រាជធានីភ្នំពេញ ៖ ស្ថិតក្នុងបរិបទវិរុសកូរ៉ូណាវាយលុក ឬរីករាលដាលខ្លាំងនៅប្រទេសចិន នេះគេមើលឃើញថា បណ្តាប្រទេសដែលធ្លាប់នាំចូលវត្ថុធាតុដើមពីចិនអាចនឹងប្រឈមមុខកង្វះវត្ថុធាតុដើមសម្រាប់ធ្វើការនាំចេញទៅក្នុងចំណែកទីផ្សាររបស់ខ្លួន រួមទាំងកម្ពុជាមួយទៀតផងដែរ ប្រសិនបើវិធានការទប់ស្កាត់មិនត្រូវបានកាត់បន្ថយក្តីបារម្ភ ។
បើតាមប្រធានអង្គភាពអ្នកនាំពាក្យរាជរដ្ឋាភិបាលកម្ពុជា ជំងឺវីរុសកូរ៉ូណានេះបានធ្វើឱ្យប្រទេសជាច្រើននៅលើពិភពលោកអាច និងប្រឈមការប៉ះពាល់ពីការកង្វះខាតវត្ថុធាតុដើម ព្រោះរោងចក្រនៅចិនភាគច្រើនបានបិទទ្វារ ។
លោកផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលបាល លើកឡើងក្នុងសន្និសីទសារព័ត៌ស្តីពីវឌ្ឍនភាព និងទិសដៅការងារបន្តក្រសួងអប់រំ និងយុវជន និងកីឡា កាលពីថ្ងៃទី១០ កុម្ភៈនេះ ថាស្ថិតនៅក្នុងបរិបទនៃជំងឺវីរុសកូរ៉ូណា នេះយើងឃើញថា មានផលប៉ះពាល់ច្រើននៅលើពិភពលោករវាងការផ្តល់ និងទទួលវត្ថុធាតុដើមពីចិន អាស្រ័យដោយរោងចក្រនៅក្នុងប្រទេសចិនបានបិទទ្វារមួយចំនួនធំដូចជា រោងចក្ររថយន្ត ក៏ដូចជា រោងចក្រដទៃទៀត ។
លោក អាត ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាមានប្រសាសន៍ថា កន្លងមកវិស័យកាត់ដេរនាំយកវត្ថុធាតុដើមប្រមាណ៧០%មកពីប្រទេសចិន និងនៅសល់ប៉ុន្មាននាំចូលមកពីប្រទេសអាស៊ានផ្សេងទៀត។ លោកបន្តថា« នៅពេលមានបញ្ហាវីរុសកូរ៉ូណាកើតឡើងបែបនេះមិនដឹងថា រោងចក្រក្នុងស្រុកមានវត្ថុធាតុដើមប្រើប្រាស់បានប៉ុន្មានខែបន្តទៀតទេ ។ តែបើមិនមានការបញ្ជូនវត្ថុធាតុដើមចូលមកបន្តទេ មានន័យថា វានឹងចូលដល់ស្ថានភាពលំបាកដូចទៅនឹងប្រទេសផ្សេងទៀត ។ វត្ថុធាតុដើមសម្រាប់បម្រើនៅក្នុងវិស័យកាត់ដេរនេះគេមានការកុំម្ម៉ង់ខុសគ្នាមាន១ខែ, ៣ខែ, ៦ខែនិង១ឆ្នាំ ។ ស្ថិតនៅក្នុងរយៈពេលខ្លីនេះប្រហែលវិស័យកាត់ដេរនៅកម្ពុជាមិនទាន់រងផលប៉ះពាល់ទេប៉ុន្តែបើផុត៣ខែមិនមានការនាំចូលវត្ថុធាតុដើមមកទេវានឹងប៉ះពាល់» ។
លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលើកឡើងក្នុងពិធីសំណេះសំណាលជាមួយមន្ត្រីក្រោមឱវាទនៅថ្ងៃនេះបានបញ្ជាទៅកាន់មន្ត្រីរាជការក្រោមឱវាទត្រូវចុះត្រួតពិនិត្យចរន្តការងាររបស់កម្មករនិយោជិត ក៏ដូចជា តម្រូវការទីផ្សារការងារទាំងក្នុង និងក្រៅប្រទេស ដើម្បីបង្វែរកម្លាំងពលកម្មពីកន្លែងសល់ទៅបំពេញនៅកន្លែងដែលខ្វះកម្លាំងពលកម្ម ។
លោកបណ្ឌិតអ៊ិត សំហេង លើកឡើងថា « អ្វីដែលជាបញ្ហាប្រឈមនានា ដែលមានឥទ្ធិពលមកពីខាងក្រៅ ដូចជា សេដ្ឋកិច្ចពិភពលោក បញ្ហាជំងឺកូរ៉ូណាវីរុស សង្គ្រាមពាណិជ្ជកម្មផ្សេងៗ ដែលកំពុងកើតមានឡើងនាពេលបច្ចុប្បន្ននេះ ដែលជាទឡ្ហីករណ៍ទាមទារឱ្យមន្ត្រីបង្កើនការយកចិត្តទុកដាក់ខ្ពស់ ដើម្បីដោះស្រាយការវិវត្តថ្មីៗនេះ» ៕
ចែករំលែកព័តមាននេះ