រាជធានីភ្នំពេញ ៖ ឡៅ ចិត្រា មកពី ក្លិបកងទ័ពពិសេសឆត្រយោង៩១១ បានប្រកាសពីការត្រៀមខ្លួនរួចរាល់ប៉ះជាមួយម្ចាស់ខ្សែក្រវាត់២ស្ថាប័នមកពីអ៊ូសបេគីស្ថាន គឺកីឡាករ Raknimjon Boltaboyev ក្នុងជំនួបមិត្តភាពនៃកម្មវិធីប្រដាល់«កម្ពុជា សង្វៀនគុនខ្មែរ»នៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ ទី៨ កុម្ភៈ ។
កីឡាករ Raknimjon Boltaboyevមិនធ្លាប់មកប្រកួតនៅលើសង្វៀនស្រុកខ្មែរពីមុនមកទេទើបអត់មានអ្នកណាដឹងពីថ្វីដៃប្រកួតរបស់គេថាខ្លាំងប៉ុនណា ។ គេបានត្រឹមតែដឹងថា កីឡាកររូបនេះគឺជាម្ចាស់ខ្សែក្រវាត់ចំនួន២ស្ថាប័នប៉ុណ្ណោះ ។ ចំណែកកីឡាករ ឡៅ ចិត្រា វិញក៏មិនមែនជាជើងអន់នោះដែរ ។ អ្នកណាមិនល្បីថា ឡៅ ចិត្រា ពូកែខាងប្រើស្នៀតកែងនិងជង្គង់នោះ រីឯស្នៀតកណ្ដាប់ដៃវិញមិនត្រឹមតែអាចធ្វើការវាយចេញបានរហ័សនោះទេ ថែមទាំងចំគោលដៅបានល្អទៀតផង ។ គូនេះប្រកួតគ្នាក្នុងប្រភេទទម្ងន់៦៣,៥គីឡូក្រាម ហើយគេសង្ឃឹមថា ឡៅ ចិត្រា មិនធ្វើឱ្យអ្នកគាំទ្រខកបំណងឡើយ។
កីឡាករ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ ជួបប្រកួតជាមួយកីឡាករថៃ រ៉ុងតាក់វ៉ាន់ វីនអ៊ូប៊ុន ក្នុងប្រភេទទម្ងន់៦០គីឡូក្រាម ។ គូនេះក៏ធ្វើឱ្យអ្នកតាមដានការប្រកួតមានការចាប់អារម្មណ៍ណាស់ដែរ ជាពិសេសអ្នកប្រដាល់ចាស់វស្សាមកពីខេត្តបន្ទាយមានជ័យរូបនេះធ្លាប់ធ្វើឱ្យកីឡាករថៃជាច្រើននាក់ភ្លក់រសជាតិកណ្ដាប់ដៃដ៏មហាទម្ងន់របស់គេ ។ ប៉ុន្តែសម្រាប់ការមកប៉ះជាមួយអ្នកប្រដាល់ជើងខ្លាំងមកពីថៃរ៉ុងតាក់វ៉ាន់ លើកនេះ គេមិនហ៊ានអះអាងទុកមុនពីរឿងចាញ់ឈ្នះនោះដែរ ដ្បិតអីកីឡាករថៃម្នាក់នេះមិនមែនជាជើងអន់ដែលងាយស្រួលយកឈ្នះនោះដែរ។
ម្យ៉ាងវិញទៀតគេធ្លាប់មកប្រកួតនៅស្រុកខ្មែរជាច្រើនលើកច្រើនសារួចមកហើយ ។ បើចង់ដឹងថា អ្នកណាខ្លាំងជាងមានតែរង់ចាំទស្សនាការប្រកួតនៅលើសង្វៀនជាក់ស្ដែងតែប៉ុណ្ណោះ។
កីឡាករ ឡុង សំណាង មកពីក្លិបសាល វ័ន្តកីឡា ត្រូវបានគេរៀបចំឱ្យជួបប្រកួតជា មួយកីឡាកថៃ នឹងត្រាកាន ក.កាមន្តវ៉ាត់ ក្នុងប្រភេទទម្ងន់៦៣,៥គីឡូក្រាម។
លើកនេះ ឡុង សំណាង រាងធ្វើការធ្ងន់បន្តិចហើយព្រោះអីគូប្រកួតរបស់គេគឺជាអ្នកប្រដាល់ជើងខ្លាំង មានបទពិសោធន៍ប្រកួតយូរឆ្នាំ ។ ដូច្នេះសម្រាប់ការប្រកួតលើកនេះ ឡុង សំណាង មិនអាចធ្វេសប្ហែសបានទេ។ ចំណែកគូប្រកួតបើកឆាកវិញ កីឡាករ ខុន សីហា មកពីក្លិបអេភូថងកីឡា ត្រូវប្រកួតជាមួយកីឡាករ ឌូ ចាន់ឌី មកពីក្លិបប្រដាល់គុនខ្មែរ៕ (កែសម្រួលដោយ ៖ បុប្ផា)
ចែករំលែកព័តមាននេះ