ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា ព្រានព្រៃប្រមាញ់សត្វស្វាកន្ទុយ.សម្នាក់ត្រូវបានចៅក្រមស៊ើបសួរសាលាដំបូងខេត្តមណ្ឌលគិរី បានសម្រេចឃុំខ្លួនកាលពីថ្ងៃទី២ ខែកុម្ភៈ ឆ្នាំ២០២០នេះហើយ ។
![](https://kohsantepheapdaily.com.kh/wp-content/images/2020/02/8f14e45fceea167a5a36dedd4bea2543-5.jpg)
សេចក្តីរាយការណ៍បានឲ្យដឹងថា បុរសម្នាក់ពាក់ព័ន្ធករណីបរបាញ់សត្វស្វាកន្ទុយ.សខាងលើនេះ គឺជាបទល្មើសធនធានធម្មជាតិថ្នាក់ទី៣ តាមបញ្ញត្តិនៃច្បាប់ស្ដីពីតំបន់ការពារធម្មជាតិ និងបទកាន់កាប់អាវុធដោយខុសច្បាប់តាមមាត្រា៤៩០ នៃក្រមព្រហ្មទណ្ឌ។
![](https://kohsantepheapdaily.com.kh/wp-content/images/2020/02/c9f0f895fb98ab9159f51fd0297e236d-6.jpg)
សេចក្តីរាយការណ៍បន្តថា ជនត្រូវចោទខាងលើនេះ ឈ្មោះ លី ឯក ភេទប្រុស អាយុ៣៥ឆ្នាំ មានទីលំនៅបច្ចុប្បន្នរស់នៅភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ ត្រូវបានមន្ត្រីឧទ្យានុរក្សដែនជម្រកសត្វព្រៃកែវសីមា ចាប់ឃាត់ខ្លួនបានជាមួយវត្ថុតាងជាក់ស្ដែង ខណៈជននេះបានបាញ់សត្វស្វាកន្ទុយ.ស១ក្បាល (ងាប់) រួចដឹកតាមម៉ូតូ កាលពីថ្ងៃទី៣១ ខែមករា ឆ្នាំ២០២០ នៅត្រង់ចំណុចភ្នំស្រឡៅ ស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី ក្នុងដែនជម្រកសត្វព្រៃកែវសីមា។
![](https://kohsantepheapdaily.com.kh/wp-content/images/2020/02/45c48cce2e2d7fbdea1afc51c7c6ad26-3.jpg)
បច្ចុប្បន្នសំណាកសត្វស្វាកន្ទុយ.សត្រូវបានដុតកម្ទេច រីឯវត្ថុតាងជាក់ស្ដែង (ម៉ូតូ១គ្រឿងនិងអាវុធ១ដើម) ត្រូវបានរក្សាទុកបណ្ដោះអាសន្ននៅស្នាក់ការដែនជម្រកសត្វព្រៃកែវសីមា ចំណែកជនជាប់ចោទត្រូវបានឃុំខ្លួនដាក់ពន្ធនាគារ៕ (កែសម្រួលដោយ ៖ បុប្ផា)
ចែករំលែកព័តមាននេះ