម្រើនដល់ក្រុមគ្រួសារអ្នកដែលជឿផ្នែកសាសនាមួយនេះ ។ ក្បួនដង្ហែដ៏ធំដែលមានចំនួនមនុស្សសរុបមិនក្រោមជិត១ម៉ឺននាក់ខាងលើនេះ គឺត្រូវបានដង្ហែតាមបណ្តោយផ្លូវជាតិលេខ២ គិតចាប់ពីគល់ស្ពានអាកាសក្បែរថ្នល់ ស្ថិតក្នុងភូមិសាស្ត្រខណ្ឌមានជ័យ រហូតដល់ព្រះវិហារធំរបស់អ្នកតា ស្ថិតក្នុងទឹកដីក្រុងតាខ្មៅ ខេត្តកណ្តាល ធ្វើឡើងនាវេលារសៀលថ្ងៃទី១០ កុម្ភៈ ឆ្នាំ២០២០នេះ ហើយក៏ជាថ្ងៃបញ្ចប់នៃពិធីដង្ហែរយៈពេល៣ថ្ងៃ ។

ជាទូទៅ ពិធីដង្ហែរអ្នកតាចិនខាងលើនេះ គឺពលរដ្ឋដែលជាប់ខ្សែស្រឡាយចិន ឬអ្នកដែលមានអបិយជំនឿខ្ពស់ចំពោះពិធីដង្ហែមួយនេះ គឺតែងនាំគ្នាប្រារព្ធវាជារៀងរាល់មួយឆ្នាំម្តង ហើយត្រូវធ្វើឡើងរយៈពេល២ថ្ងៃ ។ ហើយពិធីនេះ គឺធ្វើឡើងដើម្បីរំលឹកដល់ទំនៀមទម្លាប់របស់ប្រពៃណីសាសនាចិន ពិសេសបំផុតនេាះ គឺដើម្បីអោយអ្នកតាដែលដើរដង្ហែទាំងអស់ អាចដើរប្រោះព្រំទឹកមន្តតាមផ្ទះ ពលរដ្ឋដែលជាប់ខ្សែស្រលាយចិនទាំងអស់ ដើម្បីសំុអោយរកស៊ីទទួលទានមានបាន ក៏ដូចជាសំុសេចក្តីសុខចម្រើនចូលដល់ក្រុមគ្រួសារផងដែរ ។

ប្រភពឱ្យដឹងថា ពិធីដង្ហែអ្នកតាចិនខាងលើនេះ គឺធ្វើឡើងក្រោយបុណ្យចូលឆ្នាំចិនវៀតណាមកន្លះខែ ដែលពលរដ្ឋជាប់ខ្សែស្រលាយចិនចាត់ទុកថា ពិធីបុណ្យចូលឆ្នាំចិនវៀតណាម គឺជាការអញ្ចើញអ្នកតាឡើងទៅលើមេឃ ហើយចំពោះពិធីហែអ្នកតា គឺជាការអញ្ចើញអ្នកតាចុះពីលើមេឃមកវិញ ដើម្បីប្រោះព្រំនាំលាភជ័យដល់កូនចៅ ។

សូមបញ្ជាក់ថា ពិធីដង្ហែអ្នកតាចិនខាងលើនេះ គឺគេសង្គេតឃើញថា អ្នកតាដែលត្រូវបានគេដង្ហែគឺស្លៀកសម្លៀកបំពាក់បែបប្រពៃណីចិនបុរាណ ដោយក្នុងដៃមានកាន់ដាវ លំពែង កាបិត ពូថៅ និងវត្ថុមុតស្រួលផ្សេងៗជាច្រើនទៀត ។ លើសពីនោះ អ្នកតាមួយចំនួន ក៏បានប្រើដែកមុតស្រួចចាក់ទម្លាក់ផ្ទៃមុខរបស់ខ្លួនក៏មានដែរ ដើម្បីបង្ហាញពីរិទ្ធីបារមីរបស់អ្នកតា ។ ពលរដ្ឋដែលរស់នៅប្របសងខាងផ្លូវដែលអ្នកតាហែរឆ្លងកាត់នេាះ គឺបានរៀបចំទឹកមន្ត រួមជាមួយការអុជធូបបន់ស្រន់ រងចាំនៅខាងមុខផ្ទះរបស់ខ្លួន ដើម្បីពេលអ្នកតាដង្ហែរទៅដល់គឺអាចចូលទៅស្រោចទឹកប្រេាះព្រំុដល់ក្រុមគ្រួសាររបស់ពួកគេ ៕