ថ្វីបើបច្ចុប្បន្នជាសម័យកាលរីកចម្រើនជឿនលឿនទៅដោយបច្ចេកវិទ្យាដ៏ទំនើបកម្រិតណាក៏ដោយ ក៏ពលរដ្ឋខ្មែរភាគច្រើននៅតែមានជំនឿលើមន្តអាគមន៍ អូមអាម ជឿលើគ្រូហោទស្សន៍ទាយពីជោគជតារាសី ថ្ងៃអនាគត និងបច្ចុប្បន្ន ដោះអំពើខ្មោចព្រាយ បិសាច ធ្វើខ្សែចង្កេះ និងធ្វើវត្ថុស័ក្ដិសិទ្ធិ ការពារខ្លួន ។ ចំណែកការព្យាបាលជំងឺតាមបែបបុរាណ-ប្រើមន្តអាគម តាមរយៈការស្ដោះផ្លុំ ប្រើប្រាស់ថ្នាំសង្កូវ ពីរុក្ខជាតិ ឫសឈើ មើមឈើ និងឆ្អឹងសត្វ ស្បែកសត្វ នៅតែមានអ្នកទៅរកសេវាកម្មបែបនេះជាហូរហែ ។
ជាក់ស្តែងចូលមកដល់ដើមឆ្នាំ២០២០នេះ គេសង្កេតឃើញថា ចរន្តនៃអ្នកទៅរកគ្រូឲ្យទស្សន៍ទាយលើជោគជតារាសី តាមរយៈមន្តអាគមន៍ធ្វើស្នេហ៍ជួបជុំប្ដីប្រពន្ធ ឬបញ្ចុះមន្តស្នេហ៍ ដើម្បីឲ្យមុខរបររកស៊ីកាក់កប ក្រុមហ៊ុនមានភាពរីកចម្រើន មានសុភមង្គលក្នុងសង្គមគ្រួសារ រៀបចំមង្គលការកូនចៅ ព្យាបាលជំងឺជាដើម គឺនៅតែមាន សកម្មភាព ផុសផុល ដូចបណ្ដាឆ្នាំមុនៗដដែល ។
ចំណុចទាំងអស់នេះហើយ សបញ្ជាក់ឲ្យឃើញថា ក្នុងសង្គមរស់នៅរបស់ខ្មែរបច្ចុប្បន្ន ការទោរទន់លើអបិយជំនឿនៅតែដក់ជាប់ក្នុងផ្នត់គំនិតរបស់មនុស្ស មិនថាអ្នកមាន ឬអ្នកក្រ រួមទាំងអ្នកបួសផងដែរ ពោលគឺនៅតែមិនអាចកាត់ផ្ដាច់បានពីជីវភាពប្រចាំថ្ងៃរបស់ពួកគេបានឡើយ ។
ទោះបីជាបែបណា យើងទាំងអស់គ្នាក៏មិនត្រូវមើលរំលងវិទ្យាសាស្ត្រដ៏ទំនើបនាពេលបច្ចុប្បន្ននេះដែរ ជាពិសេសគឺ ការព្យាបាលជំងឺគួរតែទៅរកសេវាកម្មដែលមានការធ្វើរោគវិនិច្ឆ័យច្បាស់លាស់ ព្យាបាលចំទិសដៅនៃជំងឺឱ្យបានត្រឹមត្រូវ ។ ផ្ទុយទៅវិញបើជឿលើការព្យាបាលជំងឺតាមបែបមន្តអាគមក៏ជឿចុះតែមុននឹងដាក់ចិត្តជឿលើអ្វីមួយ ឬជឿលើគ្រូណាម្នាក់ត្រូវតែគិតពិចារណាឲ្យបានច្បាស់លាស់ ទើបមិនមានវិបត្តិទៅថ្ងៃក្រោយ ៕ សាន សារិន
ចែករំលែកព័តមាននេះ