រាជធានីភ្នំពេញ ៖ ជនសង្ស័យម្នាក់បានចូលទៅម៉ាស្សានៅក្នុងទីតាំងមួយកន្លែងលុះក្រោយពីម៉ាស្សារួចរាល់គិតលុយអស់២៥ដុល្លាគឺម៉ាស្សា និងរួមភេទ តែជននោះប្រាប់ថា គ្មានលុយឲ្យគ្រាន់តែម៉ាស្សាសោះម៉េចក៏ថ្លៃម្ល៉េះ ក៏បានបង្កឲ្យមានជម្លោះពាក្យសម្ដីកើតឡើងរហូតជននោះវាយទៅលើបុគ្គលិកហាងម៉ាស្សាភេទទី៣ម្នាក់ ហើយត្រូវពួកនាងៗនៅទីនោះនាំគ្នាឃាត់ម៉ូតូទុកក្នុងបំណងឲ្យជននោះយកលុយថ្លៃម៉ាស្សាទៅឲ្យទើបប្រគល់ម៉ូតូឲ្យវិញ ។
ភ្លាមៗនោះជនសង្ស័យបានចាកចេញទៅបាត់លុះមួយសន្ទុះក្រោយមកស្រាប់តែជិះម៉ូតូកង់បី១គ្រឿងត្រឡប់ទៅវិញទាញកាំភ្លើង AK បាញ់រះជិត១០គ្រាប់ធ្វើឲ្យពួកនាងៗរត់ជាន់គ្នាប៉ុន្តែសំណាងល្អមិនបានបណ្ដាលឲ្យមានអ្នករងរបួសឡើយ។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៨យប់ ថ្ងៃទី៣១ ខែមករា ឆ្នាំ២០២០ នៅចំណុចហាងម៉ាស្សាយីហោ«លីលី» ដែលមានទីតាំងស្ថិតនៅក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។ ជនសង្ស័យមិនត្រូវបានស្គាល់អត្តសញ្ញាណនោះទេ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ។
យោងតាមការបំភ្លឺពីឈ្មោះ ប៉ោ សេរីវុទ្ធ ភេទទី៣ អាយុ២៧ឆ្នាំ មុខរបរម៉ាស្សានៅហាងខាងលើបានឲ្យដឹងថា មុនពេលកើតហេតុជនសង្សយ័ខាងលើបានជិះម៉ូតូទៅឈប់មុខហាងម៉ាស្សាខាងលើដោយហៅគាត់ម៉ាស្សាឲ្យ ។ លុះក្រោយពេលម៉ាស្សារួចគាត់ក៏ទារថ្លៃម៉ាស្សាចំនួន២៥ដុល្លារ ប៉ុន្តែជនសង្ស័យនោះអត់ឲ្យរួចក៏ដើរចុះមកក្រោម ពេលនោះគាត់ក៏មកតាមទាលុយរហូតមានទំនាស់គ្នាកើតឡើង ។
ខណៈនោះស្រាប់តែជនសង្ស័យបានវាយគាត់ចំនួន៥ដៃ បន្ទាប់មកបម្រុងយកម៉ូតូជិះចេញ ប៉ុន្តែគាត់ឃាត់មិនឱ្យយកម៉ូតូចេញ ហើយជនសង្ស័យក៏បានដើរចេញទៅបាត់ លុះប្រហែលកន្លះម៉ោងក្រោយមកជនសង្ស័យខាងលើក៏បានជិះម៉ូតូកង់បី ត្រឡប់មកវិញរួចបានទាញកាំភ្លើងបាញ់ជាច្រើនគ្រាប់ ប៉ុន្តែមិនបណ្តាលត្រូវនរណាម្នាក់ឡើយ ។
ប្រភពមួយបានបង្ហើបថា គេបានឮការប្រកែកគ្នាកើតឡើងមុនពេលមានការផ្ទុះអាវុធ ដោយជនបង្កថា គ្រាន់តែម៉ាស្សាម៉េចក៏ថ្លៃម្ល៉េះ? ប៉ុន្តែខាងនាងៗវិញចោទថា «រួមភេទគេហើយអត់ឲ្យលុយ » ។ លុះក្រោយពេលបាញ់រួចជននោះរំដោះយកម៉ូតូចេញទៅបាត់ ហើយនៅកន្លែងកើតហេតុសមត្ថកិច្ចបានរកឃើញសំបកគ្រាប់កាំភ្លើង AK ចំនួន៦គ្រាប់ហើយនគរបាលខណ្ឌពោធិ៍សែនជ័យយកទៅរក្សារទុក និងធ្វើការស្រាវជ្រាវរកជនសង្ស័យផងដែរ ៕
កែសម្រួលដោយ ៖ សំណាង
ចែករំលែកព័តមាននេះ